ໃນວັນທີ 5 ເມສາ ນີ້; ທ່ານ ນາງ ປິ່ງຄໍາ ລາດຊະສິມມາ ກໍາມະການຄະນະປະຈໍາສະພາແຫ່ງຊາດ ເລຂາທິການສະພາແຫ່ງຊາດ ໄດ້ໃຫ້ກຽດຕ້ອນຮັບຄະນະບໍລິຫານງານສະມາຄົມມິດຕະພາບ ລາວ-ສ ເກົາຫຼີ ຊຶ່ງນຳພາໂດຍທ່ານ ຄໍາສວຍ ແກ້ວດາລາວົງ ປະທານສະມາຄົມມິດຕະພາບ ລາວ-ສ ເກົາຫຼີ ພ້ອມດ້ວຍຄະນະ ທີ່ໄດ້ນຳເອົາເຄື່ອງຊ່ວຍເຫຼືອ ມີປະເພດຢາທາປົວພະຍາດຜີວໜັງມາມອບໃຫ້ແກ່ສະພາແຫ່ງຊາດ ເພື່ອນໍາໄປມອບຕໍ່ໃຫ້ແກ່ຂະແໜງການສາທາລະນະສຸກ ແລະ ອົງການກ່ຽວຂ້ອງຂອງທ້ອງຖິ່ນ ໃນທົ່ວ ສປປ ລາວ.
ເຄື່ອງຊ່ວຍເຫຼືອໃນຄັ້ງນີ້ ມີປະເພດຢາທາ ປົວພະຍາດຜີວໜັງ ທີ່ໄດ້ຮັບການຊ່ວຍເຫຼືອຈາກສະມາຄົມມິດຕະພາບ ສ ເກົາຫຼີ-ລາວ ລວມທັງໝົດມີ 54 ແກັດ ມີ 1. Nafri Cream 18 ແກັດ; 2. Vanazole Cream 18 ແກັດ. 3. Asiclover Cream 18 ແກັດ ມູນຄ່າລວມ 240 ລ້ານກີບ ຫຼື 14.112 ໂດລາ.
ທ່ານ ຄໍາສວຍ ແກ້ວດາລາວົງ ໄດ້ຕາງໜ້າໃຫ້ 2 ສະມາຄົມມິດຕະພາບ ລາວ-ສ ເກົາຫຼີ ແລະ ສະມາຄົມມິດຕະພາບ ສ ເກົາຫຼີ-ລາວ ໄດ້ກ່າວເຖິງຈຸດປະສົງ ແລະ ຄວາມເປັນມາຂອງການພົວພັນ ແລະ ຮ່ວມມືກັນ ໃນໄລຍະຜ່ານມາ ໂດຍສະເພາະແມ່ນສະມາຄົມມິດຕະພາບ ສ ເກົາຫຼີ-ລາວ ທີ່ໄດ້ໃຫ້ການຊ່ວຍເຫຼືອ ຊຶ່ງເປັນການປະກອບສ່ວນຊ່ວຍເຫຼືອໃນຂົງເຂດສາທາລະນະສຸກ ແລະ ສຶກສາ. ໃນໄລຍະຕົ້ນປີ 2023 ທີ່ຜ່ານມານີ້ ສອງສະມາຄົມມິດຕະພາບດັ່ງກ່າວກໍໄດ້ມອບຢາປົວພະຍາດໃຫ້ໂຮງໝໍສູນກາງ 2 ແຫ່ງ, ໂຮງໝໍແຂວງ 1 ແຫ່ງ ແລະ ໂຮງໝໍຊຸມຊົນ 3 ແຫ່ງ.
ໃນໂອກາດດັ່ງກ່າວ, ນາງ ປິ່ງຄຳ ລາດຊະສິມມາ ໄດ້ສະແດງຄວາມຂອບໃຈ ຕໍ່ສອງສະມາຄົມມິດຕະພາບລາວ-ສ ເກົາຫຼີ ແລະ ສ ເກົາຫຼີ-ລາວ ທີ່ໄດ້ຍາດແຍ່ງ ແລະ ບິແບ່ງການຊ່ວຍເຫຼືອໃຫ້ແກ່ສະພາແຫ່ງຊາດໃນຄັ້ງນີ້ ຊຶ່ງຈະເປັນການປະກອບສ່ວນສຳລັບການປິ່ນປົວພະຍາດຜີວໜັງຂອງປະຊາຊົນລາວບັນດາເຜົ່າ, ໂດຍສະເພາະຜູ້ທີ່ຢູ່ຫ່າງໄກສອກຫຼີກ ໂດຍສະພາແຫ່ງຊາດ ມີເປົ້າໝາຍຈະແຈກຢາຍໄປຍັງໂຮງໝໍຊຸມຊົນ, ໂຮງໝໍນ້ອຍ ຕາມບັນດາເມືອງທຸກຍາກໃນຂອບເຂດທົ່ວປະເທດ. ພ້ອມກັນນີ້ ເພິ່ນຍັງໄດ້ແຈ້ງສະພາບຄວາມຈຳເປັນ ແລະ ຄວາມຕ້ອງການຂອງປະຊາຊົນ ໂດຍສະ ເພາະພວກລູກຫຼານ ທີ່ເປັນນັກຮຽນຢູ່ເຂດພູດອຍ, ເຂດຫ່າງໄກສອກຫຼີກ ເປັນຕົ້ນເຄື່ອງກັນໜາວ, ອຸປະກອນການຮຽນ ແລະ ຫວັງວ່າສອງສະມາຄົມມິດຕະພາບດັ່ງກ່າວ ຈະສືບຕໍ່ລະດົມຂົນຂວາຍຊອກຫາການຊ່ວຍເຫຼືອໃນອານາຄົດ.
ໃນວັນທີ 4 ເມສາ 2023; ຄະນະບໍລິຫານງານສະມາຄົມມິດຕະພາບ ລາວ – ສ ເກົາຫຼີ ໄດ້ນຳເອົາເຄື່ອງຊ່ວຍເຫຼືອ ຊຶ່ງມີປະເພດຢາທາປົວພະຍາດຜີວໜັງ ມອບໃຫ້ແກ່ສູນຜິວໜັງ, ກະຊວງສາທາລະນະສຸກ ຊຶ່ງນຳພາໂດຍທ່ານ ຄໍາສວຍ ແກ້ວດາລາວົງ ປະທານສະມາຄົມມິດຕະພາບ ລາວ – ສ ເກົາຫຼີ ພ້ອມດ້ວຍຄະນະ ແລະ ໄດ້ຮັບການຕ້ອນຮັບຢ່າງອົບອຸ່ນຈາກທ່ານ ນາງ ອຳມາລາ ພິລາວັນ ຫົວໜ້າສູນຜິວຫນັງ, ກະຊວງສາທາລະນະສຸກ ພ້ອມຄະນະ ຢູ່ສູນດັ່ງກ່າວ ທີ່ນະຄອນຫຼວງວຽງຈັນ.
ເຄື່ອງຊ່ວຍເຫຼືອໃນຄັ້ງນີ້ ມີປະເພດຢາທາປົວພະຍາດຜີວໜັງ ທີ່ໄດ້ຮັບການຊ່ວຍເຫຼືອຈາກສະມາຄົມມິດຕະພາບ ສ ເກົາຫຼີ-ລາວ ລວມທັງໝົດມີ 75 ແກັດ ມີ 1. Nafri Cream 30 ແກັດ; 2. Vanazole Cream 36 ແກັດ. 3. Asiclover Cream 9 ແກັດ ມູນຄ່າລວມ 360 ລ້ານກີບ ຫຼື 21.204 ໂດລາ.
ຂ່າວ: ສະພາແຫ່ງຊາດ
