ໃນວັນທີ 27 ມີນາ 2023 ນີ້, ກອງພົນທີ 2 ໄດ້ປະກາດຂໍ້ຕົກລົງ ວ່າດ້ວຍການອະນຸມັດ ໃຫ້ນາຍທະຫານ ອອກການຮັບເງິນອຸດໜູນເທື່ອດຽວ. ໂດຍການເປັນປະທານ ຂອງສະຫາຍ ພັນໂທ ບຸນເດີມ ດວງຈຳປາ ຄະນະພັກກອງພົນ ຮອງຫົວໜ້າຫ້ອງການເມືອງກອງພົນທີ 2, ມີພະແນກການທີ່ກ່ຽວຂ້ອງ ແລະ ນາຍທະຫານ ທີ່ອອກການຮັບເງິນອຸດໜູນເທື່ອດຽວເຂົ້າຮ່ວມ.
ສະຫາຍ ພັນຕີ ອຸ່ນເຮືອນ ໄຊທະລັງສີ ຊ່ວຍວຽກພະແນກພະນັກງານ ຫ້ອງການເມືອງ ກອງພົນທີ 2. ໄດ້ຜ່ານຂໍ້ຕົກລົງຂອງ ກະຊວງປ້ອງກັນປະເທດ ວ່າດ້ວຍການອະນຸມັດ ໃຫ້ນາຍທະຫານອອກການ ຮັບເງິນອຸດໜູນເທື່ອດຽວ. ໂດຍອີງຕາມກົດໝາຍວ່າດ້ວຍນາຍທະຫານກອງທັບປະຊາຊົນລາວ (ສະບັບປັບປຸງ) ເລກທີ 43/ສພຊ, ລົງວັນທີ 14/06/2018 ໝວດທີ I ມາດຕາ 32, ອີງຕາມກົດໝາຍວ່າດ້ວຍປະກັນສັງຄົມ (ສະບັບປັບປຸງ) ເລກທີ 54/ສພຊ, ລົງວັນທີ 27/06/2018, ອີງຕາມຄໍາຮ້ອງ ຂອງຜູ້ກ່ຽວ ແລະ ການຄົ້ນຄວ້າ ແລະ ນໍາສະເໜີ ຂອງກອງພົນທີ 2, ກົມພະງານ ກົມໃຫຍ່ການເມືອງກອງທັບ. ໄດ້ຕົກລົງ ໃຫ້ນາຍທະຫານອອກການ ຮັບເງິນອຸດໜູນເທື່ອດຽວ. ຈໍານວນ 17 ສະຫາຍ. ປະກອບມີ ຊັ້ນພັນຕີ 1 ສະຫາຍ, ຊັ້ນຮ້ອຍເອກ 6 ສະຫາຍ, ຊັ້ນຮ້ອຍໂທ 8 ສະຫາຍ, ຊັ້ນຮ້ອຍຕີ 2 ສະຫາຍ ລວມເງິນທັງໝົດຈໍານວນ 1.268.274.684 ກີບ.
ໂອກາດນີ້, ສະຫາຍ ພັນໂທ ບຸນເດີມ ດວງຈຳປາ ຄະນະພັກກອງພົນ ຮອງຫົວໜ້າຫ້ອງການເມືອງກອງພົນທີ 2 ໄດ້ມີຄໍາຄິດຄໍາເຫັນໂອ້ລົມ ຕໍ່ບັນດາສະຫາຍທີ່ອອກການ ຮັບເງິນອຸດໜູນເທື່ອດຽວ ກ່ອນອື່ນສະຫາຍໄດ້ຍົກໃຫ້ເຫັນເຖິງຄຸນງາມຄວາມດີຂອງບັນດາສະຫາຍ ຕະຫລອດໄລຍະເວລາທີ່ເຄື່ອນໄຫວເຮັດການປະຕິວັດໃນໄລຍະຜ່ານມາ. ພ້ອມທັງຮຽກຮ້ອງໃຫ້ແຕ່ລະສະຫາຍສືບຕໍ່ປະກອບສ່ວນເຮັດວຽກງານປ້ອງກັນຊາດ ປ້ອງກັນຄວາມສະຫງົບຢູ່ທ້ອງຖິ່ນຂອງຕົນ, ຮັກສາມູນເຊື້ອອັນດີງາມຂອງການປະຕິວັດ, ນໍາເອົາເງິນອຸດໜຸນທີ່ໄດ້ຮັບໄປໝູນໃຊ້ໃນຄອບຄົວຢ່າງຖືກຕ້ອງ ແລະ ເກີດຜົນປະໂຫຍດສູງສຸດ.
ໂດຍ: ສຸວັນໂນ ທະລັງສີ
