ຂ່າວສານ CRI ລາຍງານ: ໃນວັນທີ 31 ສິງຫາ ຫາ ວັນທີ 5 ກັນຍາ 2022, ງານຕະຫຼາດນັດການຄ້າການບໍລິການສາກົນຈີນປີ 2022 ໄດ້ຈັດຂຶ້ນຢູ່ນະຄອນຫຼວງປັກກິ່ງ ສປ ຈີນ. ງານຕະຫຼາດນັດການຄ້າການບໍລິການສາກົນຈີນໃນຖານະເປັນງານຊື້-ຂາຍສັງລວມລະດັບຊາດ ແລະ ສາກົນພຽງແຫ່ງດຽວຂອງໂລກທີ່ຈັດຂຶ້ນສະເພາະການຄ້າການບໍລິການ, ແມ່ນງານວາງສະແດງຂະໜາດໃຫຍ່ທີ່ສຸດໃນໂລກໃນຂົງເຂດການຄ້າການບໍລິການ.
ໃນວັນທີ 28 ພຶດສະພາປີ 2012, ງານຕະຫຼາດນັດການຄ້າປັກກິ່ງ ຊຶ່ງເປັນຕົ້ນກຳເນີດຂອງງານຕະຫຼາດນັດການຄ້າການບໍລິການສາກົນຈີນໄດ້ຈັດຂຶ້ນຢ່າງເປັນທາງການ ໂດຍເປັນເວທີການຄ້າສັງລວມພຽງແຫ່ງດຽວຂອງໂລກໃນເວລານັ້ນທີ່ກວມເອົາຂົງເຂດການຄ້າການບໍລິການ 12 ປະເພດໃຫຍ່ ທີ່ອົງການການຄ້າໂລກກຳນົດໄວ້ ເລີ່ມແຕ່ງານຕະຫຼາດນັດການຄ້າປັກກິ່ງຄັ້ງທຳອິດຫາຄັ້ງທີ 6, ມູນຄ່າການຊື້-ຂາຍໄດ້ເພີ່ມຂຶ້ນຢ່າງຕໍ່ເນື່ອງ, ໃນງານຕະຫຼາດນັດການຄ້າປັກກິ່ງຄັ້ງທີ 6 ທີ່ຈັດຂຶ້ນເມື່ອປີ 2019, ມູນຄ່າການຄ້າໄດ້ບັນລຸເຖິງ 105,06 ຕື້ໂດລາ, ມູນຄ່າໃນສັນຍາສາກົນທີ່ໄດ້ເຊັນກັນມີຫຼາຍກວ່າ 17,5 ຕື້ໂດລາ.
ປີ 2020, ງານຕະຫຼາດນັດການຄ້າປັກກິ່ງໄດ້ປ່ຽນຊື່ເປັນງານຕະຫຼາດນັດການຄ້າການບໍລິການສາກົນຈີນຢ່າງເປັນທາງການ ແລະ ກາຍເປັນງານມະໂຫລານທີ່ມີຂະໜາດນຳໜ້າໝູ່ໃນຂົງເຂດການຄ້າການບໍລິການຂອງໂລກ, ຮ່ວມກັນກັບງານຕະຫຼາດນັດສິນຄ້າຂາເຂົ້າ-ຂາອອກຈີນ ແລະ ງານວາງສະແດງສິນຄ້ານຳເຂົ້າສາກົນຈີນ, ກາຍເປັນເວທີ 3 ແຫ່ງໃນດ້ານການເປີດປະຕູສູ່ພາຍນອກຂອງຈີນ, ເຮັດໃຫ້ປະເທດຈີນ ແລະ ໂລກເຊື່ອມຈອດກັນຢ່າງໃກ້ຊິດ ເພີ່ມພະລັງງານຂອງປະເທດຈີນເຂົ້າໃນການເຕີບໂຕຂອງເສດຖະກິດໂລກ.
ຕະຫຼອດໄລຍະ 10 ປີຂອງການຈັດງານຕະຫຼາດນັດການຄ້າການບໍລິການສາກົນຈີນແມ່ນ 10 ປີທີ່ການຄ້າການບໍລິການຂອງຈີນພັດທະນາຢ່າງວ່ອງໄວ. ໃນ 10 ປີທີ່ຜ່ານມາ, ການຄ້າຂາເຂົ້າ-ຂາອອກດ້ານການບໍລິການຂອງຈີນໄດ້ເພີ່ມຂຶ້ນ 6,1% ສະເລ່ຍຕໍ່ປີ, ສູງກວ່າຄວາມໄວເຕີບໂຕສະເລ່ຍຂອງໂລກ 3,1%, ຄອງອັນດັບທີ 2 ຂອງໂລກເປັນ 8 ປີລຽນຕິດ. “ການບໍລິການຂອງປະເທດຈີນ” ໄດ້ພັດທະນາກ້າວຂຶ້ນເທື່ອລະກ້າວຮ່ວມກັນກັບ “ການຜະລິດຢູ່ຈີນ” ກາຍເປັນພາບທີ່ສວຍງານຂອງໂລກ.
ງານຕະຫຼາດນັດການຄ້າການບໍລິການຄັ້ງນີ້ໄດ້ສຸມໃສ່ຈຸດສຸມ ແລະ ທ່າອຽງດ້ານການຄ້າການບໍລິການ, ນອກຈາກງານວາງສະແດງສັງລວມແລ້ວ, ຍັງໄດ້ຈັດງານວາງສະແດງ 9 ຫົວຂໍ້ສະເພາະເຊັ່ນ: ໂທລະຄົມ, ຄອມພີວເຕີ ແລະ ການບໍລິການດ້ານຂໍ້ມູນຂ່າວສານ, ການບໍລິການດ້ານການທະນາຄານ ແລະ ອື່ນໆ ໄດ້ດຶງດູດວິສາຫະກິດ 2.436 ແຫ່ງ ເຂົ້າຮ່ວມງານວາງສະແດງ ຊຶ່ງຫຼາຍກວ່າງານຄັ້ງທີ່ຜ່ານມາ, ໄດ້ກວມເອົາເຖິງ 30 ປະເທດ ແລະ ເຂດແຄ້ວນທີ່ນຳໜ້າໝູ່ດ້ານການຄ້າການບໍລິການ.
ຄຳຂວັນຂອງງານຕະຫຼາດນັດຄັ້ງນີ້ແມ່ນ “ບໍລິການທົ່ວໂລກ, ແບ່ງປັນຜົນປະໂຫຍດຊຶ່ງກັນ ແລະກັນ” ຊຶ່ງເປັນການບັນລະຍາຍຫຼັກການຂອງການເປີດປະຕູສູ່ພາຍນອກຂອງຈີນທີ່ໃຫ້ປະໂຫຍດແກ່ກັນ ແລະ ກັນ, ກໍ່ສ້າງຮ່ວມກັນ ແລະ ຊົມໃຊ້ຮ່ວມກັນ. ພາຍໃຕ້ສະພາບການທີ່ພະຍາດໂຄວິດ-19 ສືບຕໍ່ແຜ່ລະບາດໃນທົ່ວໂລກ, ສະພາບແວດລ້ອມສາກົນບໍ່ໝັ້ນທ່ຽງ, ປັດໄຈບໍ່ແນ່ນອນເພີ່ມຂຶ້ນ, ເສດຖະກິດໂລກຟື້ນຕົວຄືນໃໝ່ທີ່ບໍ່ທັນເຂັ້ມແຂງ, ງານຕະຫຼາດນັດການຄ້າການບໍລິການສາກົນຈີນໄດ້ສ້າງໂອກາດຟື້ນຟູໃຫ້ແກ່ອຸດສາຫະກຳການບໍລິການ, ສ້າງຈຸດເຕີບໂຕໃໝ່ ແລະ ໂອກາດຟື້ນຟູຄືນໃໝ່ໃຫ້ແກ່ເສດຖະກິດໂລກ ຊຶ່ງເປັນການປະກອບສ່ວນດ້ານພະລັງແຮງຂອງຈີນເຂົ້າໃນການຟື້ນຟູເສດຖະກິດ ແລະ ການພັດທະນາຂອງໂລກ.
Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)
