ຕາມຂ່າວຈາກ VOVWORLD, ວັນທີ 14 ກັນຍານີ້ ຢູ່ນະຄອນຫລວງ ຈາກາຕາ, ປະເທດ ອິນໂດເນເຊຍ, ກອງປະຊຸມ ລັດຖະມົນຕີ ເສດຖະກິດ ອາຊຽນ – ສະພາ ພາກພື້ນ ລົງທຶນ ອາຊຽນ ຄັ້ງທີ 25 ໄດ້ປະກາດ ບົດລາຍງານ ການລົງທຶນ ອາຊຽນ (AIR) ປີ 2022, ດ້ວຍຫົວຂໍ້ “ຟື້ນຟູ ພາຍຫລັງ ໂລກລະບາດ ໂຄວິດ-19 ແລະ ຫັນການລົງທຶນ ໃຫ້ສະດວກຍິ່ງຂຶ້ນ”. ບົດລາຍງານ ສະແດງ ໃຫ້ເຫັນແຫລ່ງ ເງິນລົງທຶນ ໂດຍກົງ ຈາກຕ່າງປະເທດ (FDI) ເຂົ້າອາຊຽນ ໄດ້ເພີ່ມຂຶ້ນ 42% ຂຶ້ນລະດັບ 174 ຕື້ ໂດລາ ສະຫະລັດ ໃນປີ 2021. ນີ້ແມ່ນລະດັບ ເພີ່ມຂຶ້ນ ສະຖິຕິ ກ່ອນເກີດ ໂລກລະບາດ ແລະ ຕ່າວປີ້ນ ສະພາບ ຫລຸດລົງ ຂອງປີ 2020 ຍ້ອນໂລກລະບາດ ໂຄວິດ-19. ບົດລາຍງານ ປະຈຳປີ ໄດ້ເນັ້ນໜັກເຖິງ ການຟື້ນຟູ ຢ່າງແຮງ ສະແດງ ໃຫ້ເຫັນ ຄວາມສາມາດ ຮັບມື ແລະ ການດຶງດູດ ຂອງ ອາຊຽນ, ດ້ວຍຖານະ ເປັນຈຸດ ລົງທຶນໃຫຍ່ ໃນໂລກ ແລະ ແມ່ນກຳລັງໜູນ ການເຕີບໂຕ FDI. ບົດລາຍງານ ດັ່ງກ່າວ ໄດ້ຮັບການສ້າງຂຶ້ນ ຕາມຂໍ້ຕົກລົງ ຮ່ວມມື ດ້ານເຕັກນິກ ລະຫວ່າງ ຄະນະເລຂາ ອາຊຽນ ແລະ ກອງປະຊຸມ ສະຫະ ປະຊາຊາດ ກ່ຽວກັບ ດ້ານການຄ້າ ແລະ ການພັດທະນາ.
(ພາກຂ່າວ: ຕ່າງປະເທດ)
ຮຽບຮຽງຂ່າວໂດຍ: ສະໄຫວ ລາດປາກດີ
