ຕາມຂ່າວຈາກ BBC, ວັນທີ 22 ກັນຍານີ້ ອັດຕາເງິນເຟີ້ສີລັງກາເພີ່ມສູງຂຶ້ນ 70,2% ໃນເດືອນສິງຫານີ້ ແລະ ລາຄາອາຫານ ເພີ່ມສູງຂຶ້ນ 84,6% ເມື່ອທຽບໃສ່ປີກາຍ.
ຂະນະນີ້ ສີລັງກາຍັງບໍ່ສາມາດນຳເຂົ້າສິນຄ້າຈຳເປັນຈາກຕ່າງປະເທດໄດ້ເຊັ່ນ: ນ້ຳມັນເຊື້ອໄຟ, ປຸຍເຄມີ ແລະ ຢາປິ່ນປົວ ພະຍາດ ເນື່ອງຈາກຜະເຊີນກັບວິກິດທາງການເງິນ ແລະ ການເມືອງຄັ້ງໃຫຍ່ສຸດໃນຮອບ 70 ກວ່າປີຜ່ານມາ ລວມທັງ ບັນຫາການຂາດແຄນເງິນຕາຕ່າງປະເທດ.
ກ່ອນເກີດການແຜ່ລະບາດ ໂຄວິດ-19 ສີລັງກາໄດ້ອີງໄສ່ຂະແໜງອຸດສາຫະກຳການທ່ອງທ່ຽວເປັນຫລັກ ເຊິ່ງເປັນແຫລ່ງທີ່ມາຂອງເງິນຕາຕ່າງປະເທດໂດຍສະເພາະສະກຸນເງິນໂດລາສະຫະລັດ ແຕ່ຫລັງຈາກເກີດການແຜ່ລະບາດ ໂຄວິດ-19 ເຮັດໃຫ້ຫລາຍປະເທດຕ້ອງໃຊ້ມາດຕະການປິດຊາຍແດນເພື່ອຄວບຄຸມການແຜ່ລະບາດຈົນເຮັດໃຫ້ເສດຖະກິດຂອງສີລັງກາໄດ້ຮັບຜົນກະທົບຢ່າງຮຸນແຮງ.
ປັດຈຸບັນ ສີລັງກາມີປະຊາກອນ 22 ລ້ານຄົນ ຍັງຕ້ອງປະເຊີນກັບວິກິດການເສດຖະກິດພາຍໃນປະເທດຢ່າງຕໍ່ເນື່ອງ.
Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)
