ພິທີສະເຫຼີມສະຫຼອງວັນສ້າງຕັ້ງກອງພົນທີ 4 ຄົບຮອບ 40 ປີ ( 7 ພະຈິກ 1982-7 ພະ ຈິກ 2022) ໄດ້ຈັດຂຶ້ນຢ່າງເປັນທາງການ ແລະ ຄຶກຄື້ນ ໃນວັນ ທີ 7 ພະຈິກ 2022 ນີ້, ຢູ່ທີ່ສະໜາມກິລາກອງພົນທີ 4 ໂດຍ ການເຂົ້າຮ່ວມຂອງ ສະຫາຍ ພົນເອກ ຈັນສະໝອນ ຈັນຍາລາດ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດ, ມີບັນດາສະຫາຍການນຳກະຊວງປ້ອງກັນປະເທດ, ການນຳແຂວງສະຫວັນນະເຂດ, ແຂວງຄຳມ່ວນ , ແຂວງໄຊສົມບູນ, ຫົວໜ້າກົງສູນໃຫຍ່ ສສ ຫວຽດນາມ ປະຈຳແຂວງສະຫວັນນະເຂດ, ຕາງໜ້າກອງບັນຊາການທະຫານເຂດ 4, ກອງພົນ 968, ກອງບັນຊາການທະຫານແຂວງກວາງຈິ ສສ ຫວຽດ ນາມ, ຄະນະພັກ-ຄະນະບັນຊາ, ພະນັກງານປະຕິວັດອາວຸໂສບຳນານ, ນາຍ ແລະ ພົນທະຫານກອງພົນທີ 4 ພ້ອມດ້ວຍອຳນາດການປົກຄອງທ້ອງຖິ່ນ, ມວນຊົນຊາວແຂວງສະຫວັນນະເຂດເຂົ້າຮ່ວມ. ໃນພິທີ ສະຫາຍ ພົນຈັດຕະວາ ສົມຈິດ ກິດຕິຍະລາດ ເລຂາຄະນະພັກ ຫົວໜ້າການເມືອງກອງພົນທີ 4 ໄດ້ກ່າວບົດປາໄສ ຍົກໃຫ້ເຫັນປະຫວັດຄວາມເປັນມາ, ມູນເຊື້ອແຫ່ງການກຳເນີດ, ເຕີບໃຫຍ່ຂະຫຍາຍຕົວ ແລະ ເຮັດສຳເລັດໜ້າທີ່ຂອງກອງພົນທີ 4 ໃນຕະຫຼອດໄລຍະ 40 ທີ່ຜ່ານມາ, ເຊິ່ງຄະນະພັກ-ຄະນະບັນຊາກອງພົນທີ 4 ແຕ່ລະຮຸ່ນໄດ້ເອົາໃຈໃສ່ຊີ້ນຳ-ນຳພາ, ພະນັກງານ-ນັກຮົບອອກແຮງເຄື່ອນ ໄຫວຈັດຕັ້ງປະຕິບັດໜ້າທີ່ວຽກງານຕາມການມອບໝາຍຂອງຂັ້ນເທິງ, ທັງລົງກໍ່ສ້າງຮາກຖານການເມືອງ, ທັງເຄື່ອນໄຫວສູ້ຮົບ ແລະ ປັບປຸງກໍ່ສ້າງກຳລັງໃຫ້ເຂັ້ມແຂງໜັກແໜ້ນ, ທຸກການເຄື່ອນໄຫວຕໍ່ສູ້ໃນແຕ່ລະບັ້ນຮົບລ້ວນແຕ່ໄດ້ຮັບໄຊຊະນະຢ່າງອົງອາດກ້າຫານ, ຍິ່ງຕີກໍຍິ່ງໄດ້ຮັບໄຊຊະນະ, ຍິ່ງຕີກໍຍິ່ງມີບົດຮຽນ ແລະ ເຕີບໃຫຍ່ເຂັ້ມແຂງໃນທຸກດ້ານ. ຈາກຜົນງານໄຊຊະນະທີ່ຍາດມາໄດ້ໃນຕະຫຼອດໄລຍະ 40 ປີຜ່ານມາ, ພັກ-ລັດຖະບານ ແລະ ກະຊວງປ້ອງກັນປະເທດ ໄດ້ໃຫ້ການຍ້ອງຍໍທັງກົມກອງລວມໝູ່ ແລະ ບຸກຄົນເປັນຈຳນວນຫຼວງຫຼາຍ. ໃນນີ້ກົມກອງລວມໝູ່ໄດ້ຮັບນາມມະຍົດກອງວິລະຊົນ 1 ກົມກອງ, ໄດ້ຮັບການປະດັບຫຼຽນໄຊແຮງງານຊັ້ນ I ຈຳນວນ 1 ກົມກອງ, ບຸກຄົນໄດ້ຮັບນາມມະຍົດວິລະຊົນແຫ່ງຊາດມີ 1 ສະຫາຍ, ນັກຮົບແຂ່ງຂັນ 5 ສະຫາຍ, ກົມກອງລວມໝູ່ ແລະ ບຸກຄົນໄດ້ຮັບຫຼຽນໄຊແຮງງານ, ຫຼຽນກາປະເພດຕ່າງໆ 3.434 ໜ່ວຍ, ໃບຍ້ອງຍໍປະເພດຕ່າງໆ 10.801 ໃບ. ສະເພາະກອງພົນທີ 4 ໄດ້ຮັບນາມມະຍົດທຸງໄຊຊະນະເລີດ 1 ຜືນ, ທຸງໄຊພິລະອາດຫານ 1 ຜືນ, ຫຼຽນໄຊອິດສະຫຼະຊັ້ນ II ຈຳນວນ 1 ໜ່ວຍ, ຊັ້ນ III ຈຳນວນ 1 ໜ່ວຍ, ຫຼຽນໄຊແຮງງານຊັ້ນ II ຈຳນວນ 4 ໜ່ວຍ, ຫຼຽນໄຊແຮງງານ ຊັ້ນ III ຈຳນວນ 3 ໜ່ວຍ, ຫຼຽນໄຊພິລະອາດຫານ ຊັ້ນ I ຈຳນວນ 1 ໜ່ວຍ ແລະ ຫຼຽນໄຊພິລະອາດ ຫານ ຊັ້ນ II ຈຳນວນ 2 ໜ່ວຍ ຢ່າງສົມກຽດ. ເນື່ອງໃນໂອກາດສະເຫຼີມສະຫຼອງວັນສ້າງຕັ້ງກອງພົນທີ 4 ຄົບຮອບ 40 ປີ ຍັງໄດ້ປະດັບຫຼຽນໄຊພິລະອາດຫານຊັ້ນ II ໃຫ້ກົມກອງລວມໝູ່ 9 ກົມກອງ, ຊັ້ນ III 48 ກົມກອງ, ໃບຍ້ອງຍໍກະຊວງປ້ອງກັນປະເທດ 23 ກົມກອງ, ໃບຍ້ອງຍໍກົມໃຫຍ່ການ ເມືອງກອງທັບ 14 ກົມກອງ ໂດຍການປະດັບຂອງ ສະຫາຍ ພົນເອກ ຈັນສະໝອນ ຈັນຍາລາດ ພ້ອມດ້ວຍຄະນະຕາມລຳດັບ. ໃນພິທີອັນມີຄວາມໝາຍສຳຄັນນີ້, ບັນດາຜູ້ເຂົ້າຮ່ວມໄດ້ຮັບຊົມການເດີນຂະບວນສວນສະໜາມຈາກກ້ອນກຳລັງຂອງບັນ ດາກົມກອງໃນທົ່ວກອງພົນທີ 4, ຊົມການສະແດງໂດດຈ້ອງຈາກກອງພັນໃຫຍ່ 703, ຊົມ ການສະແດງສິລະປະ-ວັນນະ ຄະດີ ຈາກຄະນະສິລະປະສະໝັກຫຼິ້ນ ແລະ ຊົມການສະແດງຫັດກາຍມວຍຕີພິເສດ, ມວຍສືບຂ່າວຂອງພະນັກງານ-ນັກຮົບກອງພົນທີ 4 ທີ່ສ່ອງແສງໃຫ້ເຫັນເຖິງມູນເຊື້ອແຫ່ງການກຳເນີດ, ເຕີບໃຫຍ່ຂະຫຍາຍຕົວຂອງກອງພົນທີ 4 ໃນຕະຫຼອດໄລຍະ 40 ທີ່ຜ່ານມາ ດ້ວຍບັນຍາກາດຟົດຟື້ນເບີກບານມ່ວນຊື່ນ.
ຂ່າວ;ພາບ: ໜັງສືພີມກອງທັບປະຊາຊົນລາວ
