ໃນວັນທີ 26 ກັນຍາ 2022, ທີ່ໂຮງແຮມລາວພລາຊາ ນະຄອນຫລວງວຽງຈັນ ໄດ້ມີການນຳສະເໜີ ແອບພລິເຄຊັນ ບຸກແນ (Book Nea) ໂດຍການຮ່ວມມືຂອງບໍລິສັດບຸກແນ່ອິນສ ຈຳກັດ ແລະ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ເຊິ່ງເປັນແອບໃຫ້ບໍລິການຈອງທີ່ພັກ, ຈອງປີ້ລົດເມ, ລົດໄຟລາວ-ຈີນ, ຈອງປີ້ກິດຈະກຳຄອນເສີດ ແລະ ຈອງປີ້ຍົນພາຍໃນປະເທດ ເພື່ອໃຫ້ບໍລິການທ່ອງທ່ຽວຮູບແບບໃໝ່ ໃຫ້ນັກທ່ອງທ່ຽວທັງພາຍໃນ ແລະ ຕ່າງປະເທດ ໄດ້ນຳໃຊ້ແອັບການບໍລິ ການແບບອອນລາຍ ໂດຍຄົນລາວສ້າງ 100%, ພ້ອມທັງສົ່ງເສີມການປະຊາສຳພັນ ການທ່ອງທ່ຽວໃຫ້ນັກທ່ອງທ່ຽວ ໄດ້ເຂົ້າເຖິງຂໍ້ມູນຂ່າວສານດ້ານການທ່ອງທ່ຽວພາຍໃນປະເທດ.
ທ່ານ ນາງ ດາລານີ ພົມມະວົງສາ ຫົວໜ້າກົມຄຸ້ມຄອງທຸລະກິດທ່ອງທ່ຽວ ກະຊວງ ຖວທ ໄດ້ມີຄຳເຫັນວ່າ: ການສ້າງແອັບດັ່ງກ່າວນີ້, ເປັນຄວາມຄິດທີ່ດີ ເຊິ່ງເປັນການສ້າງ ແລະ ພັດທະນາ ໃຫ້ເຊື່ອມໂຍງກັບຂໍ້ມູນຂ່າວສານ ທີ່ຮວບຮວມໄວ້ເທິງໂທລະສັບມືຖື ເພື່ອອຳນວຍຄວາມສະດວກ ໃຫ້ນັກທ່ອງທ່ຽວ ໂດຍການຮ່ວມມືຂອງພາກລັດ ແລະ ພາກທຸລະກິດ ໃຫ້ສາມາດບັນລຸຕາມຈຸດປະສົງ ແລະ ເປົ້າໃຫ້ມີປະສິດທິພາບຕາມທີ່ໄດ້ວາງໄວ້. ໃນນີ້, ພາກລັດຈະເປັນຜູ້ສົ່ງເສີມດ້ານນະໂຍບາຍ ແລະ ພາກທຸລະກິດເປັນຜູ້ຈັດຕັ້ງປະຕິບັດ ເພື່ອໃຫ້ນັກທ່ອງທ່ຽວໄດ້ນຳໃຊ້ ການບໍລິການທີ່ມີຄຸນນະພາບ ແລະ ປະສົບການທີ່ດີ ໃນດ້ານການທ່ອງທ່ຽວ, ຊຸກຍູ້ການພັດທະນາເສດຖະກິດ ແລະ ສັງຄົມ ໃນການກ້າວເຂົ້າສູ່ການຫັນເປັນເສດຖະກິດດີຈີຕອນເທື່ອລະກ້າວ.
ຂ່າວ: ສົມຫວັງ
ພາບ: ອ່າຍຄຳ
