ຂ່າວສານຊີອາໄອລາຍງານ ເມື່ອວັນທີ 19 ກັນຍາທີ່ຜ່ານມານີ້, ທ່ານນາງ ເມົານີງ ໂຄສົກກະຊວງການຕ່າງປະເທດຈີນ ໄດ້ຈັດກອງປະຊຸມຖະແຫຼງຂ່າວ ໂດຍສື່ມວນຊົນມີຄຳຖາມວ່າ ປັດຈຸບັນ, ງານວາງສະແດງສິນຄ້າຈີນ-ອາຊຽນ ແລະ ກອງປະຊຸມສຸດຍອດການຄ້າ ແລະ ການລົງທຶນຈີນ-ອາຊຽນຄັ້ງທີ 19 ໄດ້ຈັດຂຶ້ນຢູ່ນະຄອນນານນິງ ເຂດປົກຄອງຕົນເອງເຜົ່າຈ້ວງກວາງຊີ. ໃນຖານະເປັນກິດຈະກຳທີ່ມີມູນເຊື້ອຂອງການຮ່ວມມືດ້ານເສດຖະກິດ-ການຄ້າລະຫວ່າງຈີນ-ອາຊຽນນັບແຕ່ປີ 2004 ເປັນຕົ້ນມາ, ງານວາງສະແດງສິນຄ້າເທື່ອນີ້ມີຄວາມໝາຍ ແລະ ໝາກຜົນພິເສດຫຍັງແດ່?
ທ່ານນາງ ເມົານີງ ແນະນຳວ່າ: ງານວາງສະແດງສິນຄ້າຈີນ-ອາຊຽນຄັ້ງນີ້ ໄດ້ຈັດກິດຈະກຳຊຸກຍູ້ການລົງທຶນ 40 ຄັ້ງ, ວິສາຫະກິດທີ່ເຂົ້າຮ່ວມງານວາງສະແດງມີ 1.653 ແຫ່ງ, ວິສາຫະກິດທີ່ເຂົ້າຮ່ວມງານວາງສະແດງຜ່ານທາງອອນລາຍມີຫຼາຍກວ່າ 2.000 ແຫ່ງ. ຝ່າຍຕ່າງໆໄດ້ເຊັນໂຄງການຮ່ວມມື 267 ໂຄງການ, ຍອດມູນຄ່າການລົງທຶນບັນລຸເຖິງ 413 ຕື້ຢວນ ເພີ່ມຂຶ້ນ 37% ເມື່ອທຽບໃສ່ງານວາງສະແດງສິນຄ້າຈີນ-ອາຊຽນຄັ້ງຜ່ານມາ.
ທ່ານນາງ ເມົານີງ ກ່າວຕື່ມວ່າ: ທ່ານເຊື່ອໝັ້ນວ່າ ໃນຖານະເປັນເວທີສຳຄັນທີ່ລົງເລິກການຮ່ວມມືລະຫວ່າງຈີນ-ອາຊຽນ ແລະ ຊຸກຍູ້ໃຫ້ເສດຖະກິດພາກພື້ນເຊື່ອມໂຍງເຂົ້າເປັນອັນໜຶ່ງອັນດຽວກັນ, ງານວາງສະແດງສິນຄ້າຈີນ-ອາຊຽນຈະເພີ່ມກຳລັງຂັບເຄື່ອນໃໝ່ ແລະ ສະໜອງໂອກາດໃໝ່ເພື່ອຊຸກຍູ້ໃຫ້ເສດຖະກິດຟື້ນຟູຢ່າງຕໍ່ເນື່ອງ ແລະ ກໍ່ສ້າງເສດຖະກິດພາກພື້ນແບບເປີດປະຕູ ຫຼັງຈາກການແຜ່ລະບາດຂອງພະຍາດໂຄວິດ-19.
Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)
