ເມື່ອທ້າຍເດືອນສິງຫາ 2022 ຜູ້ຂຽນມີໂອກາດໄດ້ຮ່ວມເດີນທາງນໍາຄະນະຜູ້ແທນ ສະມາຄົມນັກຂ່າວ ແຫ່ງ ສປປ ລາວ ໄປເຄື່ອນໄຫວຢ້ຽມຢາມ ແລະ ເຮັດວຽກຢູ່ ສສ ຫວຽດນາມແລະ ໄດ້ມີໂອກາດ ໄປຢ້ຽມຫໍພິພິທະພັນສື່ມວນຊົນຫວຽດນາມ ທີ່ສະມາຄົມນັກຂ່າວ ສສ ຫວຽດນາມ ນະຄອນຫລວງຮ່າໂນ້ຍ.
ທ່ານ ເລ ກວັກມິງ ປະທານສະມາຄົມນັກຂ່າວແຫ່ງ ສສ ຫວຽດນາມ ກ່າວວ່າ: ຫໍພິພິທະພັນສື່ມວນຊົນຫວຽດນາມ ສ້າງຕັ້ງຂຶ້ນໃນປີ 2017 ແລະ ຂະບວນການເກັບກຳວັດຖຸພັນຕ່າງໆມີຄວາມຫຍຸ້ງຍາກທີ່ສຸດ ເພາະມັນໄດ້ຜ່ານເວລາມານັບ 100 ປີແລ້ວ ແລະ ກໍໄດ້ຫາຄວາມຊ່ວຍເຫລືອຈາກບັນດານັກຂ່າວຫລາຍໆພາກສ່ວນ ເຊັ່ນ: ສຳນັກຂ່າວສານຫວຽດນາມ, ວິທະຍຸກະຈາຍສຽງຫວຽດນາມ, ຮູບເງົາຂອງກອງທັບ ແລະ ອື່ນໆ, ມາຮອດປັດຈຸບັນ ວັດຖຸສິ່ງຂອງທີ່ນໍາມາວາງສະແດງເຫັນວ່າຍັງບໍ່ທັນຄົບຖ້ວນ, ແຕ່ເຖິງຢ່າງໃດກໍຕາມ ກໍຖືວ່າປຽບເໝືອນໂຮງຮຽນ ຫລື ມະຫາວິທະຍາໄລແຫ່ງປະຫວັດສາດ ເພື່ອສຶກສາອົບຮົມຮຸ່ນຄົນໃນປັດຈຸບັນ ແລະ ອະນາຄົດ ໃຫ້ໄດ້ຮຽນຮູ້ເຖິງປະຫວັດສາດ ແລະ ຄວາມເປັນມາຂອງສື່ມວນຊົນຫວຽດນາມ.
ຫໍພິພິທະພັນສື່ມວນຊົນ ປະກອບມີ 2 ຊັ້ນ, ມີເນື້ອທີ່ປະມານ 1.500 ຕາແມັດ ໂດຍໄດ້ແບ່ງເປັນຫ້ອງໂຖ ເພື່ອວາງສະແດງຮູບພາບ-ໜັງສືພິມ, ວັດຖຸພັນສິ່ງຂອງທີ່ລະນຶກ ແລະ ອຸປະກອນການເຄື່ອນໄຫວເກັບກຳຂ່າວຂອງບັນດາສື່ມວນຊົນ ໃນຫລາຍຍຸກຫລາຍສະໄໝ (ນັບແຕ່ເລີ່ມເຄື່ອນໄຫວປະຕິວັດ ມີທັງອັນປິດລັບ ແລະ ທີ່ເປີດເຜີຍຕໍ່ສາທາລະນະຊົນແຕ່ລະໄລຍະ) ຫ້ອງໂຖງເຊິ່ງໜ້າທຳອິດ ແມ່ນຮູບພາບປາຍປາກກາ ທີ່ເປັນສັນຍາລັກການຂີດຂຽນຂອງສື່ມວນຊົນ ທີ່ ປະທານໂຮ່ຈີ່ມິງ ເຄີຍໄດ້ສັ່ງສອນນັກຂ່າວວ່າ: “ຜູ້ເຮັດວຽກສື່ມວນຊົນຕ້ອງແມ່ນນັກຮົບປະຕິວັດ ຈ້ຳປາຍປາກກາຂຽນໃສ່ເຈັ້ຍກໍແມ່ນອາວຸດອັນແຫລມຄົມຂອງເຂົາ” ແລະ ຊ້າຍມືມີຮູບປັ້ນເຄິ່ງຄີງຂອງ ປະທານໂຮ່ຈິມິນ ແລະ ດ້ານຂວາແມ່ນຮູບປັ້ນນັກຂ່າວຍິງ 4 ຄົນທຳອິດຂອງສື່ມວນຊົນຫວຽດນາມ, ຫ້ອງທີ 2 ປະກອບດ້ວຍ ການປະມວນພາບໜັງສືພິມເກົ່າໆແຕ່ລະຍຸກແຕ່ລະສະໄໝ ແລະ ສາທິດການສາຍວິດີໂອສັ້ນ ທີ່ເປັນສັນຍາລັກໃນການເຄື່ອນໄຫວສົ່ງຂ່າວຫາກັນ, ມີຮູບແຕ້ມໃສ່ຝາຫີນ, ການສົ່ງສັນຍານເປົ່າເຂົາແບບພື້ນເມືອງ (ຜ່ານການສື່ສານແບບປະຖົມປະຖານ ສູ່ສິ່ງທີ່ທັນສະໄໝທີ່ມີການພັດທະນາ ມາເຖິງຍຸກ 4.0) ດ້ວຍການສົ່ງຂ່າວຜ່ານລະບົບອິນເຕີເນັດເຊື່ອມຕໍ່ທົ່ວໂລກ, ຫ້ອງຖັດມາ ມີການນຳສະເໜີໜັງສືພິມປະຕິວັດ ໂດຍແມ່ນ ປະທານໂຮ່ຈີ່ມິງ ເປັນຜູ້ກໍ່ຕັ້ງ ແລະ ຂຽນບົດຄວາມ-ບົດຂ່າວຈຳນວນໜຶ່ງ, ແນະນໍາໜັງສືພິມທີ່ປິດລັບ ແລະ ເປີດເຜີຍໃຫ້ຮູ້ຕື່ມອີກ, ພ້ອມສະແດງໃບຂ່າວຂອງນັກໂທດ ທີ່ຂຽນເຄື່ອນໄຫວປະຕິວັດສົ່ງອອກເຜີຍແຜ່ ແລະ ຫ້ອງວາງສະແດງເຄື່ອງມືການສື່ສານ. ພິເສດ ມີກ້ອງຖ່າຍຮູບເງົາ ທີ່ ປະທານສຸພານຸວົງ ໄດ້ມອບເປັນຂອງຂວັນໃຫ້ສື່ມວນຊົນຫວຽດນາມ.
ສຳລັບຊັ້ນ 2 ສ່ວນໃຫຍ່ເປັນການວາງສະແດງຮູບພາບ, ຜົນງານການເຄື່ອນໄຫວຕ່າງໆ ທັງພາຍໃນ ແລະ ຕ່າງປະເທດ, ຮູບພາບການດຳລົງຊີວິດ-ສັງຄົມ, ຕ້ານປະກົດການຫຍໍ້ທໍ້, ຕ້ານການສໍ້ລາດບັງຫລວງ ແລະ ບັນດາສື່ມວນຊົນທີ່ມີຊື່ສຽງ, ຫລຽນໄຊ ແລະ ທຸງໄຊ, ສິ່ງຂອງທີ່ລະນຶກຈາກນາໆປະເທດ, ມີຫ້ອງແນະນຳສື່ມວນຊົນເອເລັກໂທນິກ, ຫ້ອງຖັດມາແມ່ນຫ້ອງສະໝຸດ, ຫ້ອງປະຊຸມຂະໜາດນ້ອຍ ແລະ ເຂດອາໄລຮັກນັກຂ່າວຈຳນວນ 500 ລາຍຊື່ທີ່ເສຍຊີວິດ ໃນການປະຕິບັດໜ້າທີ່ ດ້ວຍຕົວໜັງສືສີຂາວພື້ນສີແດງ.
Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)
