ໃນວັນທີ 4 ກັນຍາ ຜ່ານມານີ້, ຄະນະຊີ້ນໍາດ້ານວຽກງານເນື້ອໃນຂອງ 3 ກອງທັບ (ກໍາປູເຈຍ – ລາວ – ຫວຽດນາມ) ໄດ້ລົງກວດກາຄວາມພ້ອມໃນດ້ານຕ່າງໆ ຂອງພາກສະໝາມ ຢູ່ທີ່ ອ່າງນ້ຳຫຸມ (ວິທະຍາຄານພະລາທິການກອງທັບ) ພ້ອມທັງຈັດກອງປະຊຸມເອກະພາບທາງດ້ານເນື້ອໃນການຝຶກຊ້ອມກອບກູ້ໄພພິບັດ ຮ່ວມກັນເປັນຄັ້ງທີ 3 ເຊິ່ງຕາງຫນ້າກອງທັບປະຊາຊົນລາວເຂົ້າຮ່ວມຂອງ ສະຫາຍ ພັນເອກ ປາດຖະໜາ ບຸດຕິຈັກ ຮອງຫົວໜ້າຫ້ອງການກົມໃຫຍ່ເສນາທິການກອງທັບ, ຕາງໜ້າກອງທັບປະຊາຊົນຫວຽດນາມເຂົ້າຮ່ວມຂອງສະຫາຍ ພົນຈັດຕະວາ ຮາເທະບິງ ຮອງຜູ້ບັນຊາການກົມໃຫຍ່ເສນາທິການ ທະຫານເຂດ 4 ສສ ຫວຽດນາມ ແລະ ຕາງໜ້າກອງທັບແຫ່ງຣາຊະອາຈັກກໍາປູເຈຍເຂົ້າຮ່ວມຂອງ ທ່ານ ພົນຕີ ແປນ ໂຊະກຣິດວິເຈຍ ຫົວໜ້າຄະນະຜູ້ແທນກອງທັບ ແຫ່ງຣາຊະອານາຈັກກໍາປູເຈຍ, ມີບັນດານາຍທະຫານ – ພະນັກງານວິຊາການ ພາກສ່ວນທີ່ກ່ຽວຂ້ອງທັງ 3 ຝ່າຍເຂົ້າຮ່ວມ.
ໃນກອງປະຊຸມແຕ່ລະພາກສ່ວນໄດ້ພ້ອມກັນປຶກສາຫາລື ແລະ ເປັນເອກະພາບເນື້ອໃນຄືນບາງຄຸງຫັດແອບເພື່ອໃຫ້ສ່ອດຄ່ອງກັບສະພາບເງື່ອນໄຂຕົວຈິງ ແນໃສ່ຍົກສູງຄວາມອາດສາມາດ ໃນການກອບກູ້ຊ່ວຍເຫຼືອປະຊາຊົນຜູ້ປະສົບໄພພິບັດທາງທໍາມະຊາດຂອງ 3 ກອງທັບ ໃຫ້ມີຄວາມເຂັ້ມແຂງ ແລະ ສາມາດຕອບໂຕ້ໄພພິບັດທີ່ອາດຈະເກີດຂຶ້ນໄດ້ຢ່າງທັນການ, ທັງເປັນການຝຶກຊ້ອມ, ການແລກປ່ຽນບົດຮຽນປະສົບການຮ່ວມມືທາງດ້ານວິຊາສະເພາະ, ໃຫ້ມີຄວາມຊໍານິຊໍານານ, ມີປະສົບປະການກຽມພ້ອມກອບກູ້ໄພພິບັດຮ່ວມກັນໃຫ້ໄດ້ຮັບຜົນດີ ສຳລັບແຜນການຝຶກຊ້ອມໃນຄັ້ງນີ້ປະກອບມີ 3 ພາກໃຫຍ່ຄື: ການກະກຽມບັນດາວຽກງານກ່ອນການຝຶກຊ້ອມ ແລະ ປະຕິບັດການຝຶກຊ້ອມ, ຊອກຄົ້ນກອບກູ້ຜູ້ປະສົບໄພທາງນໍ້າ, ລາດຕະເວນ-ຊອກຄົ້ນຫາຜູ້ປະສົບໄພຢູ່ຕາມຈຸດຕ່າງໆ ຊອກຄົ້ນກອບກູ້ຜູ້ປະສົບໄພຈົມຢູ່ໄຕ້ນໍ້າ, ກອບກູ້ຊອກຄົ້ນຜູ້ຕົກຄ້າງຢູ່ບ້ານ, ເຮືອນ, ເກາະດອນ, ສືບຕໍ່ຊອກຄົ້ນກອບກູ້ຜູ້ປະສົບໄພທີ່ຕົກຄ້າງຢູ່ຕາມ ເກາະດອນທີ່ເຮືອເຂົ້າບໍ່ເຖິງ ແລະ ຊອກຄົ້ນ-ກອບກູ້ຜູ້ປະສົບໄພທາງບົກ, ຊອກຄົ້ນ-ກອບກູ້ຜູ້ປະສົບໄພຕຶກອາຄານທະຫຼົ່ມ, ຊອກຄົ້ນ-ກອບກູ້ຜູ້ປະສົບໄພຂອບເຂດພູທີ່ມີດິນເຊາະເຈື່ອນ ແລະ ສິ້ນສຸດການຝຶກຊ້ອມ.
ຕາມແຜນການທີ່ທັງ 3 ກອງທັບໄດ້ເປັນເອກກະພາບກັນ ຄາດວ່າຈະເປີດບັ້ນຝຶກຊ້ອມກອບກູ້ໄພພິບັດ ໃນວັນທີ 10 ກັນຍາ 2022 ແລະ ຈະດໍາເນີນໄປເຖິງ ວັນທີ 13 ກັນຍາ 2022 ແລ້ວຈະຈັດຕັ້ງການທົດລອງຝຶກຊ້ອມປະສານສົມທົບ ຮ່ວມກັນລະຫວ່າງ 3 ກອງທັບ ກ່ອນຈະມີການຝຶກຊ້ອມຜ່ານໃຫ້ 3 ລັດຖະມົນຕີກະຊວງປ້ອງກັນປະເທດ ( ລາວ – ຫວຽດນາມ – ກໍາປຸເຈຍ ) ໄດ້ຮັບຊົມໃນວັນທີ 15 ກັນຍາ 2022.
ຂ່າວ-ພາບ: ລຸນທອງ
