ໃນວັນທີ 6-9 ກຸມພາ 2023 ນີ້ ທ່ານ ເຍ່ຍເກີຢ່າ ໜໍ່ຈໍ່ຈົງຕົວ ຮອງປະທານສູນກາງແນວລາວສ້າງຊາດ ໄດ້ລົງຊຸກຍູ້ວຽກງານສົ່ງເສີມສຸຂະພາບທີ່ໂຮງຫມໍນ້ອຍ ບ້ານນາຄາວ ເມືອງວຽງໄຊ ແຂວງຫົວພັນ ທ່ານ ວີເຕັງ ຈື່ໄມເຕັງ ຮອງປະທານແນວລາວສ້າງຊາດແຂວງຫົວພັນ ກໍ່ໄດ້ຕິດຕາມ ແລະ ລົງເຮັດວຽກເຊັ່ນດຽວກັນ. ການມາເຮັດວຽກຄັ້ງນີ້ແມ່ນໄດ້ຮັບການສະຫນັບສະຫນູນດ້ານງົບປະມານ ແລະ ອຸປະກອນຈາກອົງການຢູນີເຊັບ.
ນາງ ຍອດ ໂຮມມີໄຊ ພະນັກງານແພດທີ່ໂຮງຫມໍນ້ອຍ ບ້ານນາຄາວ ໄດ້ລາຍງາຍໃຫ້ຮູ້ເຖິງສະພາບການເຄື່ອນໄຫວຂອງໂຮງຫມໍນ້ອຍ ຂໍ້ສະດວກ ແລະ ສິ່ງທ້າຍຕ່າງໆ ວ່າ: ເຖິງແມ່ນຈະປະສົບຄວາມຫຍຸ້ງຍາກໃນດ້ານງົບປະມານ, ອຸປະກອນທີ່ຈໍາເປັນລວມທັງການຮ່ວມມືຂອງປະຊາຊົນໃນການມາຮັບການບໍລິການດ້ານສຸຂະພາບ ໂດຍສະເພາະວຽກງານສັກຢາກັນພະຍາດ ລວມທັງວັກຊິນປ້ອງກັນພະຍາດໂຄວິດ-19 ແຕ່ພະນັກງານແພດໝໍ ກໍ່ໄດ້ເອົາໃຈໃສ່ບຸກບືນປຸກລະດົມປະຊາຊົນ ແລະ ອະທິ ບາຍໃຫ້ເຂົາເຈົ້າເຂົ້າໃຈການຮັບບໍລິການດ້ານສຸຂະພາບ.
ນອກຈາກນີ້ ທ່ານ ເຍ່ຍເກີຢ່າ ໜໍ່ຈໍ່ຈົງຕົວ ຍັງໄດ້ພົບກັບ ທ່ານ ຄົວລີ ກຳມະການແນວແຂວງ ປະຈຳບ້ານນາຄາວ ຊຶ່ງເປັນຜູ້ໄດ້ຮັບການນັບຖືຈາກຊຸມຊົນ ແລະ ໄດ້ຂໍໃຫ້ທ່ານຊ່ວຍປຸລະດົມການມີສ່ວນຮ່ວມຂອງຊຸມຊົນໃນວຽກງານດ້ານຕ່າງໆ ລວມທັງວຽກງານສາທາລະນະສຸກ, ສຶກສາ, ການປົກປ້ອງແມ່ຍິງ ແລະ ເດັກ.
ທ່ານ ເຍ່ຍເກີຢ່າ ໜໍ່ຈໍ່ຈົງຕົວ ຍັງໄດ້ພົບປະກັບພະນັກງານແນວລາວສ້າງຊາດ ເມືອງວຽງໄຊ ແລະ ໄດ້ຊົມເຊີຍຜົນສຳເລັດຂອງການໂຄສະນາວຽກງານການປ້ອງກັນ ແລະ ຄວບຄຸມພະຍາດໂຄວິດ-19 ແລະ ການໂຄສະນາປັບປຸງຊິວິດການເປັນຢູ່ຂອງແມ່ຍິງ ແລະ ເດັກ ໂດຍສະເພາະການສື່ສານຄວາມສ່ຽງ ແລະ ການມີສ່ວນຮ່ວມຂອງຊຸມຊົນ. ເຖິງຈະປະສົບຄວາມຫຍຸ້ງຍາກດ້ານງົບປະມານ, ອຸປະກອນ ແລະ ພາຫະນະ ທ່ານຮຽກຮ້ອງໃຫ້ບຸກບືນສືບຕໍ່ຊີ້ນໍາໂຄສະນາວຽກງານປັບປຸງຊີວີດການເປັນຢູ່ຂອງແມ່ຍິງ ແລະ ເດັກ.
