ວັນທີ 6 ກຸມພາ 2023 ທີ່ແຂວງຫຼວງພະບາງ ກະຊວງສາທາລະນະສຸກ ຮ່ວມກັບອົງການອະນາໄມໂລກ ໄດ້ເປີດກອງປະຊຸມທົບທວນຄືນການຈັດຕັ້ງປະຕິບັດແຜນງານແຫ່ງຊາດ ວ່າດ້ວຍຄວາມໝັ້ນຄົງດ້ານສຸຂະພາບ 2022-2025, ການລາຍງານປະຈຳປີຂອງປະເທດລັດທິພາຄີ (eSPAR) ແລະ ການປະກອບຄຳເຫັນໃສ່ຮ່າງແຜນປະຕິບັດງານຄວາມໝັ້ນຄົງດ້ານສຸຂະພາບສອງພາກພື້ນອາຊີປາຊີຟິກສະບັບໃໝ່ ໃຫ້ກຽດເປັນປະທານໂດຍ ທ່ານ ປອ ດຣ. ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ແລະ Dr. Ying Ru Lo ຕາງໜ້າອົງການອະນາໄມໂລກ ປະຈຳ ສປປລາວ ເປັນປະທານຮ່ວມ, ມີຄະນະກົມ, ຫົວໜ້າສູນອ້ອມຂ້າງກະຊວງສາທາລະນະສຸກ, ຫົວໜ້າຄະນະອຳນວຍການໂຮງໝໍສູນກາງ, ຕາງໜ້າຈາກບັນດາກະຊວງ, ບັນດາຄຸ່ຮ່ວມພັດທະນາ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ ຊື່ງກອງປະຊຸມໃນຄັ້ງນີ້ຈະດຳເນີນໄປເປັນເວລາ 3 ວັນ ໃນລະຫວ່າງວັນທີ 6-8 ມີນາ 2023.
ຈຸດປະສົງກອງປະຊຸມໃນຄັ້ງນີ້ເພື່ອຖອດຖອນບົດຮຽນ ພ້ອມທັງຕີລາຄາຈຸດດີອັນພົ້ນເດັ່ນ ແລະ ຍົກໃຫ້ເຫັນສິ່ງທີ່ເປັນຂໍ້ຄົງຄ້າງ ແລະ ສີ່ງທ້າທາຍໃນການຈັດຕັ້ງປະຕິບັດວຽກງານດັ່ງກ່າວໃນໄລຍະຜ່ານມາ ເພື່ອຈະຊອກຫາວິທີປັບປຸງ, ແກ້ໄຂໃນຕໍ່ໜ້າ ກໍ່ຄືການສ້າງແຜນຮອງຮັບກັບສະພາບການເກີດພະຍາດຕິດຕໍ່ຢ່າງຖືກຕ້ອງ ແລະ ເໝາະສົມກັບສະພາບການຕົວຈິງ ໂດຍການຫັນເອົາບັນຫາ ຫຼື ວິກິດການທີ່ເກີດຂື້ນໃນໄລຍະຜ່ານມາເພື່ອເປັນບົດຮຽນໃນການປັບປຸງ, ພັດທະນາວຽກງານດັ່ງກ່າວ ໃຫ້ນັບມື້ເຂັ້ມແຂງເທື່ອລະກ້າວ.
ທ່ານ ປອ ດຣ. ບຸນແຝງ ພູມມະໄລສິດ ໄດ້ກ່າວຕໍ່ກອງປະຊຸມຕື່ມວ່າ: ໃນປະຫວັດສາດອັນຍາວນານພະຍາດຕິດຕໍ່ແມ່ນເປັນໄພຂົ່ມຂູ່ທາງດ້ານສາທາລະນະສຸກໃຫ້ກັບຫຼາຍປະເທດໃນທົ່ວໂລກ ແລະ ເປັນບັນຫາທີ່ມີຜົນກະທົບຕໍ່ສຸຂະພາບຂອງປະຊາກອນຊາວໂລກ ເປັນຕົ້ນມາແມ່ນ: ພະຍາດໄຂ້ຫວັດໃຫ່ຍ, ພະຍາດ SAR, MERS, EbolaHIV ແລະ ພະຍາດອື່ນໆ ດ້ວຍເຫດຜົນດັ່ງກ່າວນັ້ນອົງການອະນາໄມໂລກໄດ້ສົມທົບກັບຫຼາຍພາກສ່ວນທີ່ກ່ຽວຂ້ອງພັດທະນາກົດລະບຽບສາກົນດ້ານສາທາລະນະສຸກ (IHR) ຂື້ນມາເພື່ອເປັນເຄື່ອງມືໃນການສະກັດກັ້ນ ແລະ ຄວບຄຸມພະຍາດຕິດຕໍ່ ແຕ່ເນື່ອງຈາກສະພາບແວດລ້ອມ ແລະ ສະພາບດິນຟ້າອາກາດມີການປ່ຽນແປງຕະຫຼອດເວລານັ້ນໄດ້ສົ່ງຜົນໃຫ້ພະຍາດຕິດຕໍ່ມີການປັບປ່ຽນ ແລະ ພັດທະນາໂຕເອງຢ່າງບໍ່ຢຸດຢັ້ງ ດັ່ງນັ້ນໃນປີ 2005 ຈຶ່ງໄດ້ມີການປັບປຸງກົດລະບຽບສາກົນດ້ານສາທາລະນະສຸກ ເພື່ອໃຫ້ແທດເໝາະກັບສະພາບຄວາມເປັນຈິງທີ່ມີການປ່ຽນແປງ ຊຶ່ງກົດລະບຽບສາກົນດ້ານສາທາລະນະສຸກ ສະບັບປັບປຸງໄດ້ກໍານົດໄວ້ວ່າ: “ ການປ້ອງກັນທີ່ດີທີ່ສຸດເພື່ອບໍ່ໃຫ້ການລະບາດຂອງພະຍາດຕິດຕໍ່ແຜ່ລາມໄປທົ່ວໂລກແມ່ນຕ້ອງຊອກຄົ້ນຫາພະຍາດແຕ່ຫົວທີ ແລະ ຈັດຕັ້ງປະຕິບັດບັນດາມາດຕະການຄວບຄຸມຢ່າງມີປະສິດທິພາບ ແລະ ປະສິດທິຜົນ ໂດຍເລີ່ມປະຕິບັດແຕ່ເວລາທີ່ບັນຫາຍັງນ້ອຍ ແລະ ເກີດຂື້ນຢູ່ທ້ອງຖິ່ນໃດໜື່ງຢ່າງຕັ້ງໜ້າ”.
ສໍາລັບ ສປປ ລາວ ວຽກງານກັນ ແລະ ຄວບຄຸມພະຍາດຕິດຕໍ່ ກໍຄືສະກັດກັ້ນ ແລະ ຄວບຄຸມການລະບາດຂອງພະຍາດ COVID-19 ໃນໄລຍະຜ່ານມາແມ່ນໄດ້ມີການນໍາໃຊ້ກົດລະບຽບສາກົນ ດ້ານສາທາລະນະສຸກ (IHR) ສະບັບປັບປຸງປີ 2005, ຍຸດທະສາດອາຊີປາຊີຟີກ, ແຜນງານ 05 ປີ ລະດັບຊາດວ່າດ້ວຍຄວາມໝັ້ນຄົງດ້ານສຸຂະພາບ ແລະ ກົດໝາຍວ່າດ້ວຍການກັນ ແລະ ຄວບຄຸມພະຍາດຕິດຕໍ່ເຂົ້າໃນການຈັດຕັ້ງປະຕິບັດຕົວຈິງ ແຕ່ທັງໜົດເຫຼົ່ານັ້ນກໍຍັງບໍ່ພຽງພໍທີ່ຈະຮອງຮັບຕໍ່ເຫດການສຸກເສີນດ້ານສາທາລະນະສຸກດັ່ງກ່າວນັ້ນໄດ້ ເຊິ່ງຈາກປະສົບການ ແລະ ບົດຮຽນທີ່ຖອດຖອນໄດ້ໃນການໂຕ້ຕອບຕໍ່ການລະບາດຂອງພະຍາດ COVID-19 ໃນໄລຍະຜ່ານມານັ້ນ ຈຶ່ງມີຫຼາຍສີ່ງທີ່ສະທ້ອນໃຫ້ເຫັນໄດ້ເຖີງການຂາດຄວາມກຽມພ້ອມ ເພື່ອຮອງຮັບຕໍ່ເຫດການສຸກເສີນທາງດ້ານສາທາລະນະສຸກຂະໜາດໃຫຍ່ ດັ່ງນັ້ນ ເພື່ອເຮັດໃຫ້ລະບົບສາທາລະນະສຸກຂອງ ສປປລາວ ມີຄວາມກຽມພ້ອມຮອງຮັບຕໍ່ເຫດການສຸກເສີນດ້ານສາທາລະນະສຸກນັ້ນ ຕ້ອງໄດ້ມີການທົບທວນຄືນການຈັດຕັ້ງປະຕິບັດກົດລະບຽບສາກົນດ້ານສາທາລະນະສຸກ ແລະ ປັບປຸງແຜນງານໃນການຈັດຕັ້ງປະຕິບັດຢ່າງເປັນປົກກະຕິ ແລະ ຕໍ່ເນື່ອງ ເພື່ອເຮັດໃຫ້ສາມາດຊອກຫາຈຸດດີ ຂໍ້ຄົງຄ້າງ ແລະ ສີ່ງທ້າທາຍ ແລ້ວນໍາໄປປັບປຸງ, ແກ້ໄຂໃຫ້ດີຂື້ນໃນຕໍ່ໜ້າ.
