ງານປະກອວດ ນາງສາວທ່ອງທ່ຽວລາວ ໄດ້ຈັດຂື້ນເປັນຄັ້ງທຳອິດ, ເປັນໜຶ່ງໃນກິດຈະ ກຳ ໃນເທສະການດອກງິ້ວບານ ຄັ້ງທີ 20 ປະຈຳປີ 2023 ຢູ່ເຂດເສດຖະກິດພິເສດ ສາມຫລ່ຽມຄຳ ເມືອງຕົ້ນເຜິ່ງ ແຂວງບໍ່ແກ້ວ ຈັດຂຶ້ນລະຫວ່າງວັນທີ 26-29 ມັງກອນ ເຊິ່ງການຄັດເລືອກນາງສາວດັ່ງກ່າວໃຊ້ເວລາ 3 ວັນ ໂດຍເປີດຮັບສະໝັກນ້ອງນາງສາວຈາກທົ່ວປະເທດ, ຜ່ານການໂວດ ແລະ ການໃຫ້ຄະແນນຈາກກຳມະການສາມາດຄັດເລືອກໄດ້ 20 ນ້ອງນາງສາວ ທີ່ມາຈາກນະຄອນຫລວງວຽງຈັນ ແລະ 11 ແຂວງ.
ໃນວັນທີ 29 ມັງກອນ 2023 ເປັນມື້ຕັດສິນ, ຜ່ານການຕັດສິນ ແລະ ຕອບຄຳຖາມຂອງແຕ່ລະໝາຍເລກ ທີ່ສາມາດເອົາຊະນະໃຈກຳມະການ ແລະ ໄດ້ຕຳແໜ່ງນາງສາວທ່ອງທ່ຽວລາວ ປະຈຳປີ 2023 ຄົນທຳອິດໃນ ສປປ ລາວ ແມ່ນໝາຍເລກ MT8 ນາງ ອິນທິລາ ຄຸນພະຈັນສີ ຈາກແຂວງອຸດົມໄຊ ໄດ້ຮັບມົງກຸດ ພ້ອມສາຍສະພາຍ ແລະ ເງິນລາງວັນ 150 ລ້ານກີບ, ອັນດັບທີ 2 ໝາຍເລກ MT 13 ນາງ ອັກສອນສະຫວັນ ອິນທະລັງສີ ຈາກນະຄອນຫລວງວຽງຈັນ ໄດ້ຮັບມົງກຸດ ພ້ອມສາຍສະ ພາຍ ແລະ ເງິນລາງວັນ 100 ລ້ານກີບ ແລະ ອັນດັບທີ 3 ໝາຍເລກ MT6 ນາງ ດາວັນ ແກ້ວສຸບັນ ຈາກແຂວງບໍ່ແກ້ວ ໄດ້ຮັບມົງກຸດ, ພ້ອມສາຍສະພາຍ ແລະ ເງິນລາງວັນ 50 ລ້ານກີບ. ສ່ວນ 17 ໝາຍເລກທີ່ຕົກຮອບແມ່ນໄດ້ຮັບລາງວັນຊົມເຊີຍຄົນລະ 10 ລ້ານກີບ.
ເປັນກຽດເຂົ້າຮ່ວມ ແລະ ມອບລາງວັນໂດຍ ທ່ານ ສົມສະຫວາດ ເລັ່ງສະຫວັດ ອະດີດກຳມະ ການກົມການເມືອງສູນກາງພັກ, ອະດີດຮອງນາຍົກລັດຖະມົນຕີ ພ້ອມດ້ວຍພັນລະຍາ, ທ່ານ ບົວຄົງ ນາມມະວົງ ເຈົ້າແຂວງບໍ່ແກ້ວ ພ້ອມດ້ວຍພັນລະຍາ, ທ່ານ ຈ້າວ ເຫວີຍ ປະທານສະພາບໍລິຫານເຂດເສດຖະກິດພິເສດ ສາມຫລ່ຽມຄຳ, ມີການນຳຂັ້ນສູງຈາກສູນກາງ, ທ້ອງຖິ່ນ ແລະ ມ່ວນຊົນເຂົ້າຮ່ວມຢ່າງຫລວງຫລາຍ.
ຂ່າວ-ພາບ: ສຸກສະຫວັດ
