ກອງປະຊຸມເຜີຍແຜ່ມາດຕະຖານ ການດໍາເນີນການປະສານງານ ແລະ ຄຸ້ມຄອງການປະສານງານ ແລະ ການສົ່ງຕໍ່ແມ່ຍິງ ແລະ ເດັກຍິງ ທີ່ຖືກຄວາມຮຸນແຮງ ໄດ້ຈັດຂຶ້ນ ໃນວັນທີ 30 ສິງຫາ 2022 ໂດຍການເປັນປະທານຂອງ ທ່ານນາງ ອິນລາວັນ ແກ້ວບຸນພັນ ປະທານສູນກາງສະຫະພັນແມ່ຍິງລາວ, ຮອງປະທານ ຜູ້ປະຈໍາການ ຄະນະກໍາມາທິການແຫ່ງຊາດ ເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ(ຄຊກມດ), ທ່ານ ນາງ ມາຣຽມ ເອຄານ ຜູ້ຕາງໜ້າອົງການສະຫະປະຊາຊາດ ກອງທຶນເພື່ອປະຊາກອນ ປະຈໍາລາວ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ທ່ານນາງ ອິນລາວັນ ແກ້ວບຸນພັນ ໄດ້ມີຄໍາເຫັນວ່າ: ໃນໄລຍະຜ່ານມາ ລັດຖະ ບານລາວ ໄດ້ພະຍາຍາມໃນການປະຕິບັດພັນທະ ຕໍ່ສົນທິສັນຍາວ່າດ້ວຍການລຶບລ້າງທຸກຮູບແບບການຈໍາແນກຕໍ່ແມ່ຍິງ, ສົນທິສັນຍາວ່າດ້ວຍສິດທິເດັກ ແລະ ເອກະສານຕ່າງໆ ຂອງສາກົນ ໃນການຊ່ວຍໃຫ້ຜູ້ຖືກຄວາມຮຸນແຮງໄດ້ເຂົ້າເຖິງ ການບໍລິການທີ່ມີຄຸນນະພາບແຕ່ໃນການປະຕິບັດຕົວຈິງ ກໍຍັງອີງໃສ່ບັນດາກົດໝາຍພາຍໃນ ສປປ ລາວ ແລະ ນັບຈາກນີ້ ຖືວ່າ ພັກເຮົາຈະມີບ່ອນອີງໃນການປະສານງານ, ການຄຸ້ມຄອງການປະສານງານ ແລະ ການສົ່ງຕໍ່ ໂດຍນໍາໃຊ້ມາດຕະຖານສາກົນ ແລະ ສອດຄ່ອງກັບກົດໝາຍ ແລະ ນິຕິກໍາລຸ່ມກົດໝາຍຢູ່ ສປປ ລາວ ເພື່ອທຸກຂະແໜງການທີ່ມີການບໍລິການຕ້ອງໄດ້ປະສານງານກັນ ແລະ ມີການປະສານງານກັບພາກສ່ວນອື່ນ ລະຫວ່າງຂະແໜງສຸຂະພາບ, ຂະ ແໜງຍຸຕິທໍາ, ຕໍາຫລວດ ແລະ ຂະແໜງສັງຄົມໃນລະດັບສູນກາງ ແລະ ທ້ອງຖິ່ນ ພ້ອມທັງມີຄວາມຮັບຜິດຊອບຮ່ວມກັນຢ່າງຮອບດ້ານ ແລະ ໃນນາມຮອງປະທານ ຄຊກມດ ແລະ ຕາງໜ້າລັດຖະບານ ຂໍຂອບໃຈຕໍ່ການສະໜັບສະໜູນ ແລະ ຊ່ວຍເຫລືອ ຂອງອົງ ການສະຫະປະຊາຊາດ ກອງທຶນສໍາລັບປະຊາກອນປະຈໍາລາວ ແລະ ລັດຖະບານ ອົດສະຕຣາລີ ທີ່ໃຫ້ການສະໜັບສະໜູນໃນກາສ້າງມາດຕະຖານດັ່ງກ່າວ ແລະ ການແຕ່ງຕັ້ງຄະນະຄຸ້ມຄອງ, ການປະສານງານ ແລະ ການສົ່ງຕໍ່, ຂອບໃຈ ປະເທດເພື່ອນມິດສາກົນ, ອົງການຈັດຕັ້ງສາກົນ ກໍຄື ບັນດາຄູ່ຮ່ວມພັດທະນາຕ່າງໆ ທີ່ໄດ້ປະກອບສ່ວນອັນສໍາຄັນທາງດ້ານທຶນຮອນ, ວິຊາການ ເຂົ້າໃນການຈັດຕັ້ງປະຕິບັດກົດໝາຍ ແລະ ແຜນດໍາເນີນງານແຫ່ງຊາດ ເພື່ອປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ແລະ ຄວາມຮຸນແຮງຕໍ່ເດັກ ໄລຍະຜ່ານມາ ໄດ້ສໍາເລັດເປັນຢ່າງດີ.
ທ່ານນາງ ມາຣຽມ ເອຄານ ໄດ້ກ່າວວ່າ: ການສຳຫລວດແຫ່ງຊາດ ກ່ຽວກັບຄວາມຮຸນແຮງຕໍ່ແມ່ຍິງໃນລາວ ປີ 2014 ສະແດງໃຫ້ເຫັນວ່າ ແມ່ຍິງ 1 ໃນ 3 ຄົນໄດ້ປະສົບກັບຄວາມຮຸນແຮງຢ່າງໜ້ອຍໜຶ່ງປະເພດ (ທາງກາຍ, ທາງເພດ ແລະອາລົມ) ໃນຊ່ວງໄລຍະໃດໜຶ່ງ ຂອງຊີວິດເຂົາເຈົ້າ. ເຖິງຢ່າງໃດກໍຕາມ ມີແມ່ຍິງລາວປະມານ 10% ເທົ່ານັ້ນ ທີ່ໄດ້ລາຍງານ ຫລື ຊອກຫາການບໍລິການຈາກເຈົ້າໜ້າທີ່ ເຊັ່ນ: ສຸກສາລາ, ອົງການແມ່ຍິງ ຫລື ຕຳຫລວດ, ນີ້ແມ່ນເນື່ອງມາຈາກ ການຂາດຄວາມຮູ້, ຄວາມໄວ້ວາງໃຈ ແລະ ການຈຳກັດ ການບໍລິການທີ່ມີຄຸນນະພາບ ແລະ ມາດຕະຖານການດໍາເນີນງານນີ້, ມີຈຸດປະສົງ ເພື່ອຮັບປະກັນວ່າ: ບໍ່ມີປະຕູທີ່ຜິດ ສໍາລັບ ຜູ້ລອດຊີວິດທີ່ຊອກຫາການຊ່ວຍເຫລືອ, ຜູ້ລອດຊີວິດອາດຈະເຂົ້າໄປໃນລະບົບຢູ່ໃນຫລາຍຈຸດ ດ້ວຍຕົນເອງຢູ່ສຸກສາລາ ທີ່ໃກ້ທີ່ສຸດ, ຕຳຫລວດ, ທີ່ພັກອາໄສທີ່ປອດໄພທີ່ໃກ້ທີ່ສຸດຖ້າມີ ຫລື ໂທຫາສາຍດ່ວນ ຂອງສະຫະພັນ ເເມ່ຍິງລາວ, ຜູ້ໃຫ້ບໍລິການທັງໝົດຕ້ອງສາມາດໃຫ້ການດູແລ ໂດຍອີງໃສ່ບົດບາດຂອງເຂົາເຈົ້າ ແລະ ໄດ້ຮັບການຝຶກຝົນເພື່ອອ້າງອີງເຖິງການບໍລິການ ແລະ ຂະແໜງການ ອື່ນໆ.
#Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)
