ກອງພົນທີ 5 ໄດ້ເປີດຊຸດອົບຮົມ-ຫັດແອບ, ປັບປຸງລະບຽບແບບແຜນ, ຝຶກຝົນກຳລັງແຮງກາຍປະຈຳປີ 2023 ຂຶ້ນ ຫວ່າງບໍ່ດົນມານີ້, ໂດຍການເປັນປະທານຂອງສະຫາຍ ພັນເອກ ຂັນທີ ສະໜາມອຸ່ນ ຫົວໜ້າການທະຫານ ກອງພົນທີ 5, ມີຄະນະພັກ-ຄະນະບັນຊາ, ພະນັກງານ-ນັກຮົບເຂົ້າຮ່ວມ. ສະຫາຍ ພັນໂທ ບຸນເຊີຍ ສີປະເສີດ ຮອງຫົວໜ້າຫ້ອງເສນາທິການ ກອງພົນທີ 5 ໄດ້ຂຶ້ນຜ່ານແຜນການອົບຮົມ-ຫັດແອບປະຈຳປີ ໂດຍປະຕິບັດຕາມຄຳສັ່ງຂອງກົມໃຫຍ່ເສນາທິການກອງທັບ ວ່າດ້ວຍການອົບຮົມ-ຫັດແອບການທະຫານ, ການເມືອງ, ພະລາທິການ ແລະ ເຕັກນິກທົ່ວກອງທັບ ປະຈຳປີ 2023, ອີງຕາມຄຳສັ່ງແນະນຳຂອງກົມອົບຮົມ ກົມໃຫຍ່ເສນາທິການກອງທັບວ່າດ້ວຍການອົບຮົມ-ຫັດແອບ, ປັບປຸງລະບຽບແບບແຜນ, ຝຶກຝົນກຳລັງແຮງກາຍປີ 2023, ອີງຕາມການກວດກາສະຫຼຸບຕີລາຄາຜົນໄດ້ຮັບໃນການຈັດຕັ້ງອົບຮົມ-ຫັດແອບ ປະຈຳປີ 2022 ຂອງກອງພົນທີ 5.
ໃນໄລຍະຜ່ານມາ, ເພື່ອຈັດຕັ້ງປະຕິບັດແຜນການອົບຮົມ-ຫັດແອບ, ປັບປຸງລະບຽບແບບແຜນ, ຝຶກຝົນກຳລັງແຮງກາຍປະຈຳປີ 2023 ຂອງກົມໃຫຍ່ເສນາທິການກອງທັບໃຫ້ໄດ້ຮັບຜົນດີ ແລະ ມີປະສິດທິຜົນສູງປະຕິບັດເນື້ອໃນ 4 ບຸກທະລຸຂອງສູນກາງພັກ ແລະ 4 ໜ້າທີ່ໃຫຍ່ 26 ແຜນງານຂອງຄະນະພັກກະຊວງວາງອອກ. ດັ່ງນັ້ນ, ຄະນະພັກ-ຄະນະບັນຊາກອງພົນທີ 5 ຈຶ່ງໄດ້ຈັດຕັ້ງການອົບຮົມ-ຫັດແອບ ເພື່ອຍົກສູງຄວາມຮູ້, ຄວາມສາມາດທາງດ້ານສິລະປະຍຸດ-ຍຸດທະວິທີ, ລະດັບວິຊາສະເພາະໃຫ້ນາຍ ແລະ ພົນ ທະຫານໃຫ້ມີຄວາມສາມາດທີ່ແນ່ນອນ, ມີພິກໄຫວທີ່ຄ່ອງແຄ້ວຢູ່ສະເໝີ, ຮັບປະກັນກຽມພ້ອມສູ້ຮົບ ແລະ ເຄື່ອນໄຫວສູ້ຮົບໃນທຸກເງື່ອນໄຂ, ສາມາດເຮັດສຳເລັດໜ້າທີ່ການເມືອງ ຂອງກົມກອງເພື່ອຊຸກຍູ້ໃຫ້ບັນດາກົມກອງຕັ້ງໜ້າປະຕິບັດຂໍ້ກຳນົດ, ກົດລະບຽບຢ່າງຕໍ່ເນື່ອງ ແລະ ເປັນປົກກະຕິ, ປັບປຸງຫັນເອົາກົມກອງກ້າວເຂົ້າສູ່ລະບຽບແບບແຜນ, ມີລະບຽບວິໄນເຂັ້ມງວດ ແລະ ມີແບບແຜນທັນສະໄໝ; ເພື່ອຝຶກຝົນໃຫ້ນາຍ ແລະ ພົນທະຫານມີສຸຂະພາບເຂັ້ມແຂງ, ອົດທົນແຂງແກ່ນ, ກຽມພ້ອມຜ່ານຜ່າອຸປະສັກຄວາມຫຍຸ້ງຍາກນານາປະການທີ່ຈະເກີດຂຶ້ນ ແລະ ເຮັດສຳເລັດໜ້າທີ່ໃນທຸກເງື່ອນໄຂ. ການອົບຮົມ-ຫັດແອບຈະໃຊ້ເວລາທັງໝົດ 185 ວັນຈຶ່ງຈະສຳເລັດໂດຍມີພາກການເມືອງ 15 ວັນ, ການທະຫານ 140 ວັນ, ພະລາທິການ 15 ວັນ ແລະ ພາກເຕັກນິກ 15 ວັນ.
ຂ່າວ: ທອງປານ ສີດາໄລ, ພາບ: ນາງ ຄໍາ ວົງມະນີ
