ໃນໂອກາດນຳພາຄະນະຜູ້ແທນຂັ້ນສູງ ແຫ່ງ ສສ ຫວຽດນາມ ເດີນທາງຢ້ຽມຢາມ ສາທາລະນະລັດ ປະຊາທິປະໄຕ ປະຊາຊົນລາວ ຢ່າງເປັນທາງການ ແຕ່ວັນທີ 10-11 ເມສາ 2023, ສະຫາຍ ຫວໍ ວັນ ເຖືອງ ກຳມະການກົມການເມືອງສູນກາງພັກ ປະທານປະເທດ ແຫ່ງ ສາທາລະນະລັດ ສັງຄົມນິຍົມ ຫວຽດນາມ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ສະຫາຍ ບໍ່ວຽງຄຳ ວົງດາລາ ກຳມະການສູນກາງພັກ ລັດຖະມົນຕີກະຊວງເຕັກໂນໂລຊີ ແລະ ການສື່ສານ ປະທານສະມາຄົມມິດຕະພາບ ລາວ-ຫວຽດນາມ ຂັ້ນສູນກາງ ໃນຕອນແລງຂອງວັນທີ 10 ເມສາ 2023, ທີ່ ໂຮງແຮມຄລາວ ພລາຊາ.
ໃນໂອກາດນີ້, ສະຫາຍ ບໍ່ວຽງຄຳ ວົງດາລາ ໄດ້ສະແດງຄວາມຍີນດີ ແລະ ຊົມເຊີຍ ຕໍ່ສະຫາຍ ຫວໍ ວັນເຖືອງ ທີ່ໄດ້ຮັບຄະແນນສຽງເລືອກຕັ້ງໃຫ້ດໍາລົງຕໍາແໜ່ງປະທານປະເທດແຫ່ງ ສສ ຫວຽດນາມ ແລະ ເຊື່ອໝັ້ນວ່າດ້ວຍຄວາມຮູ້, ປະສົບການ ຂອງສະຫາຍ ຫວໍ ວັນ ເຖືອງ ຈະນໍາພາປະຊາຊົນຫວຽດນາມ ສືບຕໍ່ໄດ້ຮັບຜົນສໍາເລັດອັນໃຫຍ່ຫຼວງໃນການພັດທະນາ ແລະ ປົກປັກຮັກສາປະເທດຊາດ. ພ້ອມທັງໄດ້ຕີລາຄາສູງ ຕໍ່ການຢ້ຽມຢາມ ສປປ ລາວ ຢ່າງເປັນທາງການຂອງ ສະຫາຍ ປະທານປະເທດພ້ອມດ້ວຍຄະນະ ຖືເປັນການປະກອບສ່ວນສໍາຄັນເຂົ້າໃນການຮັດແໜ້ນ, ເສີມຂະຫຍາຍ ແລະ ເພີ່ມພູນຄູນສ້າງ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມອ້າຍນ້ອງ ໃຫ້ນັບມື້ກ້າວເຂົ້າສູ່ລວງເລິກ, ຂຽວສົດງົດງາມ, ເກີດດອກອອກຜົນຢ່າງບໍ່ຢຸດຢັ້ງ. ພ້ອມນີ້, ສະຫາຍ ບໍ່ວຽງຄຳ ວົງດາລາ ໄດ້ລາຍງານໂດຍຫຍໍ້ ກ່ຽວກັບການເຄື່ອນໄຫວ ຂອງ ສະມາຄົມມິດຕະພາບ ລາວ-ຫວຽດນາມ. ອັນພົ້ນເດັ່ນ, ໃນປີ 2022 ຜ່ານມາ, ສະມາຄົມມິດຕະພາບ ລາວ-ຫວຽດນາມ ໄດ້ສົມທົບກັບສະມາຄົມມິດຕະພາບ ຫວຽດນາມ-ລາວ ຈັດກິດຈະກຳສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ ເປັນຕົ້ນ ໄດ້ຈັດພົບປະກັບສະມາຄົມມິດຕະພາບ ຫວຽດນາມ-ລາວ ແລະ ເຂົ້າຮ່ວມພິທີມິດຕິ້ງໃຫຍ່ ເປີດປີສາມັກຄີ ລາວ-ຫວຽດນາມ, ຈັດງານບຸນມະໂຫລານມິດຕະພາບປະຊາຊົນ ລາວ-ຫວຽດນາມຄັ້ງທີ V ຢູ່ແຂວງກວາງຈິ ສສ ຫວຽດນາມ ແລະ ແຂວງສະຫວັນນະເຂດ ສປປ ລາວ, ຈັດພິມວາລະສານສະບັບພິເສດ “ສອງຟາກສາຍພູຫຼວງຕາເວັນອອກແລະຕາເວັນຕົກ” ພາສາລາວ ແລະ ຫວຽດນາມ (ສອງພາສາໃນເຫຼັ້ມດຽວ); ແລະ ຈັດປະກວດບົດຄວາມເລົ່າເລື່ອງ “ອານຸສອນແຫ່ງຄວາມຊົງຈຳ” ຢູ່ ສສ ຫວຽດນາມ. ໃນຕໍ່ໜ້າສອງສະມາຄົມ ມິດຕະພາບ ຈະສືບຕໍ່ປະຕິບັດຕາມພາລະບົດບາດຂອງຕົນ ເຮັດໜ້າທີ່ເຜີຍແຜ່ຂໍ້ມູນຂ່າວສານ, ຄວາມເປັນຈິງ ກ່ຽວກັບມູນເຊື້ອສາຍພົວພັນລາວ-ຫວຽດນາມ ໃຫ້ແກ່ປະຊາຊົນຂອງສອງປະເທດໂດຍ ສະເພາະຄົນຮຸ່ນໜຸ່ມ ໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ ເພື່ອໃຫ້ເຂົາເຈົ້າມີຄວາມຮັບຜິດຊອບ ແລະ ເປັນເຈົ້າການປົກປັກຮັກສາ, ເສີມຂະຫຍາຍ ແລະ ເພີ່ມພູນຄູນສ້າງ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານຂອງ ສອງປະເທດ ໃຫ້ຂຽວສົດງົດງາມ, ເກີດດອກອອກຜົນ ແລະ ໝັ້ນຄົງຂະໜົງແກ່ນຕະຫຼອດຊົ່ວກາລະນານ.
ໃນໂອກາດດຽວກັນນີ້, ສະຫາຍ ປະທານປະເທດ ຫວໍ ວັນ ເຖືອງ ໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງຊາດ ລາວ ແລະ ຫວຽດນາມ ທີ່ໄດ້ຮັບການຮັດແໜ້ນ ແລະ ເສີມຂະຫຍາຍເປັນກ້າວໆຕະຫຼອດມາ ເວົ້າລວມ, ເວົ້າສະເພາະ ກໍຄື ການພົວພັນຮ່ວມມືລະຫວ່າງ ສະມາຄົມມິດຕະພາບ ຫວຽດນາມ-ລາວ ແລະ ສະມາຄົມມິດຕະພາບ ລາວ-ຫວຽດນາມ, ພ້ອມທັງໄດ້ໃຫ້ທິດຊີ້ນໍາ ສອງສະມາຄົມມິດຕະພາບ ສືບຕໍ່ປະສານສົມທົບກັນຢ່າງໃກ້ຊິດ, ປະຕິບັດພາລະບົດບາດ ແລະ ຈັດຕັ້ງປະຕິບັດວຽກງານ ໃຫ້ມີປະສິດທິພາບ ແລະ ປະສິດທິຜົນຂຶ້ນຕື່ມ ເພື່ອປະກອບສ່ວນເສີມຂະຫຍາຍ ແລະ ເພີ່ມພູນຄູນສ້າງສາຍພົວພັນມິດຕະພາບ ແລະ ການຮ່ວມມືລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ຫວຽດນາມ-ລາວ ອ້າຍນ້ອງ, ກໍຄື ລະຫວ່າງ ສອງສະມາຄົມມິດຕະພາບ ໃຫ້ນັບມື້ນັບຈະເລີນງອກງາມຍິ່ງໆຂຶ້ນ.
ຂ່າວ: ກົມຂ່າວກະຊວງການຕ່າງປະເທດ
