ວັນທີ 2 ຕຸລາ 2022 ທ່ານ ສົມສະຫວາດ ເລັ່ງສະຫວັດ ອະດີດຮອງນາຍົກລັດຖະມົນຕີ ແຫ່ງ ສປປ ລາວ ພ້ອມຄະນະໄດ້ເຄື່ອນໄຫວຢ້ຽມຢາມ ແລະ ເຮັດວຽກຮ່ວມກັບ ບໍລິສັດ ຊີໂນ-ອາກຣີ ໂປຕາສ ຈໍາກັດ ທີ່ບ້ານດົງໃຕ້ ເມືອງທ່າແຂກ, ໂດຍມີ ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ ແລະ ບັນດາພະແນກການທີ່ກ່ຽວຂ້ອງຂັ້ນແຂວງເຂົ້າຮ່ວມຕິດຕາມ.
ໂດຍໄດ້ຮັບການຕ້ອນຮັບຢ່າງອົບອຸ່ນຈາກ ທ່ານ ໂຖງຢົງເຫີງ ຜູ້ອໍານວຍການ ບໍລິສັດ ຊີໂນ-ອາກຣີ ໂປຕາສ ຈໍາກັດ ແລະ ພະນັກງານພາຍໃນບໍລິສັດດັ່ງກ່າວ, ໂອກາດນີ້ ທ່ານອະດີດຮອງນາຍົກລັດຖະມົນຕີ ແລະ ຄະນະ ກໍໄດ້ຮັບຟັງການລາຍງານຫຍໍ້ກ່ຽວກັບສະພາບໂດຍລວມຂອງ ບໍລິສັດ ຊີໂນ-ອາກຣີ ໂປຕາສ ຈໍາກັດ, ບໍລິສັດດັ່ງກ່າວເປັນບໍລິສັດລະດັບສາກົນທີ່ດໍາເນີນການຂຸດຄົ້ນແຮ່ເກືອໂປຕາສ, ຜະລິດເກືອໂປຕາສ (ປຸ໋ຍໂປຕາສ) ແລະ ຈໍາໜ່າຍເກືອໂປຕາສ. ໃນທ້າຍປີ 2021 ສໍາເລັດການກໍ່ສ້າງ ແລະ ທົດລອງຜະລິດໂຄງການເກືອໂປຕາສ 1 ລ້ານໂຕນທໍາອິດ ຊຶ່ງໄດ້ກາຍເປັນໂຄງການເກືອໂປຕາສລະດັບ 1 ລ້ານໂຕນທໍາອິດ ໃນຂົງເຂດໃໝ່ຂອງການຜະລິດເກືອໂປຕາສໃນໂລກ, ຜະລິດຕະພັນເກືອໂປຕາສຂອງບໍລິສັດ ສົ່ງອອກຈໍາໜ່າຍຢູ່ຫຼາຍປະເທດເຊັ່ນ: ຈີນ, ຫວຽດນາມ, ອິນໂດເນເຊຍ, ໄທ, ມາເລເຊຍ, ອິນເດຍ, ນິວຊີແລນ, ຍີ່ປຸ່ນເປັນຕົ້ນ. ຕາມແຜນຍຸດດທະສາດຂອງວິຫາຫະກິດ ພາຍຫຼັງສໍາເລັດໂຄງການເກືອໂປຕາສ 1 ລ້ານໂຕນທໍາອິດແລ້ວ ບໍລິສັດວາງແຜນໃນປີ 2022 ສືບຕໍ່ລົງທຶນ ກໍ່ສ້າງຂະຫຍາຍໂຄງການເກືອໂປຕາສ 2 ລ້ານໂຕນຕໍ່ປີ, ໃນອະນາຄົດ 3-5 ປີ ຈະບັນລຸການຜະລິດເກືອໂປຕາສ ລະດັບ 3-5 ລ້ານໂຕນຕໍ່ປີ, ພັດທະນາເປັນຜູ້ສະໜອງເກືອໂປຕາສລະດັບສາກົນ, ເພື່ອສະໜອງເກືອໂປຕາສຄຸນນະພາບສູງໃຫ້ແກ່ການຜະລິດກະເສດຂອງເອເຊຍ ແລະ ຂອງໂລກ ຊຶ່ງໄດ້ຊຸກຍູ້ການສ້າງວຽກເຮັດງານທໍາແກ່ທ້ອງຖິ່ນ, ບໍລິສັດໄດ້ຈັດຕັ້ງຫຼາກຫຼາຍກິດຈະກໍາ, ວັດທະນະທໍາວິສາຫະກິດ, ເພື່ອເສີມສ້າງທີມງານທີ່ສາມັກຄີກົມກຽວ, ເພື່ອພ້ອມກັນພະຍາຍາມສູ້ຊົນບັນລຸຄາດໝາຍໂຄງການປອດໄພ, ສີຂຽວ, ເປັນມິດກັບສິ່ງແວດລ້ອມ ແລະ ພັດທະນາຍືນຍົງ.
ໃນໂອກາດດຽວກັນ ທ່ານ ສົມສະຫວາດ ເລັ່ງສະຫວັດ ຍັງໄດ້ໃຫ້ທິດຊີ້ນໍາ ແລະ ຕີລາຄາສູງຕໍ່ຜົນງານການເຄື່ອນໄຫວດໍາເນີນທຸລະກິດຂອງບໍລິສັດໃນໄລຍະຜ່ານມາ, ພ້ອມທັງສະເໜີມາຍັງບໍລິສັດ ສ້າງຜະລິດຕະພັນຝຸ່ນປຸ໋ຍ ເພື່ອໃຫ້ສົ່ງເສີມຊົມໃຊ້ພາຍໃນ ໂດຍສະເພາະແມ່ນນໍາໃຊ້ເຂົ້າໃນການຜະລິດກະສິກໍາ, ພ້ອມດຽວກັນນັ້ນ ກໍຕ້ອງນໍາໃຊ້ທ່າແຮງດ້ານການບໍລິການຂົນສົ່ງພາຍໃນປະເທດ, ປະກອບ ສ່ວນສ້າງບຸກຄະລາກອນທາງດ້ານເຕັກນິກວິຊາການທີ່ເປັນຄົນລາວ ຢູ່ພາຍໃນໂຮງງານໃຫ້ມີຄຸນນະພາບ ແລະ ສ້າງວຽກເຮັດງານທໍາ ໃຫ້ແກ່ແຮງງານລາວພາຍໃນຊຸມຊົນທ້ອງຖິ່ນ, ລວມເຖິງການປະກອບສ່ວນທາງດ້ານສາທາລະນະປະໂຫຍດໃຫ້ແກ່ສັງຄົມ ພາຍໃນທ້ອງຖິ່ນໃຫ້ນັບມື້ໄດ້ຮັບການພັດທະນາຢ່າງຕໍ່ເນື່ອງ, ໄປຄຽງຄູ່ກັບການພັດທະນາຄຸນນະພາບດ້ານສິ່ງແວດລ້ອມ ໂດຍມີການປະສານສົມທົບກັບຂະ ແໜງການລັດທີ່ກ່ຽວຂ້ອງແຕ່ລະຂັ້ນ ແລະ ເຊື່ອໝັ້ນວ່າ ທາງບໍລິສັດຈະບັນລຸໝາກຜົນໃນການດໍາເນີນທຸລະກິດຕາມແຜນການທີ່ວາງໄວ້.
ຂ່າວ-ພາບ: ມະນີວັນ
