ສຳນັກຂ່າວຊິນຮວາ ຂອງ ສປຈີນ, ວັນທີ 1 ກຸມພາ ເຈົ້ານະຄອນໂຕກຽວ ຂອງຍີ່ປຸ່ນ ເປີດເຜີຍແຜນການຫລຸດຈຳນວນຜູ້ເສຍຊີວິດຖ້າຫາກເກີດແຜ່ນດິນໄຫວຄັ້ງໃຫຍ່ໂດຍກົງໃນນະຄອນຫລວງໂຕກຽວ ໃຫ້ຫລຸດລົງປະມານເຄິ່ງໜຶ່ງ. ໂຄງຮ່າງ ແຜນການປະຕິບັດງານປ້ອງກັນໄພພິບັດລະດັບພາກພື້ນ ຂອງນະຄອນຫລວງໂຕກຽວ ສະບັບປັບປຸງລະບຸວ່າ: ປັດຈຸບັນຕົວເລກຄາດການຜູ້ເສຍຊີວິດປະມານ 6.100 ຄົນ. ດັ່ງນັ້ນເຈົ້ານະຄອນໂຕກຽວ ໄດ້ຕັ້ງເປົ້າໝາຍໃໝ່ໃນສົກປີງົບປະມານ 2030. ນອກນັ້ນໂຄງຮ່າງແຜນການດັ່ງກ່າວ ຍັງຄວບຄຸມເຖິງມາດຕະການຕ່າງໆ ເພື່ອຍົກລະດັບການປ້ອງກັນໄພພິບັດ ເຊັ່ນ: ການຊຸກຍູ້ກຳລັງຄວາມຕ້ານທານແຜ່ນດິນໄຫວ ຂອງສິ່ງປຸກສ້າງໄວ້ລ່ວງໜ້າ ແລະ ການນຳໃຊ້ວັດຖຸທີ່ບໍ່ຕິດໄຟງ່າຍໃນການກໍ່ສ້າງເພີ່ມຂຶ້ນ.
