ຂ່າວຕ່າງປະເທດລາຍງານ ເມື່ອວັນທີ 2 ຕຸລາທີ່ຜ່ານມານີ້, ກອງທຶນເງິນຕາສາກົນ (IMF) ໄດ້ອອກບົດລາຍງານການຄາດຄະເນໂຕເລກລວມຍອດຜະລິດຕະພັນພາຍໃນປະເທດ (GDP) ຂອງກຸຍຢານອາດຈະຂະຫຍາຍຕົວເຖິງ 57,8% ໃນປີນີ້ ເນື່ອງຈາກຜົນຜະລິດນ້ຳມັນດິບພາຍໃນປະເທດມີທ່າອ່ຽງເພີ່ີມຂຶ້ນເຖິງສອງເທົ່າຈາກສະຖິຕິປົກກະຕິໃນປີນີ້ ແລະ IMF ຍັງໄດ້ວິເຄາະຕື່ມວ່າ ຫຼັງຈາກນີ້, ເສດຖະກິດຂອງກຸຍຢານ ມີທ່າອ່ຽງຂະຫຍາຍຕົວທີ່ລະດັບ 30% ໄປຈົນເຖິງປີ 2026.
ຂະນະທີ່ລັດຖະບານກຸຍຢານ ໄດ້ຄາດຄະເນວ່າ ອັດຕາການຂະຫຍາຍຕົວທາງດ້ານເສດຖະກິດຂອງປະເທດຈະຢູ່ທີ່ 56% ໃນປີນີ້ ດ້ວຍຜົນພ່ວງມາຈາກການຜະລິດນ້ຳມັນດິບ ເຖິງແມ່ນວ່າຈະບໍ່ນຳເອົາປັດໄຈດັ່ງກ່າວມາຄຳນວນຮ່ວມດ້ວຍ ອັດຕາການຂະຫຍາຍຕົວທາງດ້ານເສດຖະກິດຂອງປະເທດໃນປີນີ້ຈະຍັງຄົງສູງຢູ່ທີ່ລະດັບ 9,6%. ກຸຍຢານ ເປັນປະເທດໜຶ່ງໃນປະເທດຂະໜາດນ້ອຍທີ່ສຸດໃນອາເມຣິກາໃຕ້ ແຕ່ກຸຍຢານ ຖືວ່າເປັນເສດຖີນ້ຳມັນອັນດັບຕົ້ນໆ ປັດຈຸບັນ, ມີການໃຫ້ສຳປະທານກັບ ບໍລິສັດ 4 ແຫ່ງຈາກ 4 ປະເທດໄດ້ແກ່: ບໍລິສັດ ເອັກຊອນ ໂມບິນ (Exxon Mobil) ຂອງອາເມຣິກາ, ຊີຈີເອັກ (CGX) ຂອງການາດາ, ເຣບຊອນ (Repsol) ຂອງແອັສປາຍ ແລະ ເຊນຈູຣີ (Century) ຂອງກຸຍຢານ ໂດຍ Exxon Mobil ເຮັດໃຫ້ກຸຍຢານເປັນທີ່ໜ້າສົນໃຈເທິງເວທີໂລກຢ່າງຫຼວງຫຼາຍ ເມື່ອປີ 2015 ຈາກການປະກາດຄົ້ນພົບແຫຼ່ງນ້ຳມັນ 6 ແຫ່ງໃກ້ກັບແຄມຝັ່ງຂອງກຸຍຢານ ຊຶ່ງອາດຈະມີນ້ຳມັນລວມກັນຫຼາຍເຖິງ 700 ລ້ານບາເຣນ ແລະ ອາດຈະສ້າງລາຍໄດ້ເຂົ້າປະເທດຫຼາຍເຖິງ 300.000 ລ້ານໂດລາ.
ເຖິງຢ່າງໃດກໍຕາມ, IMF ໄດ້ກ່າວເຕືອນກຸຍຢານ ກ່ຽວກັບຄວາມແປປ່ວນຂອງລາຄານ້ຳມັນໂລກທີ່ອາດຈະສົ່ງຜົນກະທົບຕໍ່ເສດຖະກິດ ຊຶ່ງຈະກາຍເປັນການເພີ່ມຄວາມຍາກລຳບາກໃຫ້ກັບການບໍລິຫານຈັດການຊັບພະຍາກອນ ທັງນີ້, IMF ຍັງໄດ້ກ່າວຊົມເຊີຍວ່າ ຕະຫຼອດໄລຍະເວລາທີ່ຜ່ານມາ, ກຸຍຢານ ໄດ້ດຳເນີນນະໂຍບາຍເສດຖະກິດແບບອົດທົນ ແລະ ຮອບຄອບ ແຕ່ຄວນເພີ່ມການສົ່ງເສີມຕະຫຼາດເງິນຕາຕ່າງປະເທດດ້ວຍ.
