ຊີວະປະຫວັດຂອງ ສະຫາຍ ມານູເອັນ ມາເຣໂຣ ກຣູຊ໌ ນາຍົກລັດຖະມົນຕີ ແຫ່ງ ສ ກູບາ
ສະຫາຍ ມານູເອັນ ມາເຣໂຣ ກຣູຊ໌
ວັນ, ເດືອນ, ປີເກີດ: 11 ກໍລະກົດ 1963
ນາຍົກລັດຖະມົນຕີ ແຫ່ງ ສາທາລະນະລັດ ກູບານັບແຕ່ປີ 2019 ຈົນເຖິງປັດຈຸບັນ.
ໄດ້ຮັບເລືອກຕັ້ງເປັນກຳມະການກົມການເມືອງສູນກາງພັກກອມມູນິດ ແຫ່ງ ສ ກູບາ ໃນກອງປະຊຸມໃຫຍ່ຄັ້ງທີ 8 ຂອງພັກກອມມູນິດກູບາ ໃນປີ 2021,
ສະມາຊິກສະພາແຫ່ງຊາດອຳນາດປະຊາຊົນ ນັບແຕ່ປີ 2018 ເປັນຕົ້ນມາ.
ເຂົ້າເປັນສະມາຊິກພັກກອມມູນິດກູບານັບແຕ່ປີ 1993.
ວິຊາສະເພາະ: ຈົບປະລິນຍາຕີສາຂາສະຖາປະນິກ ແລະ ປະລິນຍາໂທ ສາຂາບໍລິຫານລັດຈາກໂຮງຮຽນພະນັກງານລັດ ແລະ ລັດຖະບານແຫ່ງສາທາລະນະລັດກູບາ.
ການປະຕິບັດໜ້າທີ່ໄລຍະຜ່ານມາ:
ເລີ່ມເຮັດວຽກໃນຂະແໜງການທ່ອງທ່ຽວໃນປີ 1990 ຢູ່ ແຂວງໂອກິ່ນ (Holguín), ເຮັດວຽກກ່ຽວກັບການພັດທະນາຂອງກຸ່ມການທ່ອງທ່ຽວ Gaviota ແລະ ການກໍ່ສ້າງໂຮງແຮມ Río de Luna (ໂຮງແຮມສາຍນໍ້າດວງຈັນ) ຢູ່ຫາດຊາຍທະເລເອດສເມຣານດາ (Playa Esmeralda) ຢູ່ ແຂວງ ໂອກິ່ນ, ໄລຍະນັ້ນດຳລົງຕໍາແໜ່ງຮອງຜູ້ອໍານວຍການຝ່າຍການລົງທຶນ ແລະ ໄດ້ຮັບການເລື່ອນເປັນຮອງຜູ້ຈັດການທົ່ວໄປ ແລະ ຜູ້ອໍານວຍການໃຫຍ່ຂອງໂຮງແຮມສາຍນໍ້າດວງຈັນ (Río de Luna), ຕໍ່ມາໄດ້ຖືກເລື່ອນເປັນຮອງປະທານຂອງຕົວແທນກຸ່ມທ່ອງທ່ຽວ Gaviota ສໍາລັບບັນດາແຂວງພາກແຂວງໃຕ້ຂອງ ກູບາ;
ປີ 1996 ຖືກແຕ່ງຕັ້ງໃຫ້ຮັບຜິດຊອບຊີ້ນໍາ ແລະ ບໍລິຫານໂຮງແຮມບາຣາເດໂຣ (Varadero Azul) ຢູ່ແຂວງມາຕັງຊັດ ທາງພາກເໜືອຂອງ ກູບາ, ຕໍ່ມາກໍໄດ້ຖືກເລື່ອນເປັນຮອງປະທານຂອງຕົວແທນກຸ່ມການທ່ອງທ່ຽວGaviotaຢູ່ ບາຣາເດໂຣ, ແຂວງມາຕັງຊັດ;
ປີ 1999 ໄດ້ຮັບການເລື່ອນຕໍາແໜ່ງເປັນຮອງປະທານຜູ້ທີໜຶ່ງຂອງກຸ່ມການທ່ອງທ່ຽວ Gaviota ແຫ່ງຊາດແລະ ປີ 2001 ໄດ້ຮັບການແຕ່ງຕັ້ງເປັນປະທານຂອງກຸ່ມການທ່ອງທ່ຽວ ດັ່ງກ່າວ;
ປີ 2004 ໄດ້ຮັບການແຕ່ງຕັ້ງເປັນລັດຖະມົນຕີກະຊວງທ່ອງທ່ຽວ, ຊຶ່ງໄດ້ດໍາລົງຕຳແໜ່ງດັ່ງກ່າວເປັນເວລາ 16 ປີ;
ໃນເດືອນທັນວາ 2019 ໄດ້ຮັບການແຕ່ງຕັ້ງເປັນນາຍົກລັດຖະມົນຕີ ແຫ່ງ ສາທາລະນະລັດ ກູບາ
