ກອງປະຊຸມໃຫຍ່ຜູ້ພິພາກສາທົ່ວປະເທດ ຄັ້ງທີ XI ຈັດຂຶ້ນໃນລະຫວ່າງວັນທີ 28-29 ມີນາ 2023 ເພື່ອທົບທວນຄືນການຈັດຕັ້ງປະຕິບັດ ວຽກງານຜູ້ພິພາກສາທົ່ວປະເທດ ໃນຄັ້ງຜ່ານມາ ພາຍໃຕ້ການເປັນປະທານຂອງ ທ່ານ ນາງ ວຽງທອງ ສີພັນດອນ ປະທານສານປະຊາຊົນສູງສຸດ, ມີບັນ ດາຜູ້ພິພາກສາທົ່ວປະເທດ ເຂົ້າຮ່ວມ. ທ່ານ ນາງ ວຽງທອງ ສີພັນດອນ ໄດ້ກ່າວວ່າ: ກອງປະຊຸມຄັ້ງນີ້, ຈະໄດ້ພ້ອມກັນສຸມໃສ່ລົງເລິກດ້ານເນື້ອໃນເປັນຕົ້ນຕໍ ແລະ ຖືເປັນວຽກທີ່ບັນດາຜູ້ພິພາກສາຈະໄດ້ສຸມສະຕິປັນຍາ ໃນການຄົ້ນຄວ້າມາດຕະການປັບປຸງແກ້ໄຂ ສິ່ງທີ່ເປັນບັນຫາຂອງສັງຄົມ ແລະ ການຈັດຕັ້ງພາກລັດຍັງບໍ່ທັນມີຄວາມເຊື່ອໝັ້ນ, ບໍ່ທັນມີຄວາມເປັນເອກະພາບໃນການຈັດຕັ້ງປະຕິບັດໄດ້ຂາດຕົວ ແລະ ໃຫ້ເປັນບ່ອນສິ້ນສຸດຂອງຂະບວນຍຸຕິທໍາຢູ່ສານປະຊາຊົນ, ຮັບປະກັນຜົນໄດ້ຮັບກອງປະຊຸມ ໃຫ້ມີເນື້ອໃນທີ່ອຸດົມສົມ ບູນ ເພື່ອເປັນຂໍ້ມູນພື້ນຖານໃຫ້ແກ່ການປັບປຸງຂໍ້ຄົງຄ້າງ ໃຫ້ໄດ້ຮັບການແກ້ໄຂໃຫ້ຂາດຕົວ. ພ້ອມທັງຮຽກຮ້ອງບັນດາຜູ້ແທນກອງປະຊຸມ ຈົ່ງໄດ້ພ້ອມກັນຍົກສູງສະຕິຮັບຜິດຊອບ, ຄວາມເປັນເຈົ້າການ ປະ ກອບຄຳຄິດຄຳເຫັນຢ່າງຫ້າວຫັນ ເສີມຂະຫຍາຍຫົວຄິດປະດິດສ້າງ, ຄົ້ນຄິດ ບັນຫາໃຫ້ແຕກ ເພື່ອຈະໄດ້ອອກເປັນມະຕິກອງປະຊຸມ ທີ່ມີເນື້ອໃນອຸດົມສົມບູນໜັກແໜ້ນ, ເລິກເຊິ່ງ, ພາວະວິໄສ ແລະ ຮອບດ້ານ.
ໃນກອງປະຊຸມ ທ່ານ ບຸນຂວາງ ທະວີສັກ ຮອງປະທານສານປະຊາຊົນສູງສຸດ ໄດ້ໃຫ້ຮູ້ວ່າ: ໃນໄລຍະ 2 ປີ ຜ່ານມາ, ສານປະຊາຊົນແຕ່ລະຂັ້ນ ໄດ້ຕັ້ງໜ້າຈັດຕັ້ງປະຕິບັດມະຕິກອງປະຊຸມໃຫຍ່ຜູ້ພິພາກສາທົ່ວປະເທດ ຄັ້ງທີ X ເຊິ່ງຜູ້ພິພາກສາ ແຕ່ລະທ່ານຮັກສາໄດ້ຄຸນທາດການເມືອງ, ຄຸນສົມບັດສິນທຳປະຕິວັດ, ຈັນຍາບັນ, ຈັນຍາທຳ ຕີຖອຍປາກົດການຫຍໍ້ທໍ້ ຢູ່ສານປະຊາຊົນແຕ່ລະຂັ້ນຫລຸດໜ້ອຍຖອຍລົງເທື່ອລະກ້າວ ລະບົບການຈັດຕັ້ງຂອງສານ ໄດ້ຮັບການປັບປຸງໃຫ້ໜັກແໜ້ນ ເຂັ້ມແຂງ ແລະ ເຕີບໃຫຍ່ຂະຫຍາຍຕົວ, ການບໍລິຫານສານ-ບໍລິຫານຄະດີມີຄຸນນະພາບ, ປະສິດທິພາບ, ການພິ ຈາລະນາຕັດສີນຄະດີມີຄວາມວ່ອງໄວ, ໂປ່ງໄສ, ຖືກຕ້ອງ ແລະ ຮັບປະກັນຄວາມຍຸຕິທໍາໃນສັງຄົມ, ເຮັດໃຫ້ສັງຄົມມີຄວາມເຄົາລົບ, ເຊື່ອຖື, ເຊື່ອໝັ້ນ ຕໍ່ກັບການຕັດສິນຂອງສານຫລາຍຂຶ້ນ; ຫາງສຽງຈົ່ມເວົ້າຂອງສັງຄົມຫລຸດລົງເທື່ອລະກ້າວ, ປະຊາຊົນໄດ້ມີຄວາມຮັບຮູ້ ເຂົ້າໃຈເຖິງພາລະບົດບາດ ຂອງສານປະຊາຊົນຫລາຍຂຶ້ນ; ສານປະຊາຊົນ ໄດ້ຮັບຄວາມໄວ້ເນື້ອເຊື້ອໃຈຈາກພັກ-ລັດເປັນຢ່າງດີ. ພ້ອມນີ້, ການຕິດຕາມກວດກາ ແລະ ປະເມີນການປະຕິບັດໜ້າທີ່ຂອງຜູ້ພິພາກສາ ໄດ້ມີການພັດທະນາ ໃຫ້ສາ ມາດຮູ້ໄດ້ ຜູ້ພິພາກສາດີ-ເກັ່ງ, ຮູ້ໄດ້ວຽກດີ ຄົນເກັ່ງ-ວຽກຈິງຄົນແທ້. ໃນປີ 2020-2022 ມີຄະດີເຂົ້າມາຢູ່ສານຂັ້ນຕົ້ນ, ຂັ້ນອຸທອນ ແລະ ຂັ້ນລົບລ້າງ ທັງໝົດ 21.547 ເລື່ອງ ທຽບໃສ່ຄັ້ງກ່ອນຫລຸດລົງ 3.227 ເລື່ອງ, ຄະດີຄ້າງມາ 2.568 ເລື່ອງ, ລວມທັງໝົດ 24.115 ເລື່ອງ, ໄດ້ແກ້ໄຂແລ້ວ 20.733 ເລື່ອງ ເທົ່າກັບ 85,98% ຖ້າທຽບໃສ່ຄັ້ງກ່ອນລຸດລົງ 3,25% ແລະ ຄະດີຍັງຄ້າງ 3.382 ເລື່ອງ, ຖ້າທຽບໃສ່ຄັ້ງຜ່ານມາເຫັນວ່າ ຄະດີຍັງຄ້າງສູງກວ່າຄັ້ງກ່ອນເຖິງ 477 ເລື່ອງ.
ໃນຊຸມປີຜ່ານມາ, ສານປະຊາຊົນແຕ່ລະຂັ້ນ ໄດ້ເປັນເຈົ້າການສຸມໃສ່ປັບປຸງພັດທະນາແບບ ແຜນ ແລະ ກົນໄກການດໍາເນີນຄະດີໃຫ້ມີຄວາມວ່ອງໄວ ແລະ ຮັບປະກັນຄຸນນະພາບຕາມ ຫລັກການພື້ນຖານທີ່ໄດ້ກໍານົດໄວ້ໃນກົດໝາຍ, ຖືເອົາການຈັດຕັ້ງປະຕິບັດວຽກງານສາມສ້າງ ຕິດພັນກັບການຕັດ ສິນຄະດີສາມຂັ້ນ. ນອກນັ້ນ, ຍັງໄດ້ສຸມໃສ່ຄົ້ນຄວ້າສ້າງນິຕິກໍາຕ່າງໆ ເພື່ອຮອງຮັບໃຫ້ແກ່ການເຄື່ອນ ໄຫວປະຕິບັດໜ້າທີ່ວຽກງານວິຊາສະເພາະຂອງສານ ແລະ ສ້າງທຸກເງື່ອນໄຂ ເພື່ອໃຫ້ການດໍາເນີນຄະດີຂອງສານຫຍັບໃກ້ເຂົ້າຫາປະຊາຊົນ ໂດຍສະເພາະໄດ້ມີການຈັດຕັ້ງຄະນະສານເຄື່ອນທີ່, ການຂຶ້ນບັນລັງຕັດສິນດ້ວຍຜູ້ພິພາກສາຜູ້ດຽວ ແລະ ອື່ນໆ ອັນໄດ້ເຮັດໃຫ້ການພິຈາລະນາແກ້ໄຂຄະດີຂອງສານແຕ່ລະຂັ້ນມີຄວາມວ່ອງໄວ ແລະ ມີຄຸນນະພາບດີຂຶ້ນ
ຂ່າວ-ພາບ: ກິດຕາ
