ຂ່າວສານຫວຽດນາມລາຍງານວ່າ: ວັນທີ 1 ກັນຍາ ຜ່ານມາ, ກະຊວງການຄ້າ, ອຸດສາຫະກຳ ແລະ ພະລັງງານຂອງ ສ ເກົາຫຼີ ໄດ້ເປີດເຜີຍຂໍ້ມູນສະແດງໃຫ້ເຫັນວ່າ, ສ ເກົາຫຼີ ຂາດດຸນການຄ້າສູງສຸດໃນເດືອນສິງຫາ ຍ້ອນລາຄາພະລັງງານທົ່ວໂລກເພີ່ມສູງຂຶ້ນ, ເຖິງວ່າການສົ່ງອອກຂອງປະເທດເພີ່ມຂຶ້ນ 6,6% ເມື່ອທຽບໃສ່ໄລຍະດຽວກັນຂອງປີ 2021.
ຂ່າວລະບຸວ່າ: ກະຊວງການຄ້າ, ອຸດສາຫະກຳ ແລະ ພະລັງງານຂອງ ສ ເກົາຫຼີ ໃຫ້ຮູ້ວ່າ: ຍອດມູນຄ່າການສົ່ງອອກຂອງ ສ ເກົາຫຼີ ໃນເດືອນສິງຫາ ຢູ່ລະດັບ 56,67 ຕື້ໂດລາ, ເພີ່ມຂຶ້ນເມື່ອທຽບໃສ່ກັບລະດັບ 53,2 ຕື້ໂດລາ ໃນປີຜ່ານມາ ແລະ ເປັນເດືອນທີ 22 ຕິດຕໍ່ກັນທີ່ການສົ່ງອອກຂອງ ສ ເກົາຫຼີ ເພີ່ມຂຶ້ນເມື່ອທຽບໃສ່ໄລຍະດຽວກັນຂອງປີຜ່ານມາ. ເຖິງຢ່າງໃດກໍຕາມ, ສ ເກົາຫຼີ ໄດ້ຂາດດຸນການຄ້າປະມານ 9,47 ຕື້ໂດລາ ໃນເດືອນສິງຫາ ຊຶ່ງແມ່ນລະດັບສູງສຸດທີ່ເຄີຍມີມາໃນສະພາບການທີ່ການນໍາເຂົ້າເພີ່ມຂຶ້ນ 28,2% ເມື່ອທຽບກັບເດືອນສິງຫາ 2021 ເປັນ 66,15 ຕື້ໂດລາ, ຍ້ອນລາຄາພະລັງງານທົ່ວໂລກເພີ່ມຂຶ້ນສູງ. ການນຳເຂົ້າໄດ້ລື່ນກາຍການສົ່ງອອກໃນເດືອນສິງຫາ ແມ່ນເປັນເທື່ອທຳອິດນັບແຕ່ປີ 2008 ທີ່ ສ ເກົາຫຼີ ຂາດດຸນການຄ້າເປັນໄລຍະເວລາ 5 ເດືອນຕິດຕໍ່ກັນ.
