ປັດຈຸບັນເຖິງແມ່ນວ່າທົ່ວປະເທດການລະບາດຂອງພະຍາດໂຄວິດ-19 ໄດ້ຫຼຸດລົງຫຼາຍແລ້ວ ທຸກຄົນຍັງຕ້ອງສືບຕໍ່ປະຕິບັດມາດຕະການປ້ອງກັນຕົນເອງ ໂດຍສະເພາະໄລຍະນີ້ແມ່ນເລີ່ມເປີດສົກຮຽນໃໝ່ຂອງລູກຫຼານ,ນັກຮຽນ, ນັກສຶກສາ ແລະ ໄດ້ກັບຄືນເຂົ້າຮຽນປົກກະຕິແລ້ວ. ສະນັ້ນ, ຕ້ອງສືບຕໍ່ປະຕິບັດມາດຕະການປ້ອງກັນໂຄວິດ-19 ທີ່ກະຊວງສາທາລະນະສຸກວາງອອກຢ່າງເຂັ້ມງວດ ເພື່ອກັບໄປໂຮງຮຽນຢ່າງປອດໄພຫ່າງໄກຈາກການຕິດເຊື້ອພະຍາດໂຄວິດ-19.
ກະຊວງສາທາລະນະສຸກ ຍັງໄດ້ແນະນຳນັກຮຽນທຸກຄົນຄວນໄປຮັບວັກຊິນກັນພະຍາດໂຄວິດ-19 ໃຫ້ຄົບເຂັມ, ພ້ອມທັງ ເຂັມກະຕຸ້ນເພື່ອປ້ອງກັນຕົນເອງ ແລະ ຄົນອ້ອມຂ້າງລວມທັງຄູ-ອາຈານ, ພະນັກງານພາຍໃນໂຮງຮຽນ, ຕະຫຼອດຮອດຜູ້ປົກຄອງ, ຜູ້ໃຫຍ່ ແລະ ຜູ້ທີ່ຮອດເກນອາຍຸໃນການສັກວັກຊິນ, ເດັກນ້ອຍ, ຜູ້ທີ່ມີພະຍາດປະຈຳຕົວ, ພ້ອມນີ້ ເພື່ອຫຼຸດຄວາມສ່ຽງຈາກການຕິດເຊື້ອພະຍາດໂຄວິດ-19 ຢູ່ພາຍໃນໂຮງຮຽນຄື: ຄວນແນະນຳໃຫ້ນັກຮຽນທຸກຄົນໃສ່ຜ້າປິດປາກ-ດັງ, ໃນເວລາຢູ່ໃນໂຮງຮຽນ ແລະ ອັດປາກໃນເວລາໄອ ຫຼື ຈາມ, ຄູ-ອາຈານຕ້ອງເຕືອນນັກຮຽນທຸກຄົນວ່າພະຍາດໂຄວິດ-19 ຍັງຢູ່ອ້ອມໂຕເຮົາ, ເພາະສະນັ້ນ ທຸກຄົນຍັງຈຳເປັນຕ້ອງປະຕິບັດມາດຕະການປ້ອງກັນຕົນເອງຢ່າງເຂັ້ມງວດ ແລະ ເປັນປະຈຳ ເຊັ່ນ: ລ້າງມືໃສ່ສະບູ່, ເຫຼົ້າ,ແອກໍຮໍ ໃຫ້ສະອາດຢູ່ສະເໝີ, ເປີດປ້ອງຢ້ຽມໃຫ້ອາກາດຖ່າຍເທດີ, ຕ້ອງມີຖັງຂີ້ເຫຍື້ອແບບມີຝາອັດຢູ່ພາຍໃນໂຮງຮຽນ, ຮັກສາໄລຍະຫ່າງ, ພ້ອມແນະນຳໃຫ້ນັກຮຽນ-ຄູອາຈານ ຫຼື ພະນັກງານຄົນອື່ນພັກຜ່ອນຢູ່ເຮືອນ, ຖ້າຮູ້ສຶກບໍ່ສະບາຍບໍ່ຄວນຊື້ຢາມາກິນເອງ, ຄວນໄປພົບແພດໝໍເພື່ອປິ່ນປົວໃຫ້ທັນເວລາ.
ສຳລັບການໄປໂຮງຮຽນທີ່ປອດໄພຫ່າງໄກການຕິດເຊື້ອພະຍາດໂຄວິດ-19. ຖ້າເປັນໄປໄດ້ (ບ້ານຢູ່ໃກ້ກັບໂຮງຮຽນ) ຄວນຍ່າງ ຫຼື ຂີ່ລົດຖີບ, ລົດຈັກໄປໂຮງຮຽນເພື່ອຫຼີກລ່ຽງບ່ອນແອອັດ, ໃສ່ຜ້າປິດປາກ-ດັງຖ້າບໍ່ຫຼີກລ່ຽງບ່ອນຄົນແອອັດໄດ້, ລ້າງມືກ່ອນ ແລະ ຫຼັງການເດີນທາງ ແລະ ອື່ນໆ.
Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)
