ຕາມຂ່າວຈາກ ວິທະຍຸສາກົນ ແຫ່ງ ສປ ຈີນ, ໄທ ຈະເປັນເຈົ້າພາບ ຈັດການ ແຂ່ງຂັນ ຊີເກມ ຄັ້ງທີ 33 ໃນປີ 2025 ພາຍຫລັງ ກຳປູເຈຍ ໄດ້ສົ່ງຕໍ່ທຸງ ສະມາຄົມ ການແຂ່ງຂັນ ກິລາ ຊີເກມ ໃຫ້ແກ່ ໄທ ໃນພິທີປິດ ການແຂ່ງຂັນ ກິລາ ຊີເກມ ຄັ້ງທີ 32 ໃນວັນທີ17 ພຶດສະພານີ້ ໄດ້ຈັດຂຶ້ນຢ່າງຍິ່ງໃຫຍ່ ແລະ ໜ້າປະທົບໃຈ ຂອງມວນຊົນ ທັງພາຍໃນ ແລະ ຕ່າງປະເທດ ເຂົ້າຮ່ວມ.ໃນໂອກາດນີ້ ທ່ານ ຮຸນເຊັນ, ນາຍົກລັດຖະມົນຕີກຳປູເຈຍ ໄດ້ກ່າວປິດຢ່າງເປັນທາງການ ໂດຍຊີ້ໃຫ້ເຫັນວ່າ: ງານກິລາຊີເກມ ສຳເລັດລົງດ້ວຍຜົນສຳເລັດຢ່າງຈົບງາມ ຊຶ່ງສະແດງໃຫ້ເຫັນເຖິງຄວາມສາມັກຄີ, ມິດຕະພາບ ແລະ ການຮ່ວມມື ລະຫວ່າງ ປະເທດ ອາຊີ ຕາເວັນອອກ ສຽງໃຕ້, ການຈັດງານແຂ່ງຂັນຄັ້ງນີ້ຢ່າງປະສົບຜົນສຳເລັດແມ່ນເປັນສ່ວນໜຶ່ງຂອງຈິດໃຈຄວາມສາມັກຄີ, ເຂົ້າອົກເຂົ້າໃຈກັນ, ມິດຕະພາບ ແລະ ການເຕົ້າໂຮມກັນ ຂອງ ອາຊຽນ.
ທ່ານ ຮຸນ ເຊັນ ຍັງໄດ້ສະແດງ ຄວາມຂອບໃຈ ຕໍ່ ສປ ຈີນ ທີ່ໄດ້ຊ່ວຍສ້າງ ສະໜາມກິລາ ແຫ່ງຊາດ ກຳປູເຈຍ, ສະໜາມ ກິລາ ດັ່ງກ່າວ ສາມາດ ບັນຈຸ ຜູ້ຊົມ ໄດ້ປະມານ 60.000 ຄົນ, ເປັນສະຖານທີ່ ຈັດພິທີເປີດ-ປິດງານຄັ້ງນີ້ ແລະ ກໍແມ່ນ ສະໜາມກິລາຫລັກຂອງງານແຂ່ງຂັນກິລາຊີເກມ ຄັ້ງນີ້ເຊັ່ນດຽວກັນ.
ຂະນະທີ່ ສສ ຫວຽດນາມ ຢືນຢູ່ ແຖວໜ້າ ເຈົ້າຂອງ ຫລຽນຄຳ ໃນປີນີ້.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
