ສູນຝຶກອົບຮົມ ທີ່ຂຶ້ນກັບກອງພົນທີ 3 ໄດ້ຈັດພິທີປາຖະກະຖາວັນສ້າງຕັ້ງກອງທັບປະຊາຊົນລາວ ຄົບຮອບ74 ປີ ຂຶ້ນໃນວັນທີ 18 ມັງກອນ ນີ້ ທີ່ສະໂມສອນຂອງຕົນ ໂດຍການເປັນປະທານ ແລະ ປາຖະກະຖາຂອງ ສະຫາຍ ພັນໂທ ທອງຄໍາ ວົງນະຄອນ ຄະນະປະຈໍາພັກ ປະທານກວດກາ ຫົວໜ້າພະແນກການເມືອງ ສູນຝຶກອົບຮົມກອງພົນທີ 3, ມີບັນດາຄະນະພັກ-ຄະນະບັນຊາ, ພະນັກງານ-ນັກຮົບ ແລະ ນັກຮຽນນາຍສິບ ຊຸດທີ 4 ເຂົ້າຮ່ວມຮັບຟັງຢ່າງພ້ອມພຽງ.
ໂອກາດດັ່ງກ່າວ, ສະຫາຍພັນໂທ ທອງຄໍາ ວົງນະຄອນ ໄດ້ທົບທວນຫວນຄືນເຖິງປະຫວັດມູນເຊື້ອແຫ່ງການກຳເນີດເຕີບໃຫຍ່ຂະຫຍາຍຕົວ ແລະ ຜົນງານການເຄື່ອນໄຫວສູ້ຮົບຂອງກອງທັບປະຊາຊົນລາວແຕ່ລະໄລຍະ ເລີມແຕ່ວັນສ້າງຕັ້ງຮອດປັດຈຸບັນ, ເພື່ອໃຫ້ບັນດາພະນັກງານ-ນັກຮົບໄດ້ຮັບຮູ້ເຊື່ອມຊຶມ ແລະ ເຂົ້າໃຈຕໍ່ກັບຄວາມໝາຍຄວາມສຳຄັນຂອງວັນສ້າງຕັ້ງກອງທັບປະຊາຊົນລາວ.
ກອງທັບປະຊາຊົນລາວແມ່ນໄດ້ກຳເນີດ ແລະ ເຕີບໃຫຍ່ຂະຫຍາຍຕົວໃຕ້ຫົ່ມທຸງພັກ, ຂອງພັກປະຊາຊົນປະຕິວັດລາວ, ໄດ້ກຳເນີດມາຈາກປະຊາຊົນ, ຮັບໃຊ້ປະຊາຊົນ ແລະ ເພື່ອຜົນປະໂຫຍດຂອງປະຊາຊົນ, ພາຍໃຕ້ການຊີ້ນຳໂດຍກົງຮອບດ້ານຂອງພັກປະຊາຊົນປະຕິວັດລາວ, ໂດຍແມ່ນປະທານໄກສອນ ພົມວິຫານ ເປັນຜູ້ປະກາດສ້າງຕັ້ງຂຶ້ນໃນວັນທີ 20 ມັງກອນປີ 1949 ຢູ່ເຂດທີ່ໝັ້ນຕາແສງລາວຮຸ່ງ ເມືອງຊຽງຄໍ ແຂວງຫົວພັນ.
(ຂ່າວ – ພາບ: ສົມພົງ ອິນຕະວັນ)
