ທ່ານ ນາງ ມະນີວອນ ສຸນັນທາ ຄູປະຈໍາຊັ້ນຂັ້ນ ປ.5 ຢູ່ໂຮງຮຽນອະນຸບານ-ປະຖົມ-ມັດທະຍົມສຶກສາສົມບູນສະຖາພອນ ຕັ້ງຢູ່ບ້ານບຶງຂະຫຍອງ ເມືອງສືສັດຕະນາກ ນະຄອນຫຼວງວຽງຈັນ ໄດ້ໃຫ້ສໍາພາດຕໍ່ນັນຂ່າວໜັງສືພິມ ປະຊາຊົນ ເມື່ອວັນທີ 29 ກັນຍາ ຜ່ານມາ ວ່າ: ໃນໂອກາດວັນຄູແຫ່ງຊາດ ທີ່ຈະໝູນວຽນມາຄົບຮອບ 28 ປີ (ວັນທີ 7 ຕຸລາ 1994 – ວັນທີ 7 ຕຸລາ 2021), ຕົນເອງມີຄວາມຮູ້ສຶກພາກພູມໃຈທີ່ສຸດໃນອາຊີບໃນການເປັນຄູ, ຕົນໄດ້ຈົບການສຶກສາສ້າງຄູອະນຸບານ ຈາກປະເທດ ສສ ຫວຽດນາມ ໃນປີ 1987 ແລະ ໄດ້ມາສິດສອນຢູ່ໂຮງຮຽນສະຖາພອນໃນປີ 2000 ຊຶ່ງທໍາອິດແມ່ນເລີ່ມສອນຈາກຊັ້ນ ປ.1, ມາຮອດສົກຮຽນ 2015 ຫາ 2016 ແມ່ນໄດ້ສອນໃນຊັ້ນ ປ.5 ຈົນເຖິງປັດຈຸບັນ.
ທ່ານໄດ້ກ່າວຕື່ມວ່າ: ສໍາລັບບົດບາດຂອງການເປັນຄູ ແມ່ນໄດ້ຕິດພັນກັບວິວັດທະນາການຂອງການພັດທະນາປະເທດຊາດ ຊຶ່ງໃນເມື່ອກ່ອນປະເທດລາວເຮົາ, ພໍ່ແມ່ແມ່ນເປັນຜູ້ບອກສອນລູກຢູ່ໃນຄອບຄົວ ໂດຍຖືເອົາບົດຮຽນທີ່ເຮັດໃນແຕ່ລະວັນ, ຮີດຄອງປະເພນີ, ຂະນົບທໍານຽມມາສອນລູກ-ສອນຫຼານ ເພື່ອເຮັດໃຫ້ເຂົາເຈົ້າຮູ້ຈັກການອອກແຮງງານ ແລະ ສ້າງຄວາມຂະຫຍັນໃນແກ່ຕົນເອງ. ເມື່ອເວົ້າເຖິງບົດບາດຂອງຄູແລ້ວ ຄູແມ່ນແມ່ພິມຂອງຊາດ, ຄູແມ່ນພໍ່-ແມ່ ຜູ້ທີສອງຂອງເດັກ, ຄູແມ່ນຜູ້ທີ່ມີຄວາມຮູ້ ແລະ ປະສົບການ ທີ່ສາມາດຖ່າຍທອດໃຫ້ແກ່ຜູ້ອື່ນໆໄດ້. ກ່ອນທີ່ຈະເປັນຄູຕ້ອງມີຄວາມມັກຮັກພາກພູມໃຈ ແລະ ຮັກອາຊີບຄູແທ້ໆ, ຮັກເດັກນ້ອຍດ້ວຍຄວາມຈິງໃຈແທ້ໆ ແລະ ມີລະບຽບວິໄນ ຈຶ່ງສາມາດເປັນຄູໄດ້. ໃນເມື່ອເປັນຄູແລ້ວ ເຮົາຕ້ອງກໍາຈຸດພິເສດຂອງນັກຮຽນແຕ່ລະຄົນໄດ້ ສິ່ງນີ້, ແມ່ນເປັນບັນຫາທີ່ສໍາຄັນຈຶ່ງເຮັດໃຫ້ເດັກນ້ອຍຮູ້ວ່າ ເດັກນ້ອຍຜູ້ນີ້ເປັນນັກຮຽນເກັ່ງເຮົາສາມາດສົ່ງເສີມ ແລະ ຮູ້ໄດ້ວ່າວິຊາໃດ, ຂະແໜງໃດ ທີ່ເຂົາເຈົ້າຈະລົງເລິກ. ນອກຈາກນັ້ນ, ກໍປູກຈິດສໍານຶກໃຫ້ແກ່ເຂົາມີຄວາມຮູ້ຄວາມສາມາດ ຫຼື ວ່າມີຄວາມສາມັກຄີຮັກແພງຢູ່ພາຍໃນຫ້ອງກໍຄືໂຮງຮຽນ ຈຶ່ງສ້າງຄວາມສົນໃຈໃຫ້ກັບນັກຮຽນ ຢາກສົນໃຈຮຽນນໍາຄູຜູ້ນີ້. ຕາມທັດສະນະຂອງຕົນເອງຄໍາວ່າຄູດີເດັ່ນ ສາມາດແຍກອອກເປັນສອງດ້ານຄື: ດ້ານດີ ຄູແມ່ນສາມາດປະຕິບັດດ້ວຍຕົນເອງກໍຄືຄຸນສົມບັດດີ ກິລິຍາມາລະຍາດດີ ຮູ້ຮັກອາຊີບແພງເດັກ ມີຈິດໃຈໂອບອ້ອມອາລີຕໍ່ນັກຮຽນ, ພ້ອມມີຄວາມສາມັກຄີຮັກແພງກັບພະນັກງານໃນອົງກອນຂອງຕົນ ແລະ ຄໍາວ່າເດັ່ນແມ່ນສະແດງອອກໃນດ້ານຜົນງານເປັນຮູບປະທໍາ ກໍຄືຜົນງານທີ່ນັກຮຽນເສັງຈົບຊັ້ນ ປ.5, ຜົນງານເດັ່ນແມ່ນຍາດໄດ້ທີໜຶ່ງ, ສອງ, ສາມ ໃນຂັ້ນເມືອງ, ໄລຍະຜ່ານມາ ຜົນງານຈະເດັ່ນໄດ້ບໍ່ແມ່ນອາໄສແຕ່ຄູຄົນດຽວ ແຕ່ມັນແມ່ນຕ້ອງມີຫຼາຍອົງປະກອບພາຍໃນອົງກອນຂອງຕົນ ຊຶ່ງເລີ່ມຄູ ປ.1 ຕ້ອງປູພື້ນຖານຂຶ້ນມາ ແຕ່ລະຊັ້ນແບບຕໍ່ເນື່ອງ.
ທ່ານກ່າວຕື່ມວ່າ: ສໍາລັບຜົນງານຂອງຕົນໃນການສິດສອນ ຊັ້ນ ປ.5 ສົກຮຽນ 20221-2022 ນີ້, ເປັນສົກຮຽນທີ 8 ຊຶ່ງຮຸ່ນທໍາອິດໄດ້ສິດສອນວິຊາໂລກອ້ອມຕົວໃນສົກປີ 2015-2016 ໄດ້ມີນັກຮຽນເສັງຕິດອັນດັບໜຶ່ງທົ່ວເມືອງສີສັດຕະນາກ 1 ຄົນ, ສົກຮຽນ 2017-2018 ສາມາດຍາດໄດ້ທີໜຶ່ງ 1 ຄົນ, ສົກຮຽນ 2018-2019 ຍາດໄດ້ປະເພດໜຶ່ງ 2 ຄົນ ແລະ ສົກຮຽນ 2020-2021 ຍາດໄດ້ປະເພດໜຶ່ງ 2 ຄົນ. ນອກຈາກນີ້, ຕົນເອງຍັງໄດ້ມີໂອກາດບໍາລຸງນັກຮຽນເກັ່ງສາຍວິຊາໂລກອ້ອມຕົວ ຊັ້ນ ປ.5, ໃນສົກຮຽນປີ 2017-2018 ນັກຮຽນສາມາດຍາດໄດ້ນັກຮຽນເກັ່ງ ປະເພດສອງ ຂັ້ນນະຄອນຫຼວງວຽງຈັນ, ສົກປີ 2019-2020 ຍາດໄດ້ທີໜຶ່ງ ນັກຮຽນເກັ່ງຂັ້ນນະຄອນຫຼວງວຽງຈັນ. ໄລຍະທີ່ມີພະຍາດໂຄວິດ-19 ຄູກໍມີໂອກາດສອນໜ້ອຍ ໃຊ້ເວລາບໍາລຸງນັກຮຽນພຽງແຕ່ 1-2 ອາທິດ ແຕ່ນັກຮຽນກໍສາມາດເສັງຕິດອັນດັບທີ 3 ຂັ້ນນະຄອນຫຼວງວຽງຈັນ.
ໃນໂອກາດວັນຄູແຫ່ງຊາດທີ່ຈະມາເຖິງນີ້, ອວຍພອນໃຫ້ແກ່ຄູທຸກຄົນຢູ່ໃນທົ່ວປະເທດລາວ, ບ່ອນທີ່ທຸລະກັນດານ ຫ່າງໄກສອກຫຼີກ ຈົ່ງພ້ອມພາກັນເອົາໃຈໃສ່ຕໍ່ລູກ-ຫຼານ ໃນການຕັ້ງໃຈສຶກສາຮໍ່າຮຽນ ເພາະປັດຈຸບັນນີ້ ເຕັກໂນໂລຊີກໍທັນສະໄໝຫຼາຍ ຢູ່ເຂດຊົນນະບົດບາງພື້ນທີ່ ກໍສາມາດຮຽນທາງອອນລາຍໄດ້ແລ້ວ, ຄູສາມາດຊອກຮູ້ບົດຮຽນໃໝ່ໆ ເພື່ອນໍາໄປສິດສອນນັກຮຽນ ໃຫ້ມີຄວາມຫ້າວຫັນໃນການພັດທະນາຕົນເອງຢູ່ສະເໝີ, ຄູທຸກຄົນຈົ່ງມີສຸຂະພາບເຂັ້ມແຂງ ເຖິງວ່າຈະມີບັນຫາຫຍຸ້ງຍາກ ກໍຕ້ອງໄດ້ສູ້ຊົນຜ່ານຜ່າໃຫ້ໄດ້ ໃຊ້ຫຼາຍຮູບແບບ, ຫຼາຍວິທີສອນເຊັ່ນ: ສອນທາງອອນລາຍ, ບໍ່ວ່າຈະເປັນທາງກູໂກມີດ (Google meet), ກູໂກຊູມ (Google zoom) ແລະ ອື່ນໆ ທີ່ຄູແຕ່ລະທ່ານສາມາດເລືອກເອົາສິ່ງທີ່ຕົນຖະນັດເພື່ອສະດວກ ນໍາໃຊ້ເຂົ້າໃນການສອນ ແລະ ໃຫ້ນັກຮຽນໄດ້ຮຽນເປັນປົກກະຕິ.
ໂດຍ: ຍຸພີນທອງ
