ງານເທດສະການດອກງິ້ວບານ ຄັ້ງທີ XX ປະຈໍາປີ 2023 ໄດ້ເປີດຂຶ້ນຢ່າງເປັນທາງການໃນວັນທີ 27 ມັງກອນນີ້ ທີ່ເຂດເສດຖະກິດພິເສດ ສາມຫຼ່ຽມຄໍາ ໂດຍເປັນກຽດເຂົ້າຮ່ວມຂອງທ່ານ ບຸນທອງ ຈິດມະນີ ຮອງປະທານປະເທດແຫ່ງ ສປປ ລາວ, ທ່ານ ພົອ ວິໄລ ຫຼ້າຄໍາຟອງ ຮອງນາຍົກລັດຖະມົນຕີ ລັດຖະມົນຕີ ກະຊວງປ້ອງກັນຄວາມສະຫົງບ, ທ່ານ ຈ້າວ ເຫວີຍ ປະທານສະພາບໍລິຫານ ເຂດເສດຖະກິດພິເສດສາມຫຼ່ຽມຄໍາ ປະທານກຸ່ມບໍລິສັດ ດອກງິ້ວຄໍາ ຈຳກັດ ມີບັນດາການນໍາພັກ-ລັດ ຈາກສູນກາງ ແລະ ແຂກ ຈາກ ສປ ຈີນ, ສສ ຫວຽດນາມ, ຣາຊະນາຈັກໄທ, ສສ ມຽນມາ, ນັກທຸລະກິດ, ປະຊາຊົນຊາວແຂວງບໍ່ແກ້ວ ແລະ ມວນຊົນຜູ້ເຂົ້າຮ່ວມ.
ທ່ານ ຄໍາຜະຫຍາ ພົມປັນຍາ ຮອງເຈົ້າແຂວງບໍ່ແກ້ວ ຫົວໜ້າຄະນະຮັບຜິດຊອບການກະກຽມຈັດງານເທດສະການດອກງິ້ວບານໄດ້ກ່າວວ່າ: ຈຸດປະສົງສໍາຄັນຂອງການຈັດງານຄັ້ງນີ້ ເພື່ອແນໃສ່ເປັນການອະນຸລັກຮັກສາ ແລະ ເສີມຂະຫຍາຍສີລະປະ, ວັດທະນະທໍາ, ການນຸ່ງຖື, ແບບແຜນວິຖີຊີວິດ ກໍຄືຮີດຄອງປະເພນີອັນດີງາມ ຂອງປະຊາຊົນບັນດາເຜົ່າ ພາຍໃນແຂວງບໍ່ແກ້ວ ລວມທັງການເຊື່ອມໂຍງເຂົ້າກັບວັດທະນະທໍາ-ອາລິຍະທໍາອັນດີງາມຂອງຊາດ, ເພື່ອໃຫ້ບັນດານັກທ່ອງທ່ຽວໄດ້ທ່ຽວຊົມ ແລະ ສໍາຜັດກັບຄວາມສວຍສົດງົດງາມທີ່ເປັນເອກະລັກພິເສດຂອງຕົ້ນງິ້ວ ກໍຄືດອກງິ້ວກໍາລັງເບັ່ງບານ ທີ່ເຕັມໄປດ້ວຍຄຸນຄ່າທາງດ້ານຊັບພະຍາກອນທໍາມະຊາດອັນອຸດົມສົມບູນ ແລະ ພ້ອມກັນປົກປັກຮັກສາ ແລະ ເປັນການຊຸກຍູ້, ສົ່ງເສີມ, ພັດທະນາ ແລະ ຟື້ນຟູວຽກງານການທ່ອງທ່ຽວທາງທຳມະຊາດ, ປະຫວັດສາດ, ວັດທະນາທໍາ, ຮີດຄອງປະເພນີ, ວິຖີຊີວິດຂອງຊາວແຂວງບໍ່ແກ້ວແບບມີສ່ວນຮ່ວມຂອງຊຸມຊົນ ຕາມຄໍາຂວັນທີ່ວ່າ: “ປະເທດລາວສວຍງາມ” ສ້າງໃຫ້ການທ່ອງທ່ຽວລາວ ເມືອງລາວ, ຮຽນຮູ້ປະຫວັດສາດລາວ, ຊື່ນຊົມທຳມະຊາດ ແລະ ສົ່ງເສີມວັດທະນະທຳ ໃຫ້ມີຄວາມຍືນຍົງ ຕິດພັນກັບການສົ່ງເສີມການຜະລິດ, ການຄ້າ ແລະ ການບໍລິການໃຫ້ມີການຂະຫຍາຍຕົວ, ປະກອບສ່ວນເຮັດໃຫ້ເສດຖະກິດຂອງແຂວງ ແລະ ຂອງຊາດ ໃຫ້ມີບາດກ້າວຂະຫຍາຍຕົວ, ທັງເປັນການສ້າງວຽກເຮັດງານທໍາ, ສ້າງລາຍຮັບ ແລະ ແກ້ໄຂຊີວິດການເປັນຢູ່ຂອງປະຊາຊົນບັນດາເຜົ່າໃຫ້ນັບມື້ດີຂຶ້ນ.
ພາຍຫຼັງສະພາບການແຜ່ລະບາດຂອງພະຍາດ ໂຄວິດ-19 ໄດ້ມີການຜ່ອນຜັນ ແລະ ແນໃສ່ສ້າງຂະບວນການຮອບດ້ານ ເພື່ອຂໍ່ານັບຮັບຕ້ອນວັນບຸນສໍາຄັນຂອງພັກ, ຂອງຊາດ ແລະ ຂອງທ້ອງຖິ່ນ ໂດຍສະເພາະແມ່ນການສະເຫຼີມສະຫຼອງວັນສ້າງຕັ້ງແຂວງບໍ່ແກ້ວ ຄົບຮອບ 40 ປີ, ວັນສ້າງຕັ້ງເຂດເສດຖະກິດພິເສດສາມຫຼ່ຽມຄໍາ ຄົບຮອບ 16 ປີ ແລະ ເພື່ອປະກອບສ່ວນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງຊາດ, ຂອງແຂວງ, ເຂດເສດຖະກິດພິເສດສາມຫຼ່ຽມຄໍາ ແລະ ຂະແໜງການຕ່າງໆ ໂດຍສະເພາະແມ່ນວຽກງານທ່ອງທ່ຽວ, ການຈັດຕັ້ງຜັນຂະຫຍາຍວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ. ເພື່ອເຮັດໃຫ້ສັງຄົມທັງພາຍໃນ ໄດ້ຮັບຮູ້ຕໍ່ກັບຜົນສໍາເລັດ ໃນການສ້າງສາພັດທະນາເຂດເສດຖະກິດພິເສດ ຢູ່ ສປປ ລາວ ເວົ້າລວມ, ເວົ້າສະເພາະແມ່ນເຂດເສດຖະກິດພິເສດ ສາມຫຼ່ຽມຄໍາ ທີ່ມີທ່ວງທ່າອັນກ້າວໜ້າຂຶ້ນຢ່າງແຂງແຮງ ແລະ ໂດດເດັ່ນ.
ຂ່າວ-ພາບ: ບຸນອູ້ມ
