ກະຊວງແຮງງານ ແລະ ສະຫວັດດີການ-ສັງຄົມ (ຮສສ) ເອົາໃຈໃສ່ພັດທະນາກຳລັງແຮງງານໃຫ້ມີຄຸນນະພາບ, ມີວຽກເຮັດທີ່ໝັ້ນຄົງ ແລະ ມີລາຍໄດ້ທີ່ສົມເຫດສົມຜົນ, ພັດທະນາລະບົບປົກປ້ອງສັງຄົມ ແລະ ໃຫ້ ການຊ່ວຍເຫຼືອດ້ານມະນຸດສະທຳຢ່າງທົ່ວເຖິງ.
ທ່ານ ປະເດີມພອນ ສົນທະນີ ຮອງລັດຖະມົນຕີກະຊວງ ຮສສ ກ່າວໃຫ້ຮູ້ເມື່ອບໍ່ດົນມານີ້ວ່າ: ປີ 2023 ນີ້ກະຊວງ ຮສສ ໄດ້ສຸມໃສ່ພັດທະນາສີມືແຮງງານໃຫ້ຜູ້ບໍ່ມີວິຊາຊີບ, ຜູ້ຕ້ອງການປ່ຽນອາຊີບ, ຜູ້ວ່າງງານ ແລະ ຜູ້ທີ່ຈະເຂົ້າສູ່ຕໍາແໜ່ງງານໃໝ່ຕິດພັນວາລະແຫ່ງຊາດໃຫ້ໄດ້ 3.000 ຄົນ, ໃນນີ້ຢູ່ສະຖາບັນ, ສູນພັດທະນາສີມືແຮງງານໃຫ້ໄດ້ 2.000 ຄົນ; ຝຶກເຄື່ອນທີ່ຕາມສາຂາອາຊີບຕ່າງໆໃຫ້ໄດ້ 1.000 ຄົນ ແລະ ຊຸກຍູ້ສົ່ງເສີມບັນດາຫົວໜ່ວຍແຮງງານໃນການພັດທະນາສີມືແຮງງານຕາມສາຂາອາຊີບຕ່າງໆໃຫ້ໄດ້ 5.000 ຄົນ; ເຮັດການທົດສອບສີມືແຮງງານຕາມມາດຕະຖານສີມືແຮງງານແຫ່ງຊາດ 32 ສາຂາອາຊີບ ແລະ ຊຸກຍູ້ຫົວໜ່ວຍແຮງງານເຮັດການທົດສອບສາຂາອາຊີບຕ່າງໆໃຫ້ໄດ້ 740 ຄົນ; ສ້າງພື້ນຖານລະບົບປະກັນຄຸນນະພາບການພັດທະນາສີມືແຮງງານ ແລະ ສ້າງຄູພັດທະນາສີມືແຮງງານພາກທິດສະດີ, ຄູພາກປະຕິບັດຕົວຈິງ, ຄູທົດສອບສີມືແຮງງານ ແລະ ຜູ້ບໍລິຫານໃຫ້ໄດ້ 50 ຄົນຕາມວາລະແຫ່ງຊາດ; ສ້າງຫຼັກສູດພັດທະນາສີມືແຮງງານໃຫ້ໄດ້ 3 ສາຂາອາຊີບ ແລະ ປັບປຸງຫຼັກສູດທີ່ມີແລ້ວໃຫ້ໄດ້ 4 ສາຂາອາຊີບ ແລະ ພັດທະນາມາດຕະຖານສີມືແຮງງານຂອງຫົວໜ່ວຍແຮງງານເປັນມາດຕະຖານສີມືແຮງງານແຫ່ງຊາດໃຫ້ໄດ້ 2 ສາຂາອາຊີບ, ພ້ອມທັງຊີ້ນຳການສົ່ງເສີມການຈັດຫາວຽກເຮັດງານທໍາໃນຕະຫຼາດແຮງງານພາຍໃນ ແລະ ຕ່າງປະເທດຕິດພັນກັບວາລະແຫ່ງຊາດໃຫ້ໄດ້ 78.200 ຄົນ; ເອົາໃຈໃສ່ແກ້ບັນຫາວ່າງງານໃຫ້ຫຼຸດຢູ່ໃນລະດັບປະມານ 4,6%; ປັບປຸງລະບົບຂໍ້ມູນຂ່າວສານຕະຫຼາດແຮງງານໃຫ້ສາມາດເປັນແຫຼ່ງສະໜອງຂໍ້ມູນໃຫ້ແກ່ການສ້າງນະໂຍບາຍເພື່ອດັດສົມມະຫາພາກດ້ານແຮງງານ, ການພັດທະນາສີມືແຮງງານ ແລະ ການຈັດຫາງານຕາມຂໍ້ມູນພື້ນຖານ 17 ຕົວຊີ້ບອກຂອງຕະຫຼາດແຮງງານ ແລະ ຕົວຊີ້ບອກຂອງເປົ້າໝາຍການພັດທະນາແບບຍືນຍົງ; ປັບປຸງ ແລະ ຂະຫຍາຍຕາໜ່າງການບໍລິການຈັດຫາງານເພີ່ມໃໝ່ຢູ່ຂັ້ນເມືອງໃຫ້ໄດ້ 4 ເມືອງ ແລະ ຂຶ້ນທະບຽນແຮງງານພາຍໃນຢູ່ຫົວໜ່ວຍແຮງງານໃນ 14 ແຂວງໃຫ້ສໍາເລັດ.
ທ່ານກ່າວໃຫ້ຮູ້ອີກວ່າ: ຄຽງຄູ່ກັນນີ້ໄດ້ເອົາໃຈໃສ່ການໂຄສະນາເຜີຍແຜ່ ແລະ ກວດກາການຈັດຕັ້ງປະຕິບັດກົດໝາຍວ່າດ້ວຍແຮງງານຂອງຫົວໜ່ວຍແຮງງານໃຫ້ໄດ້ 2.500 ແຫ່ງ, ສ້າງຫົວໜ່ວຍແຮງງານໃຫ້ໄດ້ມາດຕະ ຖານແຮງງານແຫ່ງຊາດໃຫ້ໄດ້ 20 ແຫ່ງ, ຊຸກຍູ້ຫົວໜ່ວຍແຮງງານສ້າງ ແລະ ປັບປຸງກົດລະບຽບພາຍໃນໂດຍຮັບຮອງຈາກອົງການຄຸ້ມຄອງແຮງງານໃຫ້ໄດ້ 100 ແຫ່ງ, ສ້າງສັນຍາແຮງງານໃຫ້ໄດ້ 100 ແຫ່ງ; ຊຸກຍູ້ຫົວ ໜ່ວຍແຮງງານໃຫ້ຜູ້ອອກແຮງງານໄດ້ຮັບການກວດສຸຂະພາບປະຈໍາປີໃຫ້ໄດ້ 20 ແຫ່ງ, ສ້າງຕັ້ງໜ່ວຍງານຄວາມປອດໄພ ແລະ ສຸຂະພາບແຮງງານໃນສະຖານທີ່ເຮັດວຽກໃຫ້ໄດ້ 20 ແຫ່ງ; ໄກ່ເກ່ຍຂໍ້ຂັດແຍ່ງແຮງງານໃຫ້ໄດ້ 80% ໃນປີ, ໃຫ້ຄໍາປຶກສາດ້ານນິຕິກໍາ ແລະ ລະບຽບການກ່ຽວກັບການຄຸ້ມຄອງແຮງງານໃຫ້ຜູ້ອອກແຮງງານ ແລະ ຜູ້ໃຊ້ແຮງງານໃຫ້ໄດ້ 1.000 ຄັ້ງ, ສືບຕໍ່ຂຶ້ນທະບຽນແຮງງານ ແລະ ກວດສຸຂະພາບຂອງຜູ້ອອກແຮງງານລາວໃຫ້ສາມາດເກັບກຳຄັງເງິນເດືອນຂອງຜູ້ອອກແຮງງານເພື່ອສົ່ງຂໍ້ມູນໃຫ້ພາກສ່ວນກ່ຽວຂ້ອງນຳໄປພິຈາລະນາເກັບອາກອນເງິນເດືອນຕາມລະບຽບການ.
ໂດຍ: ພູວັນ
