ພັກ ແລະ ລັດຖະບານເຮົາ ໄດ້ມີຄວາມພະຍາຍາມ ແລະ ເອົາໃຈໃສ່ ໃນການພັດທະນາວຽກງານສົ່ງເສີມການຫັນເປັນດີຈີຕອນຂອງ ສປປ ລາວ, ພັດທະນາເສດຖະກິດດີຈີຕອນ ຊຶ່ງຮຽກຮ້ອງໃຫ້ວຽກງານດັ່ງກ່າວ ຕອບສະໜອງການພັດທະນາເສດຖະກິດ-ສັງຄົມຂອງຊາດ ໃນປັດຈຸບັນ ແລະ ຍາວນານ. ເພື່ອເຮັດໃຫ້ການຫັນເປັນດີຈີຕອນຂອງປະເທດເຮົາ ປະກົດຜົນເປັນຈິງ ຕ້ອງໄດ້ເອົາໃຈໃສ່ວຽກງານຕົ້ນຕໍຈໍານວນໜຶ່ງ. ແຕ່ສິ່ງສຳຄັນ ແມ່ນຕ້ອງບຸກທະລຸດ້ານຈິນຕະນາການ ເພື່ອການກັນປ່ຽນດ້ານແນວຄິດຂອງທົ່ວສັງຄົມ ເຫັນໄດ້ເຖິງຄວາມສຳຄັນ ແລະ ເຂົ້າຮ່ວມຢ່າງຕັ້ງໜ້າໃນການຫັນເປັນດິຈິຕອນ.
ທ່ານ ສອນໄຊ ສີພັນດອນ ນາຍົກລັດຖະມົນຕີ ກໍໄດ້ເນັ້ນບັນຫາສຳຄັນນີ້ ທີ່ກອງປະຊຸມ ສໍາມະນາລະດັບລັດຖະມົນຕີ ວ່າດ້ວຍການຫັນເປັນດີຈີຕອນ ກຸ່ມຂໍ້ມູນຜູກພັນ 4.0 ເພື່ອພັດທະນາເສດຖະກິດດີຈີຕອນ ຂອງ ສປປ ລາວ, ໃນວັນທີ 26 ພຶດສະພາຜ່ານມາ ຊຶ່ງທ່ານ ນາຍົກລັດຖະມົນຕີ ໄດ້ເນັ້ນໜັກວ່າ: ເພື່ອເຮັດໃຫ້ການຫັນເປັນດີຈີຕອນຂອງປະເທດເຮົາ ປະກົດຜົນເປັນຈິງ ຕ້ອງເອົາໃຈໃສ່ວຽກງານຕົ້ນຕໍຈຳນວນໜຶ່ງ ເປັນຕົ້ນ ບຸກທະລຸທາງດ້ານຈິນຕະນາການ ເພື່ອສ້າງຄວາມສຳນຶກທີ່ເປັນເອກະພາບ, ເສີມຂະຫຍາຍບົດບາດການນຳພາຂອງພັກ ແລະ ການຄຸ້ມຄອງລັດ, ສົ່ງເສີມການມີສ່ວນຮ່ວມທຸກອົງການຈັດຕັ້ງ ທາງດ້ານການເມືອງ-ສັງຄົມ, ປູກຈິດສຳນຶກໃຫ້ແກ່ຄະນະພັກ ແລະ ອຳນາດການປົກຄອງທຸກຂັ້ນ ເຫັນໄດ້ຄວາມສຳຄັນອັນຮີບດ່ວນ ແລະ ເຂົ້າຮ່ວມຢ່າງຕັ້ງໜ້າ ໃນການຫັນເປັນດີຈີຕອນ.
ພ້ອມກັນນັ້ນ, ການພັດທະນາຊັບພະຍາກອນມະນຸດ ຕ້ອງມີຄຸນນະພາບສູງ ແລະ ສອດຄ່ອງກັບສະພາບການຫັນປ່ຽນຂອງຍຸກສະໄໝ ຢ່າງຕັ້ງໜ້າ ເພື່ອຮອງຮັບການຫັນເປັນດີຈີຕອນຂອງປະເທດເຮົາ; ພັດທະນາພື້ນຖານໂຄງລ່າງທີ່ສຳຄັນຈຳນວນໜຶ່ງ ເພື່ອສ້າງຄວາມອາດສາມາດ ແລະ ຄວາມເຂັ້ມແຂງ ໃຫ້ແກ່ການຫັນເປັນດີຈີຕອນ; ເອົາໃຈໃສ່ພັດທະນາອຸດສາຫະກຳເຕັກໂນໂລຊີເປັນບຸລິມະສິດ ແລະ ເປັນຈຸດສຸມ ເພື່ອເຮັດໃຫ້ຂະແໜງການອຸດສາຫະກຳການຜະລິດ, ການທ່ອງທ່ຽວ ແລະ ການບໍລິການທີ່ເປັນອົງປະກອບສຳຄັນຂອງເສດຖະກິດປະເທດເຮົາ ມີການຂະຫຍາຍຕົວຢ່າງແຂງແຮງ; ເປີດກວ້າງຮັບຜູ້ທີ່ມີພອນສະຫວັນດ້ານວິທະຍາສາດ, ກອງທຶນ, ແລະ ໂຄງການທົ່ວໂລກ ເພື່ອຮ່ວມມືພັດທະນາ ແລະ ການກໍ່ສ້າງກັບປະເທດລາວ. ຊຸກຍູ້ການຫັນເປັນດີຈີຈຕອນຢູ່ໃນບັນດາອົງການຈັດຕັ້ງພັກ, ລັດ ເພື່ອຍົກລະດັບການຄຸ້ມຄອງບໍລິຫານ ແລະ ບໍລິການຂອງບັນດາອົງການຈັດຕັ້ງຕ່າງໆ ໃຫ້ມີປະສິດທິພາບ ແລະ ມີປະສິດທິຜົນສູງ; ເອົາໃຈໃສ່ສົ່ງເສີມ ແລະ ຂະຫຍາຍການຮ່ວມມືກັບບັນດາປະເທດເພື່ອນມິດຍຸດທະສາດ,ເຊື່ອມໂຍງກັບພາກພື້ນ ແລະ ສາກົນ ເພື່ອຍາດແຍ່ງເອົາບົດຮຽນ, ຄວາມຮູ້ ແລະ ການລົງທຶນຈາກຕ່າງປະເທດ ມາພັດທະນາການຫັນເປັນດີຈີຕອນ ຂອງ ສປປ ລາວ.
ຢາກເຮັດໄດ້ແນວນັ້ນ, ທ່ານ ນາຍົກລັດຖະມັນຕີ ຍັງໄດ້ສະເໜີໃຫ້ທຸກພາກສ່ວນກ່ຽວຂ້ອງ ເປັນເຈົ້າການຕໍ່ກັບວຽກງານດັ່ງກ່າວ ຊຶ່ງແມ່ນພັກ-ຄະນະນຳ ແລະ ອົງການປົກຄອງທຸກຂັ້ນ ນຳພາ-ຊີ້ນຳ ການຫັນເປັນດີຈີຕອນໃນຂົງເຂດຂອງຕົນ ໃຫ້ປະສົບຜົນສຳເລັດເປັນຢ່າງດີ; ສະພາແຫ່ງຊາດ ເປັນເຈົ້າການສ້າງ ແລະ ປັບປຸງບັນດານິຕິກຳ ຕິດພັນກັບການພັດທະນາເສດຖະກິດດີຈີຕອນ. ພ້ອມທັງ ຕິດຕາມ, ກວດກາ ການຈັດຕັ້ງປະຕິບັດໃຫ້ຖືກຕ້ອງ ຕາມລັດຖະທຳມະນູນ ແລະ ກົດໝາຍຂອງ ສປປ ລາວ; ລັດຖະບານ ເປັນເຈົ້າການໃນການຄົ້ນຄວ້າ ຜັນຂະຫຍາຍແຜນຍຸດທະສາດການພັດທະນາເສດຖະກິດດີຈີຕອນ ໃຫ້ເປັນນິຕິກຳ, ເປັນແຜນພັດທະນາ, ໂຄງການ ແລະ ຈັດຕັ້ງປະຕິບັດຕາມຄວາມເໝາະສົມ ແນໃສ່ຊຸກຍູ້ສົ່ງເສີມການຂະຫຍາຍຕົວເສດຖະກິດດີຈີຕອນຂອງປະເທດເຮົາ ໃຫ້ມີຄວາມວ່ອງໄວ, ທັນກັບສະພາບການໃໝ່; ແນວລາວສ້າງຊາດ ແລະ ອົງການຈັດຕັ້ງມະຫາຊົນ ເອົາໃຈໃສ່ໂຄສະນາຂົນຂວາຍ ແລະ ປຸກລະດົມມະຫາຊົນ ໃຫ້ເຂົ້າຮ່ວມຢ່າງກວ້າງຂວາງ, ແຂງແຮງ ແລະ ຟົດຟື້ນ; ຄະນະໂຄສະນາອົບຮົມ ສົມທົບກັບບັນດາອົງການຈັດຕັ້ງກ່ຽວຂ້ອງ ຈັດຕັ້ງເຜີຍແຜ່ ແລະ ຄົ້ນຄວ້າເຊື່ອມຊຶມ ເພື່ອຫັນປ່ຽນຈິນຕະນາການ ໃຫ້ແກ່ຄະນະພັກ-ຄະນະນຳ ແລະ ອຳນາດການປົກຄອງທຸກຂັ້ນ, ສະມາຊິກພັກ-ພະນັກງານຫຼັກແຫຼ່ງ ແລະ ນັກທຸລະກິດ-ຜູ້ປະກອບການໃຫ້ທົ່ວເຖິງ ແລະ ເລິກເຊິ່ງ ເພື່ອໃຫ້ທົ່ວສັງຄົມ ປະກອບສ່ວນຢ່າງຕັ້ງໜ້າ ເຂົ້າໃນຂະບວນການຫັນເປັນດີຈີຕອນຂອງປະເທດເຮົາ.
ໂດຍ: ສ. ບຸດປະຊາ
