ທ່ານ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ ປະທານສູນກາງແນວລາວສ້າງຊາດ (ສນຊ) ພ້ອມດ້ວຍຄະນະ ໄດ້ລົງມາເຄື່ອນໄຫວ ແລະ ຢ້ຽມຢາມເມືອງຫົງສາ ແຂວງໄຊຍະບູລີ.ໃນວັນທີ 21 ກັນຍາ ຜ່ານມານີ້, ໂດຍເປັນກຽດຕ້ອນຮັບຢ່າງອົບອຸ່ນຈາກທ່ານ ພົງສະຫວັນ ສິດທະວົງ ກໍາມະການສູນກາງພັກ ເລຂາພັກແຂວງ ເຈົ້າແຂວງໄຊຍະບູລີ ພ້ອມດ້ວຍຄະນະນຳຂອງແຂວງ ແລະ ເມືອງ. ຈາກນັ້ນ, ປະທານສູນກາງແນວລາວສ້າງຊາດ ກໍ່ໄດ້ພົບປະໂອ້ລົມພະນັກງານການນຳຂອງແຂວງ, ຂອງເມືອງ ແລະ ພະນັກງານຫຼັກແຫຼ່ງ ເມືອງຫົງສາຢູ່ທີ່ສະໂມສອນເມືອງ. ໃນໂອກາດນີ້, ສະຫະພັນແມ່ຍິງແຂວງໄຊຍະບູລີ ໄດ້ຂຶ້ນລາຍງານຫຍໍ້ການຈັດຕັ້ງເຄື່ອນໄຫວວຽກງານຮອບດ້ານ ໃນ 9 ເດືອນຜ່ານມາ ແລະ ທິດທາງແຜນການ 3 ເດືອນທ້າຍປີ 2022 ແລະ ແນວລາວສ້າງຊາດແຂວງ ໄດ້ລາບງານວຽກງານການນຳພາ-ຊີ້ນຳ ໃນໄລຍະ 8 ເດືອນຜ່ານມາ ແລະ ທິດທາງແຜນການຕໍ່ໜ້າ.
ໃນໂອກາດນີ້, ທ່ານ ປະທານ ສນຊ ໄດ້ມີຄໍາເຫັນຊົມເຊີຍຕໍ່ການນໍາພາ-ຊີ້ນໍາຂອງຄະນະການນຳແຂວງ-ເມືອງ, ສະແດງຄວາມຍ້ອງຍໍຊົມເຊີຍ ຕໍ່ຜົນສໍາເລັດທີ່ແນວລາວສ້າງຊາດແຂວງ ແລະ ສະຫະພັນແມ່ຍິງແຂວງ ສາມາດຍາດໄດ້ໃນໄລຍະຜ່ານມາ ພ້ອມນີ້, ທ່ານ ປະທານ ຍັງໄດ້ເນັ້ນໃຫ້ຈັດຕັ້ງຜັນຂະຫຍາຍ 4 ການປ່ຽນແປງຂອງວຽກງານແນວໂຮມກໍຄື: ສ້າງການຫັນປ່ຽນດ້ານຈິນຕະນາການ, ສ້າງການຫັນປ່ຽນທາງດ້ານການເງິນ, ສ້າງການຫັນປ່ຽນໃນຮູບການ ແລະ ວິທີການປຸກລະດົມຂົນຂວາຍ ແລະ ສ້າງການຫັນປ່ຽນຮູບແບບການຮ່ວມສຳພັນ ລະຫວ່າງອົງການພາຄີດ້ວຍກັນ. ຮຽກຮ້ອງມາຍັງ ຄະນະພັກແນວລາວສ້າງຊາດແຂວງ-ເມືອງ, ອົງການຈັດຕັ້ງມະຫາຊົນ, ພະນັກງານຫຼັກແຫຼ່ງ, ຜູ້ຊົງຄຸນວຸດທິ, ພະນັກງານປະຕິວັດອາວຸໂສບຳນານ, ທະຫານ-ຕຳຫລວດ ຈົ່ງເຊີດຊູຄວາມຮັບຜິດຊອບໃນໜ້າທີ່ການເມືອງຂອງຕົນ, ຕັດສິນໃຈຜ່ານຜ່າຄວາມທຸກຍາກ, ເຕົ້າໂຮມຄວາມສາມັກຄີເປັນປຶກແຜ່ນ ແລະ ຕັ້ງໜ້າປຸກລະດົມກຳລັງແຮງທົ່ວປວງຊົນລາວບັນດາເຜົ່າ ປະກອບສ່ວນຢ່າງຕັ້ງໜ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ-ຂອງເມືອງ ໃຫ້ບັນລຸຜົນສຳເລັດຕາມຄາດໝາຍ.
ໃນໂອກາດທີ່ລົງມາເຄື່ອນໄຫວຢ້ຽມຢາມ ແລະ ເຮັດວຽກຄັ້ງນີ້, ສູນກາງແນວລາວສ້າງຊາດ ໄດ້ມອບເງິນໃຫ້ແນວລາວສ້າງຊາດແຂວງ ຈຳນວນ 30 ລ້ານກີບ, ມອບຄອມຜິວເຕີຕັ້ງໂຕະ 1 ຊຸດ ພ້ອມດ້ວຍປິ່ນເຕີ 1 ເຄື່ອງ ໃຫ້ແນວລາວສ້າງຊາດເມືອງຫົງສາ ແລະ ສູນກາງສະຫະພັນແມ່ຍິງລາວ ມອບເງິນໃຫ້ສະຫະພັນແມ່ຍິງແຂວງ ຈຳນວນ 20 ລ້ານກີບ.
(ຂ່າວ-ພາບ: ກິດຕິສັກ ບົວໄລ)
