ທີມນັກເຕະເຢຍລະມັນ ຈະໄດ້ຮັບເງິນໂບນັດ 400.000 ເອີໂຣ ຫາກຮ່ວມກັນຄວ້າແຊັມເຕະບານໂລກ 2022 ໃນໄລຍະທ້າຍປີນີ້ໄດ້.
ຢ້ອນກັບຄືນໄປໃນປີ 2014 ທີ່ຄວ້າແຊັມໂລກມາຄອງໄດ້ຢ່າງສໍາເລັດຜົນ ນັກເຕະຊຸດດັ່ງກ່າວ ໄດ້ຮັບເງິນໂບນັດຄົນລະ 300.000 ເອີໂຣ ກ່ອນທີ່ອີກ 4 ປີຖັດມາ ຈະພາດໂບນັດຄົນລະ 350.000 ເອີໂຣ ຫຼັງທີມພິກຕົກຮອບທໍາອິດຢ່າງສຸດຊ໊ອກ.
ທ່ານ ແບຣນ ນອຍເອນດອຟ ປະທານສະມາຄົມບານເຕະເຢຍລະມັນ ໄດ້ກ່າວຢືນຢັນເຖິງການອັດສີດໂບນັດຫຼັງຈາກເຂົ້າພົບກັບຕົວແທນນັກເຕະທີມຊາດທີ່ນໍາພາໂດຍ ມານູເອວ ນອຍເອີ, ໂທມັສ ມຸນເລີ, ໂຢຊົວ ຄິມມິຊ ແລະ ອິວຄາຍ ກຸນໂດກັນ.
“ ພວກເຮົາໄດ້ສົນທະນາຢ່າງຈິງຈັງ ເຊິ່ງດຳເນີນໄປດ້ວຍດີ ແລະ ມີຄວາມຄືບໜ້າ. ທ້າຍທີ່ສຸດ ຕົວເຮົາກໍຫາທາງອອກທີ່ຍອມຮັບໄດ້ສໍາລັບທຸກຄົນ ” ທ່ານ ນອຍເອນດອຟ ກ່າວ.
ສໍາລັບເຕະບານໂລກ 2022 ໃນຮອບສຸດທ້າຍ ເຢຍລະມັນ ໄດ້ຢູ່ີ່ວມກຸ່ມກັບ ແອັດສະປາຍ, ຄອສຕາລິກາ ແລະ ຍີ່ປຸ່ນ ໂດຍຈະລົງສະໜາມນັດທໍາອິດພົບກັບ ຍີ່ປຸ່ນ ໃນວັນທີ 23 ພະຈິກນີ້.
