ໃນວັນທີ 5 ກັນຍາ ສະຫະພັນນັກຮົບເກົ່າແຫ່ງຊາດລາວ ໄດ້ຖະແຫຼ່ງມູນເຊື້ອວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວ ຄົບຮອບ 20 ປີ ( 9/9/2002 – 9/9/2022 ). ໂດຍການຖະແຫຼ່ງຂ່າວຂອງ ສະຫາຍ ພົນໂທ ແສງນວນ ໄຊຍະລາດ ປະທານສະຫະພັນນັກຮົບເກົ່າແຫ່ງຊາດ.
ໂອກາດນີ້ ສະຫາຍ ພົນໂທ ແສງນວນ ໄຊຍະລາດ ປະທານສະຫະພັນນັກຮົບເກົ່າແຫ່ງຊາດລາວໄດ້ຍົກໃຫ້ເຫັນຜົນງານ ແລະ ໄຊຊະນະໝາກຜົນແຫ່ງການຈັດຕັ້ງນໍາພາຂອງຄະນະພັກ, ຄະນະບໍລິຫານງານສະຫະພັນນັກຮົບເກົ່າແຫ່ງຊາດລາວແຕ່ລະຂັ້ນຕະຫຼອດ 20 ປີ ຜ່ານມາ. ນັກຮົບເກົ່າແມ່ນຜູ້ອຸທິດຊີວິດເລືອດເນື້ອພາລະກິດປະຕິວັດກໍຄືພາລະກິດປະຫວັດສາດຂອງຊາດ ແມ່ນຜູ້ສ້າງພາລະກໍາປະຫວັດສາດທີ່ຍິ່ງໃຫຍ່ໄວ້ໃຫ້ແກ່ຄົນລຸ້ນສຶບທອດໄດ້ຮໍ່າຮຽນເອົາເປັນແບບຢ່າງ, ເຖິງແມ່ນວ່າພວກເພິ່ນຈະເສຍຊີວິດ, ເສຍອົງຄະ, ແກ່ຊະລາ, ຮັບອຸດໜູນ – ບໍານານ ຫຼື ອອກສ້າງເສດຖະກິດຄອບຄົວກໍ່ຕາມ ແຕ່ຕອນຍັງໜຸ່ມແໜ້ນພວກເພີ່ນເຫຼົ່ານັ້ນເຄີຍໄດ້ເຂົ້າ ຮ່ວມການສູ້ຮົບ ແລະ ຮັບໃຊ້ການສູ້ຮົບ ໃນພາລະກິດປົດປ່ອຍຊາດ ຕ້ານການຮຸກຮານຂອງພວກຈັກກະພັດຕ່າງດ້າວ ວິລະກຳຂອງພວກເພີ່ນຍັງອຳມະຕະນິລັນດອນ ແລະ ສະຖິດຢູ່ໃນໃຈຂອງປະຊາຊົນຜູ້ຮັກຊາດ, ຮັກຄວາມເປັນເອກະລາດ ອິດສະຫຼະພາບ ແລະ ຄວາມເປັນທຳຕະຫຼອດການ ນັກຮົບເກົ່າຍາມໃດກໍ່ມີຄວາມເດັດດ່ຽວໜ້ຽວແໜ້ນ ຮັກສາ ແລະ ເສີມຂະຫຍາຍ ທາດແທ້ມູນເຊື້ອປະຕິວັດ ມີຄວາມຈົ່ງຮັກພັກດີຕໍ່ພັກ ຕໍ່ປະເທດຊາດຢ່າງບໍ່ມີຂອບເຂດ ມີຄວາມຕັດສິນໃຈ ແລະ ເສຍສະຫຼະຢ່າງສູງສົ່ງ ເພື່ອຜົນປະໂຫຍດສ່ວນລວມຂອງປະເທດຊາດ, ມີແບບແຜນດຳລົງຊີວິດທີ່ປອດໃສຂາວສະອາດ ເປັນແວ່ນແຍ່ງອັນໃສແຈ້ງໃຫ້ແກ່ຄົນລຸ້ນສືບທອດ ບໍ່ວ່າທາງດ້ານແບບແຜນດຳລົງຊີວິດ ອຸດົມຄະຕິຫຼັກໝັ້ນຊົນຊັ້ນ ກໍ່ຄືການພັດທະນາເສດຖະກິດແກ້ໄຂຊີວິດການເປັນຢູ່ ແລະ ລົບລ້າງຄວາມທຸກຍາກ. ພ້ອມດຽວກັນນີ້, ສະຫະພັນນັກຮົບເກົ່າ ຍັງໄດ້ມີການພົວພັນຮ່ວມມືກັບສະມາຄົມນັກຮົບເກົ່າຕ່າງປະເທດ, ພາກພື້ນ ແລະ ສາກົນ. ມາຮອດປັດຈຸບັນ ກົງຈັກການຈັດຕັ້ງສະຫະພັນນັກຮົບເກົ່າຂັ້ນແຂວງມີ 17 ແຂວງ ແລະ ນະຄອນຫຼວງວຽງຈັນ ຂັ້ນເມືອງ 145 ເມືອງ 3 ນະຄອນ, ຂັ້ນບ້ານ 1726 ບ້ານ ເພີ່ມຂື້ນ 536 ໜ່ວຍ ເມື່ອທຽບໃສ່ປີ 2010 ສະມາຊິກທັງໝົດ 59,413 ສະຫາຍ ກວມເອົາ 72% ຂອງຈໍານວນນັກຮົບເກົ່າທັງໝົດ. ຈາກຜົນງານຂ້າງດັ່ງກ່າວ ສະຫະພັນນັກຮົບເກົ່າແຫ່ງຊາດລາວ ໄດ້ຮັບການຍ້ອງຍໍຈາກ ພັກ – ລັດຖະບານຄື: ຫຼຽນໄຊອິດສະຫຼະຊັ້ນ I 1 ໜ່ວຍ, ຫຼຽນໄຊແຮງງານຊັ້ນ I 1 ໜ່ວຍ, ຫຼຽນກາມິດຕະພາບ, ຫຼຽນກາກຽດຕິຄຸນ ແລະ ໃບຍ້ອງຍໍຈາກສະມາຄົມນັກຮົບເກົ່າອາຊຽນ ຢ່າງສົມກຽດ.
ໂດຍ: ໂຈ່ລີ້ ວົງໄຊ.
