ສະຫາຍ ຮຸ່ງເພັດ ຈັນທະວົງ ຄະນະພັກ ຮອງປະທານກວດກາພັກ ຮອງເລຂາຄະນະພັກ ຮອງອະທິການບໍດີມະຫາວິທະຍາໄລແຫ່ງຊາດ (ມຊ) ໄດ້ກ່າວວ່າ: ຂ້າພະເຈົ້າມີຄວາມປິຕິຊົມຊື່ນທີ່ໄດ້ມີໂອກາດສະແດງຄວາມຮູ້ສຶກເນື່ອງໃນໂອກາດວັນສ້າງຕັ້ງພັກປະຊາຊົນ ປະຕິວັດລາວ ທີ່ໄດ້ໝູນວຽນມາຄົບຮອບ 68 ປີ (22/3/1955-22/3/2023) ຊຶ່ງວັນສ້າງຕັ້ງພັກປະຊາຊົນ ປະຕິວັດລາວ ເປັນວັນແຫ່ງຄວາມເອກອ້າງທະນົງໃຈ, ຂອງປະຊາຊົນບັນດາເຜົ່າ, ນັບແຕ່ມື້ສ້າງຕັ້ງເປັນຕົ້ນມາພັກໄດ້ເປັນແກນຫຼັກໃນການນໍາພາໃນທຸກຂົງເຂດວຽກງານໂດຍມີເປົ້າໝາຍເພື່ອຄວາມຢູ່ເຢັນເປັນສຸກຂອງປວງຊົນລາວທັງຊາດ,ພັກຄືອົງການຈັດຕັ້ງແຫ່ງແສງສະຫວ່າງເຍືອງທາງໃນການຂັບເຄື່ອນນະໂຍບາຍທີ່ເປັນຜົນປະໂຫຍດຕໍ່ປະຊາຊົນ, ເພື່ອປະຊາຊົນ ໂດຍຢ່າງແທ້ຈິງ ຊຶ່ງຍາມໃດພັກກໍໄດ້ໃກ້ຊິດ-ຕິດແທດ ແລະ ກິ້ງເກືອກລີເລືອນໍາຄວາມສຸກ-ທຸກຂອງປະຊາຊົນ, ນໍາພາປະຊາຊົນສູ້ຊົນເດີນຕາມເສັ້ນທາງແຫ່ງການພັດທະນາມຸ່ງໜ້າໄປສູ່ຄວາມຈະເລີນ, ສີວິໄລ ແນໃສ່ເຮັດໃຫ້ການດໍາລົງຊີວິດຂອງປະຊາຊົນດີຂຶ້ນເທື່ອລະກ້າວ.
ສະຫາຍ ຮຸ່ງເພັດ ຈັນທະວົງ ກ່າວຕື່ມວ່າ: ນັບແຕ່ມີພັກນໍາພາ ຕະຫຼອດໄລຍະ 68 ປີຜ່ານມາ, ເຫັນໄດ້ວ່າພັກໄດ້ມີບາດກ້າວອັນສໍາຄັນໃນການນໍາພາປະເທດຊາດຫຼຸດພົ້ນອອກຈາກແອກປົກຄອງຂອງພວກຈັກກະພັດ ຜູ້ຮຸກຮານ ຊຶ່ງໄລຍະຕົ້ນທີ່ມີພັກນໍາພາ, ພັກໄດ້ນໍາພາປະຊາຊົນບັນດາເຜົ່າເຄື່ອນໄຫວຕໍ່ຕ້ານຈັກກະພັດຜູ້ຮຸກຮານໃນທຸກຮູບແບບຈົນເຮັດໃຫ້ປະຊາຊົນມີສິດເສລີພາບ, ປະເທດຊາດໄດ້ຮັບການປົດປ່ອຍຢ່າງສົມບູນ ສະຖາປານາ ສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນໃນວັນທີ 2 ທັນວາ 1975. ນັບແຕ່ປະເທດຊາດໄດ້ຮັບການປົດປ່ອຍເປັນຕົ້ນມາພັກໄດ້ສືບຕໍ່ນໍາພາປວງຊົນລາວທັງຊາດເດີນໜ້າສ້າງສາພັດທະນາປະເທດຊາດໃຕ້ຄັນທຸງອັນສະຫຼາດສ່ອງໄສຂອງພັກຕາມແຕ່ລະໄລຍະເປັນກ້າວໆມາ ຊຶ່ງໄດ້ປະກົດໃຫ້ເຫັນຢ່າງຈະແຈ້ງໃນຫຼາຍໆດ້ານເຊັ່ນ: ການກໍ່ສ້າງ ແລະ ປັບປຸງຖະຫນົນຫົນທາງ ຈາກສູນກາງໄປສູ່ເຂດຊົນນະບົດຫ່າງໄກສອກຫຼີກ ເພື່ອອໍານວຍຄວາມສະດວກໃນການສັນຈອນໃຫ້ແກ່ປະຊາຊົນ, ພັດທະນາໂຄງລ່າງພື້ນຖານອັນສໍາຄັນ ແລະ ຈໍາເປັນ ເປັນຕົ້ນແມ່ນວຽກງານຂະຫຍາຍຕາໜ່າງການສຶກສາອອກໄປສູ່ເຂດຫ່າງໄກໃຫ້ລູກຫຼານປະຊາຊົນບັນດາເຜົ່າໄດ້ມີໂອກາດເຂົ້າສຶກສາຮໍ່າຮຽນ,ດ້ານວຽກງານສາທາລະນະສຸກກໍເປັນວຽກງານສໍາຄັນທີ່ພັກໄດ້ເອົາໃຈໃສ່ ແລະ ເປັນຫ່ວງຕໍ່ບັນຫາສຸຂະພາບຂອງປະຊາຊົນບັນດາເຜົ່າ, ໂດຍໄດ້ລົງທຶນສ້າງໂຮງໝໍ, ສຸກສາລາອອກສູ່ເຂດຊົນນະບົດ ຫ່າງໄກສອກຫຼີກ ເພື່ອບັນເທົາບັນຫາສຸຂະພາບຂອງປະຊາຊົນ, ດ້ານວຽກງານກະສິກໍາ ພັກໄດ້ມີນະໂຍຍາຍໃນການສົ່ງເສີມໃຫ້ປະຊາຊົນທໍາການຜະລິດກຸ້ມໂຕເອງ, ເພິ່ງໂຕເອງ, ສ້າງພື້ນຖານເສດຖະກິດແບບພໍພຽງແລະ ຂະຫຍາຍເປັນສິນຄ້າຕາມເງື່ອນໄຂ ແລະ ກໍາລັງແຮງຂອງບຸກຄົນ ແລະ ຫົວໜ່ວຍທຸລະກິດ, ພ້ອມດຽວກັນພັກຍັງໄດ້ມີນະໂຍບາຍເປີດກວ້າງການຮ່ວມມືກັບບັນດາປະເທດໃນພາກພື້ນ ແລະ ສາກົນ ເພື່ອສ້າງເງື່ອນໄຂສະດວກໃນການນໍາເອົາເຕັກໂນໂລຊີໃໝ່ໆທີ່ທັນສະໄໝເຂົ້າມາໝູນໃຊ້ຢູ່ພາຍໃນປະເທດ, ລວມທັງສ້າງເງື່ອນໄຂໃນການສ້າງບຸກຄະລາກອນໃນທຸກຂະແໜງການໃຫ້ມີຄວາມຮູ້-ຄວາມສາມາດດ້ານຕ່າງໆເພື່ອພັດທະນາປະເທດຊາດ, ເຮັດໃຫ້ປະເທດຊາດໄດ້ຮັບການພັດທະນາຢ່າງຕໍ່ເນື່ອງ ຊຶ່ງເຫັນໄດ້ວ່າທຸກວຽກງານໄດ້ມີການເຕີບໃຫຍ່-ຂະຫຍາຍຕົວ, ເຮັດໃຫ້ຊີວິດການເປັນຢູ່ຂອງປະຊາຊົນບັນດາເຜົ່າດີຂຶ້ນເທື່ອລະກ້າວ, ຫຼາຍຄອບຄົວ, ຫຼາຍບ້ານໄດ້ຫຼຸດພົ້ນຈາກຄວາມທຸກຍາກ ຊຶ່ງເປັນໄປຕາມນະໂຍບາຍຂອງພັກໃນການລຶບລ້າງຄວາມທຸກຍາກຂອງປະຊາຊົນໃຫ້ນັບມື້ຫຼຸດໜ້ອຍຖອຍລົງ ເພື່ອເດີນໜ້າໄປສູ່ການຫຼຸດພົ້ນຈາກຄວາມດ້ວຍພັດທະນາຢ່າງແທ້ຈິງ.
ສະຫາຍໃຫ້ຮູ້ຕື່ມວ່າ: ສໍາລັບມະຫາວິທະຍາໄລແຫ່ງຊາດໃນຖານະເປັນສະຖາບັນການສຶກສາລະດັບສູງແຫ່ງທໍາອິດ ຂອງ ສປປ ລາວ ທີ່ໄດ້ຮັບການສ້າງຕັ້ງຂຶ້ນ ມາຮອດປັດຈຸບັນກໍມີອາຍຸເກືອບ 27 ປີ, ໂດຍອີງໃສ່ນະໂຍບາຍຂອງພັກ ກໍຄື ການຊີ້ນໍາຂອງຄະນະພັກ, ຄະນະນໍາກະຊວງສຶກສາທິການ ແລະ ກິລາ, ຄະນະພັກ, ຄະນະນໍາ ມ.ຊ ໄດ້ຊີ້ນໍາໆພາພັດທະນາ ມ.ຊ ໃຫ້ເຕີບໃຫຍ່ຂະຫຍາຍຕົວຮອບດ້ານ, ພາຍໃຕ້ວິໄສທັດ ແລະ ພາລະບົດບາດຄື: “ສ້າງ ມ.ຊ ໃຫ້ກາຍເປັນ ມະຫາວິທະຍາໄລນໍາໜ້າ ຂອງ ສປປ ລາວ, ເປັນໃຈກາງດ້ານການສຶກສາ, ວັດທະນະທໍາ ແລະ ການຄົ້ນຄວ້າວິທະຍາສາດ ທີ່ມີຄຸນນະພາບສູງ ເພື່ອພັດທະນາຊັບພະຍາກອນມະນຸດ ທີ່ມີຄຸນນະພາບ, ຕອບສະໜອງຄວາມຮຽກຮ້ອງຕ້ອງການຂອງການພັດທະນາເສດຖະກິດ-ສັງຄົມຂອງຊາດ ແລະ ການເຊື່ອມໂຍງເຂົ້າກັບພາກພື້ນ ແລະສາກົນ ໂດຍສະເພາະແມ່ນການພັດທະນາໂຄງລ່າງພື້ນຖານເພື່ອຮອງຮັບການຮຽນ-ການສອນ, ການຄົ້ນຄວ້າ ແລະ ພັດທະນາຫຼັກສູດການຮຽນ-ການສອນ ໃນສາຂາວິຊາຕ່າງໆ, ການພັດທະນາ-ຍົກລະດັບຄວາມຮູ້-ຄວາມສາມາດຂອງພະນັກງານ, ຄູ-ອາຈານ, ການຄົ້ນຄວ້າວິທະຍາສາດ, ການເປີດກວ້າງການຮ່ວມມືດ້ານວິຊາການກັບ ບັນດາສະຖາບັນການສຶກສາຢູ່ພາຍໃນ ແລະ ຕ່າງປະເທດ ນັບມື້ກວ້າງຂວາງຍິ່ງຂຶ້ນ, ມາຮອດປັດຈຸບັນ ມ.ຊ ໄດ້ເຕີບໃຫຍ່-ຂະຫຍາຍຕົວໃນທຸກດ້ານ ຊຶ່ງປະກອບມີ 11 ຫ້ອງການ, 13 ຄະນະວິຊາ, 2 ສະຖາບັນ, 6 ສູນ, 1 ຫໍສະໝຸດກາງ, ມີໂຮງໝໍ ແລະ ໂຮງຮຽນພອນສະຫວັນ ແລະ ຊົນເຜົ່າກຽມມະຫາວິທະຍາໄລ, ມີພະນັກງານ, ຄູ-ອາຈານ ທັງໝົດ 1.700 ກວ່າຄົນ, ມີນັກສຶກສາ 20 ພັນກວ່າຄົນ, ດ້ານວຸດທິການສຶກສາ ປະລິນຍາເອກ 204 ທ່ານ, ປະລິນຍາໂທ 956 ທ່ານ, ປະລິນຍາຕີ 499 ທ່ານ ແລະ ອະນຸປະລິນຍາ 45 ທ່ານ, ໃນນັ້ນ ພະນັກງານ, ຄູ-ອາຈານ ທີ່ໄດ້ຮັບນາມມະຍົດ ຂັ້ນສາດສະດາຈານ 5 ທ່ານ, ຂັ້ນຮອງສາດສະດາຈານ 87 ທ່ານ, ອາຈານ 310 ທ່ານ ແລະ ຜູ້ຊ່ວຍອາຈານ 184 ທ່ານ ຊຶ່ງທັງໝົດ ທີ່ກ່າວມານັ້ນ, ລ້ວນແຕ່ແມ່ນຜົນງານ, ຜົນສໍາເລັດຂອງ ມ.ຊ ຊຶ່ງມີ 17 ຮາກຖານພັກ ທີ່ຂຶ້ນກັບອົງຄະນະພັກ ມ.ຊ ຄຸ້ມຄອງ-ນໍາພາ.
ເນື່ອງໃນໂອກາດ ວັນສ້າງຕັ້ງພັກ ປະຊາຊົນ ປະຕິວັດລາວ ໄດ້ໝູນວຽນມາຄົບຮອບ 68 ປີນີ້, ຂ້າພະເຈົ້າໃນນາມຕາງໜ້າຄະນະພັກ, ຄະນະນໍາ ມ.ຊ ຂໍອວຍພອນໃຫ້ການນໍາພັກ-ລັດ ຈົ່ງມີສຸຂະພາບແຂງແຮງ, ມີພະລານາໄມສົມບູນ, ເປັນຮົ່ມໂພຮົ່ມໄຊ ໃຫ້ແກ່ປວງຊົນລາວທຸກຊົນເຜົ່າ, ນໍາພາປະເທດຊາດກ້າວໄປສູ່ຄວາມຈະເລີນຮຸ່ງເຮືອງຢ່າງບໍ່ຢຸດຢັ້ງ.
ໂດຍ: ສຳນານ ພົມພັກດີ
