ໃນວັນທີ 5 ກັນຍາຜ່ານມານີ້,ສະຫາຍພົນເອກ ຈັນສະໝອນ ຈັນຍາລາດ,ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ,ລັດຖະມົນຕີກະຊວງປ້ອງກັນປະເທດ,ພ້ອມດ້ວຍຄະນະນຳກະຊວງປ້ອງກັນປະເທດ, ຄະນະນໍາບັນດາກົມໃຫຍ່ ແລະພາກສ່ວນທີ່ກ່ຽວຂ້ອງໄດ້ລົງຊີ້ນຳ ແລະ ຮ່ວມສັງເກດການ, ແຕ່ລະບາດກ້າວການຫັດແອບຂອງກໍາລັງກອບກູ້ໄພພິບັດ ກອງທັບປະຊາຊົນລາວ (ຝ່າຍດຽວ)ຢູ່ທີ່ສະໝາມຫັດແອບອ່າງນ້ຳຫຸມວິທະຍາຄານພະລາທິການກອງທັບ.
ເຊິ່ງເນື້ອໃນການຫັດແອບໄດ້ແບ່ງອອກເປັນ 2 ພາກສ່ວນສໍາຄັນຄື: ການຊອກຄົ້ນ-ກອບກູ້ຜູ້ປະສົບໄພທາງນ້ຳ ຈັດຕັ້ງປະກອບເປັນ3ຈຸ ຄື: ຈຸທີ 1 ແມ່ນຈະໃຊ້ເຮືອລາດຕະເວນ 6 ລໍາເພື່ອຊອກຫາຜູ້ປະສົບໄພທີ່ຕົກຄ້າງຢູ່ຕາມຈຸດຕ່າງໆ, ຈຸທີ 2 ແມ່ນຊອກຄົ້ນກອບກູ້ຜູ້ປະສົບໄພທີ່ຈົມຢູ່ໃຕ້ນ້ຳດ້ວຍນັກດຳນ້ຳ, ສ່ວນຈຸທີ 3 ແມ່ນກອບກູ້ ແລະ ຍົກຍ້າຍຜູ້ປະສົບໄພ ຫລື ຜູ້ບາດເຈັບ ດ້ວຍເຮືອໄປຫາເຂດປອດໄພ ຫລັງຈາກນັ້ນທະຫານອາກາດຈະນຳໃຊ້ເຮືອບີນ Z-9 ບີນລາດຕະເວນຊອກຄົ້ນຜູ້ປະສົບໄພຕາມຈຸດຕ່າງໆ ທີ່ເຮືອບໍ່ສາມາດເຂົ້າເຖິງ ແລະ ເຮືອບິນ Mi -17 ບິນຍົກ, ຢ່ອນນັກກອບກູ້ລົງຊ່ວຍເຫລືອຜູ້ປະສົບໄພທີ່ຢູ່ຈຸດສູງ, ທຸລະກັນດານແລະຂອບເຂດນ້ຳຖວ້ມທີ່ມີສິ່ງກີດຂວາງ, ຕົ້ນໄມ້ຫັກທັບຖົມ.
ຈາກນັ້ນເຫລົ່າຮົບເສນາຮັກຮ່ວມກັບຊ່າງແສງພ້ອມກັນຊອກຄົ້ນ ແລະ ຄັດແຍກປະເມີນສະພາບຂອງຄົນເຈັບ ແລະ ນໍາສົ່ງຄົນເຈັບໄປຫາໜ່ວຍປະຖົມພະຍານບານໃນເບື້ອງຕົ້ນ ແລ້ວສົ່ງໄປໂຮງໝໍສະໝາມຕາມອາການ, ເມື່ອມາຮອດຈຸດດັ່ງກ່າວຈະມີການກວດກາຕິດຕາມຄົນເຈັບພ້ອມທັງປິ່ນປົວຄົນເຈັບ ແລະ ແຍກດ່ຽວຄົນເຈັບທີ່ຖືກສານເຄມີ ແລ້ວນຳສົ່ງໂຮງໝໍແນວຫລັງ, ພາກທີ 2 ແມ່ນການຊອກຄົ້ນ-ກອບກູ້ຜູ້ປະສົບໄພທາງບົກໂດຍເຫລົ່າຮົບຊ່າງແສງຮ່ວມກັບເຫລົ່າຮົບເສນາຮັກເຮັດການຊອກຄົ້ນຜູ້ປະສົບໄພອອກຈາກຕຶກອາຄານຖະຫລົ່ມ ແລະ ເຂດພູທີ່ມີດິນເຊາະເຈື່ອນ, ຄຽງຄູ່ກັບເຫລົ່າຮົບເຄມີກໍ່ໄດ້ເຮັດການຊ່ວຍເຫລືອຜູ້ທີ່ໄດ້ຮັບຜົນກະທົບຈາກສານເຄມີ, ຈັດຕັ້ງກວດກາ, ວິເຄາະຕົວຢ່າງສານເຄມີແລ້ວລົບລ້າງ.
ແລ້ວນໍາສົ່ງຕໍ່ໃຫ້ເຫລົ່າຮົບເສນາຮັກໂດຍມີການແຍກຄົນເຈັບ ໜັກ (ສີແດງ), ປານກາງ (ສີເຫລືອງ), ເບົາ (ຂາວຂຽວ) ແລະ ເສຍຊີວິດ (ສີດໍາ ) ພ້ອມດຽວກັນນັ້ນທະຫານອາກາດກໍໄດ້ນຳເອົາເຮືອບິນMi-17 ລົງຈອດສຸກເສີນເພື່ອຮັບເອົາຄົນເຈັບຫນັກ ໄປຫາໂຮງໝໍແນວຫລັງເພື່ອຮັບປະກັນໃຫ້ຄົນເຈັບໄດ້ຮັບການປິ່ນປົວໃຫ້ປອດໄຟ ແລະ ທັນເວລາ.
ໃນໂອກາດດຽວກັນນີ້ ສະຫາຍ ພົນເອກ ຈັນສະໝອນ ຈັນຍາລາດ, ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ກໍ່ໄດ້ໂອ້ລົມ : ກ່ອນອຶ່ນສະຫາຍສະແດງຄວາມຍ້ອງຍໍຊົມເຊີຍຕໍ່ການຫ້າງຫາກະກຽມຄວາມພ້ອມໃນດ້ານຕ່າງໆ ຂອງແຕ່ລະພາກສ່ວນ ພ້ອມທັງໄດ້ເນັ້ນໜັກ ໃຫ້ເປັນເຈົ້າການສືບສຸມໃສ່ຈັດຕັ້ງປະຕິບັດໜ້າທີ່ວຽກງານຂອງຕົນເອົາໃຈໃສ່ປັບປຸງແກ້ໄຂບາງໜ້າວຽກທີ່ຍັງ ບໍ່ທັນສອດຄ່ອງ, ຮີບຮ້ອນພ້ອມກັນແກ້ໄຂຂອດປະສານງານໃນການພົວພັນຮ່ວມມື,ດ້ານພາຫະເຕັກນິກ,ຈໍານວນພົນແຕ່ລະເຫຼົ່າຮົບຕ້ອງເປັນເຈົ້າການຈັດຕັ້ງປະຕິບັດບັນດາໜ້າວຽກງານຂອງຕົນໃຫ້ສໍາເລັດ ແລະ ທ່ວງທັນກັບໄລຍະເວລາໃນການຝຶກຊ້ອມກອບກູ້ໄພພິບັດໃນຄັ້ງນີ້ ໃຫ້ບັນລຸຜົນສຳເລັດຕາມລະດັບຄາດໝາຍທີ່ວາງໄວ້.
