ກອງປະຊຸມກ່ຽວກັບການດໍາເນີນທຸລະກິດຂອງ ລັດວິສາຫະກົດໄຟຟ້າລາວໄດ້ຈັດຂຶ້ນເມື່ອວັນທີ 16 ມັງກອນນີ້ ທີ່ລັັດວິສາຫະກິດ ໄຟຟ້າລາວ ໂດຍ ການເປັນປະທານຮ່ວມຂອງ ທ່ານ ພູທະນູເພັດ ໄຊສົມບັດ ຮອງລັດຖະມົນຕີກະຊວງການເງິນ ຫົວໜ້າຄະນະປະຕິຮູບ ລັດວິສາຫະກິດ ໄຟຟ້າລາວ, ທ່ານ ຈັນທະບູນ ສຸກອາລຸນ ຜູ້ອຳນວຍການໃຫຍ່ ລັດວິສາຫະກິດ ໄຟຟ້າລາວ, ມີພາກສ່ວນທີ່ກ່ຽວຂ້ອງເຂົ້າຮ່ວມ
ທ່ານ ພູທະນູເພັດ ໄຊສົມບັດ ກ່າວວ່າ: ກອງປະຊຸມຄັ້ງນີ້ແມ່ນເພື່ອພ້ອມກັນປຶກສາຫາລືສ້າງຄວາມເຂົ້າໃຈໃຫ້ເລິກເຊິ່ງຂຶ້ນຕື່ມ ກ່ຽວກັບການດໍາເນີນທຸລະກິດຂອງ ລັດວິສາຫະກິດໄຟຟ້າລາວ ຊຶ່ງເປັນວິສາຫະກິດຍຸດທະສາດຂອງປະເທດ, ດັ່ງທີ່ພວກເຮົາຮັບຮູ້ນໍາກັນວ່າ ໄຟຟ້າລາວ ເປັນວິສາຫະກິດ ທີ່ມີປະຫວັດອັນຍາວນານ ຢູ່ຄຽງຄູ່ກັບການເຕີບໃຫຍ່ຂະຫຍາຍຕົວຂອງປະເທດຊາດ ນັບແຕ່ສະໄໝກ່ອນປົດປ່ອຍ ຈົນເຖິງປັດຈຸບັນ ແລະ ເວົ້າໄດ້ວ່າເປັນວິສາຫະກິດ ທີ່ມີມູນຄ່າຊັບສິນສູງທີ່ສຸດໃນປະເທດ ຊຶ່ງມີໜ້າທີ່ຍຸດທະສາດທີ່ພັກ-ລັດ ມອບໝາຍໃຫ້ ຄື: ຮັບຜິດຊອບໜ້າທີ່ການເມືອງ ກໍຄືການປະຕິບັດໜ້າທີ່ສະໜັບສະໜູນ ແລະ ຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມແຫ່ງຊາດ ໃນແຕ່ລະໄລຍະ ໃຫ້ເປັນຮູບປະທໍາ, ໂດຍສະເພາະແມ່ນຮັບປະກັນ ການສະໜອງໄຟໃຫ້ປະຊາຊົນລາວບັນດາເຜົ່າ ສາມາດມີໄຟຟ້າໃຊ້ຢ່າງພຽງພໍ ແລະ ທົ່ວເຖິງ ຕາມທິດທາງນະໂຍບາຍທີ່ລັດຖະບານກໍານົດໄວ້ (ຊຶ່ງມາຮອດປັດຈຸບັນປະຊາຊົນລາວສາມາດມີໄຟຟ້າໃຊ້ແລ້ວ ເຖິງ 95% ຂອງຈໍານວນຄົວເຮືອນທັງໝົດທົ່ວປະເທດ), ດໍາເນີນທຸລະກິດໃຫ້ມີປະສິດທິພາບ ແລະ ປະສິດທິຜົນ ໂດຍແນໃສ່ສ້າງອຸດສາຫະກໍາໄຟຟ້າ ໃຫ້ເປັນຂະແໜງການຫຼັກ ໃນການພັດທະນາເສດຖະກິດ-ສັງຄົມ ແລະ ສ້າງລາຍຮັບໃຫ້ແກ່ປະເທດ, ພ້ອມທັງຊຸກຍູ້ສົ່ງເສີມຂະແໜງການປິ່ນອ້ອມໃຫ້ມີການພັດທະນາໄປຄຽງຄູ່ກັນ ເພື່ອສ້າງວຽກເຮັດງານທໍາໃຫ້ປະຊາຊົນລາວບັນດາເຜົ່າ ແລະ ໄດ້ຊົມໃຊ້ໄຟຟ້າໃນລາຄາທີ່ສົມເຫດສົມຜົນ.
ທ່ານກ່າວຕື່ມວ່າ: ການປະຕິບັດສອງໜ້າທີ່ຍຸດທະສາດໃຫ້ສອດຄ່ອງກັນນັ້ນ ເປັນພາລະໜ້າທີ່ອັນໜັກໜ່ວງ ຂອງ ລັດວິສາຫະກິດໄຟຟ້າລາວ ແລະ ຈໍາເປັນຕ້ອງໃຊ້ທຶນຮອນອັນມະຫາສານ ເຂົ້າໃນການພັດທະນາລະບົບໂຄງລ່າງພື້ນຖານ ນັບຕັ້ງແຕ່ການລົງທຶນກໍ່ສ້າງແຫຼ່ງຜະລິດ (ສ່ວນໃຫຍ່ແມ່ນການລົງທຶນໂດຍນັກລົງທຶນຕ່າງປະເທດ), ການກໍ່ສ້າງສາຍສົ່ງ-ສະຖານີໄຟຟ້າແຮງສູງ, ກໍ່ສ້າງຕາຂ່າຍໄຟຟ້າແຮງກາງ ແລະ ແຮງຕໍ່າ, ຈົນຮອດໝໍ້ນັບໄຟທີ່ຕິດຕັ້ງຢູ່ຕາມຄົວເຮືອນຂອງປະຊາຊົນ ຊຶ່ງບັນດາທຶນຮອນເຫຼົ່ານັ້ນ ສ່ວນໜຶ່ງແມ່ນໄດ້ມາຈາກງົບປະມານຂອງລັດຖະບານ ແລະ ການຊ່ວຍເຫຼືອຈາກຕ່າງປະເທດ, ແຕ່ສ່ວນໃຫຍ່ແມ່ນມາຈາກການກູ້ຢືມນໍາສະຖາບັນການເງິນຕ່າງໆ ທັງພາຍໃນ ແລະ ຕ່າງແະເທດ.
ຄຽງຄູ່ກັບການລົງທຶນພັດທະນາພື້ນຖານໂຄງລ່າງ, ໄຟຟ້າລາວ ແມ່ນມີພັນທະທີ່ຕ້ອງແບກຫາບໜີ້ສິນ ທັງຕົ້ນທຶນ ແລະ ດອກເບັ້ຍ ທີ່ກູ້ຢືມຈາກສະຖາບັນການເງິນຕ່າງໆ ຊຶ່ງມາຮອດ ປັດຈຸບັນ ເວົ້າໄດ້ວ່າເປັນໄລຍະທີ່ ໄຟຟ້າລາວ ຕ້ອງການທຶນຮອນຫຼາຍທີ່ສຸດ ເພື່ອມາແກ້ໄຂໜີ້ສິນ ທີ່ຮອດກໍານົດຕ້ອງຊໍາລະຄືນ ຫຼື ເວົ້າໄດ້ວ່າເປັນໄລຍະທີ່ຫຍຸ້ງຍາກທີ່ສຸດ ຂອງໄຟຟ້າລາວ ບວກກັບ ສະພາບການຜັນຜວນຂອງເສດຖະກິດ ກໍຄື ວິກິດດ້ານພະລັງງານ ທີ່ບັນດາປະເທດພາກພື້ນ ແລະ ສາກົນ ກໍາລັງປະເຊີນ; ແຕ່ເຖິງແນວໃດກໍຕາມ ຂໍໃຫ້ເຊື່ອໝັ້ນວ່າ ພາຍຫຼັງທີ່ພວກເຮົາ ສາມາດຜ່ານພົ້ນຈຸດວິກິດນີ້ໄປໄດ້ ໃນອະນາຄົດອີກບໍ່ດົນ ສິ່ງທີ່ພວກເຮົາໄດ້ທຸ່ມເທ ແລະ ອຸທິດໄປ ແມ່ນຈະສາມາດສ້າງພື້ນຖານ ແລະ ສ້າງຄວາມສະດວກສະບາຍ ໃຫ້ຮຸ່ນລູກຫຼານ ໃນຍຸກຕໍ່ໄປໄດ້ ຢ່າງແນ່ນອນ. ສະນັ້ນ, ຈຸດປະສົງຫຼັກຂອງກອງປະຊຸມຄັ້ງນີ້ ແມ່ນເພື່ອສ້າງຄວາມເຂົ້າໃຈ ຕໍ່ສະພາບການດໍາເນີນທຸລະກິດ ຂອງ ລັດວິສາຫະກິດໄຟຟ້າລາວ, ພ້ອມທັງ ຊ່ວຍກັນປະກອບຄໍາຄິດຄໍາເຫັນ ກ່ຽວກັບຫຼັກການ ແລະ ວິທີທາງແກ້ໄຂບັນຫາ ຂອງ ລັດວິສາຫະກິດໄຟຟ້າລາວ ທີ່ ພົວພັນເຖິງຄວາມໝັ້ນຄົງທາງດ້ານພະລັງງານຂອງຊາດ.
ທ່ານ ຈັນທະບູນ ສຸກອາລຸນ ໄດ້ນຳສະເໜີກ່ຽວກັບການດຳເນີນທຸລະກິດຂອງລັດວິສາຫະກິດໄຟຟ້າລາວ, ຈາກນັ້ນຜູ້ເຂົ້າຮ່ວມໄດ້ພ້ອມກັນປະກອບຄຳຄິດເຫັນຢ່າງສ້າງສັນ ຕໍ່ທິດທາງການດໍາເນີນທຸລະກິດຂອງ ລັດວິສາຫະກິດໄຟຟ້າລາວ ໃຫ້ມີການດໍາເນີນທຸລະກິດດ້ວຍບາດກ້າວໃໝ່ທີ່ໝັ້ນຄົງ ແລະ ຍືນຍົງ ເພື່ອສະໜັບສະໜູນການພັດທະນາເສດຖະກິດ-ສັງຄົມ ກໍຄື ຊີວິດການເປັນຢູ່ຂອງ ປະຊາຊົນໃຫ້ດີຂຶ້ນເລື້ອຍໆ.
(ຂ່າວ-ພາບ: ສຳນານ)
