ຂ່າວຕ່າງປະເທດລາຍງານ ເມື່ອວັນທີ 31 ສິງຫາ ທີ່ຜ່ານມານີ້, ເມື່ອເຄື່ອງບິນໃບພັດຄູ່ເລີ່ມບິນຂຶ້ນສູ່ທ້ອງຟ້າພາຍໃຕ້ທະເລຊາຍທີ່ອົບເອົ້າພ້ອມກັບຖັງເກືອຫຼາຍສິບຖັງຕິດຢູ່ທີ່ປີກຂອງເຄື່ອງບິນ ທີ່ມີຄວາມສູງ 9.000 ຟຸດ ເໜືອລະດັບນ້ຳມະເລ ເຄື່ອງບິນຈະປ່ອຍເກືອໃສ່ກຸ່ມກ້ອນເມກສີຂາວ ເພື່ອຫວັງຈະກະຕຸ້ນໃຫ້ເກີດຝົນຕົກ.
ທ່ານ ອັບດຸນເລາະ ອັນ-ຮຳມາດີ ເຈົ້າໜ້າທີ່ອຸຕຸນິຍົມວິທະຍາ ແລະ ຫົວໜ້າປະຕິບັດການເພີ່ມປະລິມານຝົນຕົກໃນພື້ນທີ່ຈາກສູນອຸຕຸນິຍົມວິທະຍາແຫ່ງຊາດຂອງ ສະຫະລັດອາຣັບເອມິເຣດ (UAE) ໄດ້ສະແກນແຜນທີ່ສະພາບອາກາດເທິງໜ້າຈໍຄອມພີວເຕີ ເພື່ອຊອກຫາການກໍ່ໂຕຂອງເມກ ພ້ອມທັງກ່າວວ່າ ການເຮັດຝົນທຽມຈຳເປັນຕ້ອງມີເມກຝົນ ແຕ່ມັນກໍຍັງເປັນບັນຫາເຊັ່ນດຽວກັນ ເພາະບໍ່ແມ່ນວ່າມັນຈະເກີດຂຶ້ນສະເໝີໄປ.
ກ່ອງບັນຈຸສານເຄມີສຳລັບຝົນທຽມແມ່ນຕິດຢູ່ກັບປີກຍົນຂອງສູນອຸຕຸນິຍົມວິທະຍາແຫ່ງຊາດລະຫວ່າງການປະຕິບັດພາລະກິດຝົນທຽມໃນນະຄອນຫຼວງອາບູດາບີ ຂອງ UAE. ຜົນກະທົບຂອງການປ່ຽນແປງສະພາບອາກາດບວກກັບຈຳນວນປະຊາກອນທີ່ເພີ່ມຂຶ້ນ ແລະ ເສດຖະກິດທີ່ແຜ່ກະຈາຍສູ່ພາກການທ່ອງທ່ຽວ ແລະ ອື່ນໆເປັນໂຕຊຸກຍູ້ຄວາມຕ້ອງການນ້ຳໃນ UAE ຊຶ່ງຕ້ອງອາໄສໂຮງງານແຍກເກືອອອກຈາກນ້ຳທະເລທີ່ມີລາຄາສູງ ທີ່ໃຊ້ປະໂຫຍດຈາກນ້ຳເຄັມ. ທັງນີ້, ເຈົ້າໜ້າທີ່ຫຼາຍຄົນເຊື່ອວ່າ ຝົນທຽມສາມາດຊ່ວຍເຫຼືອໃນເລື່ອງນີ້ໄດ້ ໂດຍກຸ່ມນັກວິທະຍາສາດໃນນະຄອນຫຼວງອາບູດາບີໄດ້ປະສົມປະສານການຍິງເກືອດູດຄວາມຊຸ່ມກັບການອະນຸພາກນາໂນຂອງເກືອ ຊຶ່ງເປັນເຕັກໂນໂລຊີທີ່ໃໝ່ກວ່າເຂົ້າໄປໃນກຸ່ມກ້ອນເມກ ເພື່ອກະຕຸ້ນ ແລະ ເລັ່ງຂະບວນການຄວບແໜ້ນ ແລະ ຫວັງວ່າຈະສາມາດຜະລິດເມັດນ້ຳຂະໜາດໃຫຍ່ພໍທີ່ຈະຕົກລົງມາເປັນຝົນໄດ້.
ທ່ານ ຮຳມາດີ ກ່າວວ່າ: ການເຮັດຝົນທຽມ ຊ່ວຍເພີ່ມອັດຕາປະລິມານນ້ຳຝົນປະມານ 10%-30% ຕໍ່ປີ ແລະ ຈາກການຄຳນວນຂອງພວກເຮົາ ແລະ ການປະຕິບັດການຝົນທຽມມີຄ່າໃຊ້ຈ່າຍໜ້ອຍກວ່າຂະບວນການແຍກເກືອອອກຈາກນ້ຳທະເລ ຂະນະທີ່ ທ່ານ ເອັດເວີກ ເກຣແຮມ ນັກອຸຕຸນິຍົມວິທະຍາຈາກມະຫາວິທະຍາໄລໄຮແລນ ແອນ ໄອແລນ (Highlands and Islands) ໃນອັງກິດກ່າວວ່າ ເກືອທີ່ໃຊ້ໃນການເຮັດຝົນທຽມໃນ UAE ບໍ່ເປັນອັນຕະລາຍຕໍ່ສິ່ງແວດລ້ອມ.
Medialaos MMD (ແຫູ່ງຂໍ້ມູນຈາກ: ໜັງສືພິມ ປະຊາຊົນ)
