ສະຫາຍພັນເອກ ບຸນສົດ ອິນສີນາ, ຮອງຫົວຫນ້າກົມຊ່າງແສງກົມໃຫຍ່ເສນາທິການກອງທັບ, ອະນຸກຳມະການວຽກງານຊ່າງແສງໃນບັ້ນຝຶກຊ້ອມກອບກູ້ໄພພິບັດຮ່ວມ 3 ກອງທັບ ໄດ້ໃຫ້ຮູ້ວ່າ: ເພື່ອຮັບປະກັນໃຫ້ການປະຕິບັດຫນ້າ ທີ່ການເມືອງຂອງເຫຼົ່າຮົບຊ່າງແສງໃຫ້ໄດ້ຮັບຜົນດີ, ຮັບປະກັນໃຫ້ແກ່ການສູ້ຮົບກໍຄືການຈັດຕັ້ງປະຕິບັດຕາມໜ້າທີ່ວິຊາສະເພາະໃນສະພາບການອັນຮີບດ່ວນ ແລະ ຈຳເປັນໃນການນຳໃຊ້ເຂົ້າໃນວຽກງານຕ້ານໄພພິບັດທຳມະຊາດໃຫ້ທັນກັບສະພາບການໃນສະເພາະຫນ້າ ແລະ ຍາວນານ ໂດຍສະເພາະແມ່ນເພື່ອຮັບປະກັນໃນການກອບກູ້, ເຄື່ອນຍ້າຍຜູ້ບາດເຈັບ ໃນບັ້ນຝຶກຊ້ອມກອບກູ້ໄພພິບັດ 3 ກອງທັບ.
ກົມຊ່າງແສງໄດ້ຈັດຕັ້ງນຳພາ 2 ກອງພັນ ເຄື່ອນໄຫວຈັດຕັ້ງປະຕິບັດໜ້າທີ່ວຽກງານຂອງຕົນ ຕາມການມອບໝາຍຂອງຂັ້ນເທິງ ດ້ວຍຄວາມຮັບຜິດຊອບສູງ ກົມຊ່າງແສງໄດ້ຈັດຕັ້ງນຳພາ 2 ກອງພັນ ,ກໍຄືກອງພັນ 588, 579 ແລະ ກອງຮ້ອຍ 58, ເຊິ່ງມີຈຳນວນພົນທັງໝົດ 123 ຄົນ, ນຳໃຊ້ເຮືອ PTS ຈຳນວນ 2 ລຳ, ເຮືອທ້ອງແບນ 13 ລຳ, ເຮືອລາດຕະເວນ 6 ລຳ ແລະ ເຮືອຢາງ 5 ລຳ, ເຊິ່ງທັງໝົດຈະແບ່ງອອກເປັນຫລາຍຈຸ, ແຕ່ລະຈຸຈະມີຄວາມຮັບຜິດຊອບທີ່ແຕກຕ່າງກັນໃນການຊອກຄົ້ນ-ກອບກູ້ ຜູ້ປະສົບ ໄພທີ່ຈົມຢູ່ໃຕ້ນໍ້າ ດ້ວຍໜ່ວຍຕ້ານ, ກອບກູ້ ແລະ ຍົກຍ້າຍເອົາຜູ້ທີ່ຕົກ ຄ້າງຢູ່ບ້ານເຮືອນ ແລະ ເກາະດອນທີ່ເຮືອສາມາດເຂົ້້າເຖິງຕາມຈຸດຕ່າງໆນຳສົ່ງໃຫ້ແກ່ເຫລົ່າຮົບເສນາຮັກເພື່ອດຳເນີນການປິ່ນປົ່ວ
ສະຫາຍພັນເອກ ບຸນສົດ ອິນສີນາ,ຍັງໃຫ້ຮູ້ຕື່ມອີກວ່າ:,ເຫລົ່າຮົບຊ່າງແສງຈະເຮັດສຸດຄວາມສາມາດ ເພື່ອຮັບປະກັນໃຫ້ການຝຶກຊ້ອມຮ່ວມກັບກໍາລັງເພື່ອນ ບັນລຸຕາມເປົ້າໝາຍທີ່ວາງໄວ້ ແລະ ຈະພະຍາຍາມສູ້ຊົນຍາດແຍ່ງເອົາບົດຮຽນ,ທັງແລກປ່ຽນປະສົບການກັບກຳລັງເພື່ອນ ມາຈັດຕັ້ງຜັນຂະຫຍາຍໝູນໃຊ້ເຂົ້າໃນຫນ້າທີ່ວຽກງານ, ວິຊາສະເພາະ ແລະ ສະພາບແວດລ້ອມຕົວຈິງພາຍໃນປະເທດເຮົາໃຫ້ເກີດຜົນສູງສຸດ.
ຂ່າວ-ພາບ: ລຸນທອງ
