ໃນລະຫວ່າງວັນທີ 28-29 ສິງຫາ 2022 ທີ່ຜ່ານມາ, ສະຫາຍ ແສງເພັດ ຮຸ່ງບຸນຍວງ ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈໍາ ສສ ຫວຽດນາມ ໄດ້ນຳ ພາຄະນະ ແຂວງໄຊສົມບູນ, ໄຊຍະບູລີ ແລະ ແຂວງຊຽງຂວາງ ເຂົ້າຮ່ວມພິທີສະຫລອງປີສາມັກຄີມິດຕະພາບ 2022 ຄື: ວັນສ້າງຕັ້ງສາຍພົວພັນການທູດ ຄົບຮອບ 60 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 45 ປີ ທີ່ແຂວງເຊີນລາ.
ໃນໂອກາດດຽວກັນ ກໍໄດ້ເຂົ້າຢ້ຽມຂໍ່ານັບ ສະຫາຍ ຫງວຽນ ຮິວ ດົງ ກຳມະການສູນກາງພັກ ເລຂາພັກແຂວງເຊີນລາ ເຊິ່ງໃນການພົບປະຄັ້ງນີ້, ການນໍາແຂວງເຊີນລາ ກໍໄດ້ສະແດງຄວາມຍິນດີຕ້ອນຮັບ, ຕີລາຄາສູງທີ່ສະຫາຍເອກອັກຄະລັດຖະທູດ ພ້ອມຄະນະ ໄດ້ເດີນທາງໄປຢ້ຽມຢາມ ແລະ ເຮັດວຽກຢູ່ແຂວງເຊີນລາ ໃນທ່າມກາງບັນຍາກາດທີ່ສອງປະເທດພວມຈັດຕັ້ງກິດຈະກໍາຕ່າງໆ ເພື່ອພ້ອມກັນສະເຫລີມ ສະຫລອງສອງວັນປະຫວັດສາດັ່ງກ່າວ ເພື່ອຫວນຄືນສອງວັນປະຫວັດສາດທີ່ສຳຄັນ ພິເສດແມ່ນເຂົ້າຮ່ວມພິທີມອບຮັບໃບຢັ້ງຢືນຈັດລະດັບອານຸສອນສະຖານແຫ່ງຊາດພິເສດເຂດອານຸສອນສະຖານປະຫວັດສາດປະຕິວັດລາວ-ຫວຽດນາມ ທີ່ບ້ານລາວໂຄ, ຕາແສງພຽງຄວາຍ, ເມືອງອຽນເຈົາ, ແຂວງເຊີນລາ.
ໂອກາດນີ້ສະຫາຍ ຫງວຽນ ຮິວ ດົງ ຍັງໄດ້ລາຍງານໂດຍຫຍໍ້ກ່ຽວກັບສະພາບການພັດທະນາເສດຖະກິດ-ສັງຄົມ ຂອງແຂວງໃນໄລຍະຜ່ານມາ ພ້ອມທັງໄດ້ແຈ້ງໃຫ້ຊາບການພົວພັນຮ່ວມມືກັບ ສປປ ລາວ ໂດຍສະເພາະແຂວງເຊີນລາໄດ້ເຊັນບົດບັນທຶກການແຮກສ່ຽວກັບ 09 ແຂວງ ເຊັ່ນ: ແຂວງຫົວພັນ, ຜົ້ງສາລີ, ຫລວງນ້ຳທາ, ອຸດົມໄຊ, ບໍ່ແກ້ວ, ໄຊຍະບູລີ, ຫລວງພະບາງ, ຊຽງຂວາງ ແລະ ແຂວງໄຊສົມບູນ. ພ້ອມທັງແຈ້ງໃຫ້ຊາບກ່ຽວກັບໂຄງການຊ່ວຍເຫລືອ ຂອງແຂວງເຊີນລາໃຫ້ກັບບັນດາແຂວງພາກເໜືອຂອງລາວໃນໄລຍະຜ່ານມາ.
ສະຫາຍ ແສງເພັດ ຮຸ່ງບຸນຍວງ ກໍໄດ້ສະແດງຄວາມຂອບໃຈໃນການຕ້ອນຮັບອັນອົບອຸ່ນ ແລະ ເປັນກັນເອງ ໃນຖານສະຫາຍອ້າຍນ້ອງ ພ້ອມທັງສະແດງຄວາມຊົມເຊີຍໝາກຜົນການພັດ ທະນາເສດຖະກິດ-ສັງຄົມໃນໄລຍະຜ່ານມາຂອງແຂວງ ເຊິ່ງບັນດາຜົນສຳເລັດດັ່ງກ່າວກໍໄດ້ສະແດງໃຫ້ເຫັນເຖິງການວາງແນວທາງທີ່ຖືກຕ້ອງ, ຄວາມສາມາດໃນການຊີ້ນຳ-ນຳພາຂອງອົງຄະນະພັກ, ອຳ ນາດການປົກຄອງ ແລະ ການເປັນຈິດໜຶ່ງໃຈດຽວຂອງປະຊາຊົນແຂວງເຊີນລາ. ພ້ອມທັງຕີລາຄາສູງການພົວພັນຮ່ວມມືລະຫວ່າງສອງປະເທດໃນດ້ານການເມືອງ, ປ້ອງກັນຊາດ-ປ້ອງກັນຄວາມສະຫງົບສືບຕໍ່ເປັນເສົາຫລັກໃຫ້ແກ່ການພົວພັນລວມຂອງສອງປະເທດ. ພ້ອມນັ້ນ, ກໍສະເໜີໃຫ້ສອງຝ່າຍສືບຕໍ່ ຊ່ວຍເຫລືອເຊິ່ງກັນ ແລະ ກັນ ເພື່ອແນ່ໃສ່ໃນການເສີມສ້າງຄວາມເຂັ້ມແຂງການພັດທະນາເສດຖະ ກິດ-ສັງຄົມຂອງແຂວງພາກເໜືອຂອງລາວ ໂດຍສະເພາະແມ່ນການຊຸກຍູ້ໃຫ້ນັກລົງທຶນ ເຂົ້າໄປລົງ ທຶນຢູ່ແຂວງພາກເໜືອຂອງລາວ.
ຈາກນັ້ນ, ຄະນະ ຍັງໄດ້ໄປວາງພວງມະລາດອກໄມ້ທູບທຽນ ທີ່ສະໜາມຫລວງອານຸສອນສະ ຖານປະທານໂຮ່ຈິມິນ, ເຂົ້າຮ່ວມພິທີມອບຮັບໃບຢັ້ງຢືນຈັດລະດັບອານຸສອນສະຖານແຫ່ງຊາດ ພິເສດເຂດອານຸສອນສະຖານປະຫວັດສາດ ປະຕິວັດລາວ-ຫວຽດນາມ ທີ່ບ້ານລາວໂຄ, ຕາແສງພຽງຄວາຍ, ເມືອງອຽນເຈົາ, ແຂວງເຊີນລາ. ພາຍຫລັງຮ່ວມພິທີສະຫາຍ ເອກອັກຄະລັດຖະທູດ ພ້ອມດ້ວຍການນຳແຂວງພາກເໜືອຂອງລາວ ໄດ້ຮ່ວມປູກຕົ້ນໄມ້ທີ່ເຂດອານຸສອນສະຖານປະຫວັດສາດການປະຕິວັດລາວ-ຫວຽດນາມທີ່ບ້ານລາວໂຄ ອີກດ້ວຍ.
ຂ່າວ-ພາບ: ສະຖານທູດລາວທີ່ຮ່າໂນ້ຍ
Medialaos MMD
