ຂ່າວຕ່າງປະເທດລາຍງານ ເມື່ອທ້າຍອາທິດທີ່ຜ່ານມານີ້, ທົ່ວພາກພື້ນເອີຣົບເໜືອ ແລະ ເອີຣົບຕາເວັນຕົກ ຜູ້ຜະລິດຜັກຫຼາຍລາຍຕ່າງກໍຄິດທີ່ຈະຢຸດຕິການເຮັດການກະເສດຂອງພວກເຂົາ ເພາະຜົນກະທົບທາງດ້ານການເງິນຈາກວິກິດພະລັງງານຂອງເອີຣົບ ຊຶ່ງເປັນໄພຂົ່ມຂູ່ແຫຼ່ງອາຫານໃນທະວີບຫຼາຍຂຶ້ນ.
ການເພີ່ມຂຶ້ນຂອງລາຄາພະລັງງານ ແລະ ແກ໊ສທຳມະຊາດ ຈະສົ່ງຜົນກະທົບຕໍ່ພືດຜົນຫຼາຍຊະນິດທີ່ປູກຕະຫຼອດລະດູໜາວໃນເຮືອນແກ້ວ ຊຶ່ງມີລະບົບເຮັດຄວາມຮ້ອນເຊັ່ນ: ໝາກເລັ່ນ, ໝາກເຜັດ ແລະ ໝາກແຕງ ລວມເຖິງພືດທີ່ຈຳເປັນຕ້ອງເກັບໄວ້ໃນຫ້ອງເຢັນເຊັ່ນ: ໝາກແອັບເປິນ, ຫົວຫອມບົ່ວ ແລະ ໝາກອອງດີບ (Andive). ຊາວກະເສດໃນເອີຣົບຫຼາຍຄົນໄດ້ກ່າວເຕືອນເຖິງການຂາດແຄນ ເນື່ອງຈາກຜົນກະທົບທີ່ຄາດຄະເນໄວ້ຕໍ່ການຜະລິດ ແລະ ລາຄາທີ່ເພີ່ມສູງຂຶ້ນ ຈະເຮັດໃຫ້ຫ້າງຮ້ານຫຼາຍແຫ່ງອາດຈະປ່ຽນໄປຈັດຫາສິນຄ້າຈາກປະເທດທີ່ມີອາກາດອົບອຸ່ນຫຼາຍຂຶ້ນເຊັ່ນ: ໂມຣັອກໂກ, ຕຸຣະເຄຍ, ຕຸນິເຊຍ ແລະ ເອຢິບ. ນອກຈາກການຕໍ່ສູ້ກັບລາຄາພະລັງງານທີ່ເພີ່ມສູງຂຶ້ນ ກຸ່ມຊາວກະເສດໃນເອີຣົບຍັງຕ້ອງຮັບມືກັບລາຄາແກ໊ສ, ລາຄາປຸ໋ຍ, ສິ່ງບັນຈຸຜະລິດຕະພັນ, ການຂົນສົ່ງທີ່ລ້ວນແຕ່ມີລາຄາເພີ່ມຂຶ້ນ ແລະ ສ້າງຄວາມເສຍຫາຍຕໍ່ຜົນກຳໄລດ້ວຍເຊັ່ນກັນ. ເຖິງແມ່ນວ່າໃນປະເທດທີ່ມີແສງແດດທີ່ເໝາະສົມສຳລັບການປູກຝັງຢ່າງແອັສປາຍ ຊາວກະເສດຕະກອນຜັກ ແລະ ໝາກໄມ້ກັບກຳລັງປະສົບກັບຄວາມຍາກລຳບາກຈາກລາຄາປຸ໋ຍທີ່ເພີ່ມຂຶ້ນເຖິງ 25%.
ທາງດ້ານທ່ານ ແຈັກ ວອດ ຫົວໜ້າຜູ້ບໍລິຫານຂອງສະມາຄົມຜູ້ປູກຝັງແຫ່ງອັງກິດ (BGA) ກ່າວວ່າ ຜົນຜະລິດໝາກໄມ້ ແລະ ຜັກຈະປ່ຽນໄປຍັງພື້ນທີ່ທີ່ອົບອຸ່ນກວ່າຢ່າງຫຼີກລ່ຽງບໍ່ໄດ້. ໂດຍທ່ານ ວອດ ກ່າວຕື່ມວ່າ ພວກເຮົາຈະຍ້າຍການຜະລິດໄປທາງພາກໃຕ້ໃຫ້ໄກຫຼາຍຍິ່ງຂຶ້ນຜ່ານແອັສປາຍເຂົ້າໄປຍັງໂມຣັອກໂກ ແລະ ບາງສ່ວນຂອງອາຟຣິກາ
Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)
