ເມື່ອບໍ່ດົນມານີ້, ກະຊວງສຶກສາທິການ ແລະ ກິລາ ຮ່ວມກັບລັດຖະບານອົດສະຕຣາລີ ໂດຍຜ່ານແຜນງານບີຄວາ ຈັດສຳມະນາ ໃຫ້ແກ່ນັກຂຽນຫລັກສູດວິທະຍາສາດ ແລະ ສິ່ງແວດລ້ອມ ສະບັບປັບປຸງໃໝ່ຊັ້ນ ປ5 ເຊິ່ງຫລັກສູດດັ່ງກ່າວ ໄດ້ເນັ້ນໃສ່ການຮຽນຮູ້ດ້ວຍການປະຕິບັດຕົວຈິງ ຜ່ານການທົດລອງ ທີ່ຈະຊ່ວຍໃຫ້ນັກຮຽນສາມາດໝູນໃຊ້ວິທະຍາສາດ ເຂົ້າໃນຊີວິດປະຈໍາວັນ ແລະ ໃນສະພາບແວດລ້ອມຊຸມຊົນຂອງເຂົາເຈົ້າ.
ໂອກາດນີ້, ບັນດານັກຂຽນຫລັກສູດໄດ້ທວນຄືນ, ພ້ອມທັງປຶກສາຫາລືກ່ຽວກັບຫົວຂໍ້ ແລະ ແນວຄວາມຄິດຫລັກໆ ທີ່ຈະສ້າງໃນປຶ້ມແບບຮຽນວິຊາວິທະຍາສາດ ແລະ ສິ່ງແວດລ້ອມ ຊັ້ນ ປ5 ແລະ ຄູ່ມືຄູສະບັບໃໝ່; ໄດ້ສຳຫລວດ ແລະ ຮ່ວມກັນວາງແຜນ ການທົດລອງທີ່ເໝາະສົມສຳລັບນັກຮຽນຊັ້ນປະຖົມ ໃນ ສປປ ລາວ ແລະ ການນຳໃຊ້ອຸ ປະກອນພື້ນຖານທີ່ມີຢູ່ທຸກບ່ອນ ໂດຍຖືເອົານັກຮຽນເປັນສູນກາງ ເພື່ອເນັ້ນໃສ່ການມີປະ ສົບການ ແລະ ປະຕິບັດວິທະຍາສາດ ຫລາຍກວ່າການຮຽນຮູ້ເນື້ອໃນບົດຮຽນ, ທັງນີ້ ກໍເພື່ອຜົນປະໂຫຍດຂອງນັກຮຽນເອງ ເຊິ່ງນັກຮຽນຈະໄດ້ຮຽນຮູ້ໂດຍການສຳຫລວດສະພາບແວດລ້ອມທ້ອງຖິ່ນ, ປະກົດການທຳມະຊາດ ແລະ ສິ່ງທີ່ສ້າງຂຶ້ນໂດຍມະນຸດ ທີ່ສົ່ງຜົນກະທົບຕໍ່ຊີວິດຂອງພວກເຂົາ ແລະ ແນວຄວາມຄິດວິທະຍາສາດທີ່ຕິດພັນກັບສິ່ງເຫລົ່ານັ້ນ.
ທ່ານ ບານໃຈ ມາລາວົງ ຮັກສາການຫົວໜ້າຂະແໜງວິທະຍາສາດ ໄດ້ກ່າວວ່າ: ວິທະຍາສາດ ແລະ ສິ່ງແວດລ້ອມ ເປັນວິຊາທີ່ມີປະໂຫຍດ, ປະກອບມີບົດຮຽນທີ່ສໍາຄັນຈໍານວນຫລາຍ ທີ່ສາມາດນໍາໃຊ້ໂດຍນັກຮຽນ ໃນຊີວິດປະຈໍາວັນຂອງພວກເຂົາ ເຊິ່ງບົດຮຽນທີ່ນັກຮຽນສາມາດນໍາມາປະຕິບັດຢູ່ເຮືອນໄດ້ງ່າຍໆ ແມ່ນການຂະຫຍາຍພັນພືດ ໂດຍພວກເຂົາຈະໄດ້ຮຽນຮູ້ວິທີການປູກຜັກທີ່ບໍ່ໃຊ້ແກ່ນ, ນີ້ແມ່ນວິທີການແຜ່ຂະຫຍາຍພັນພືດທີ່ງ່າຍ ທີ່ນັກຮຽນສາມາດທົດລອງຢູ່ເຮືອນໄດ້. ນອກຈາກນີ້, ຫລັກສູດຍັງລວມເອົາດ້ານຕ່າງໆທີ່ຄວນເອົາໃຈໃສ່ ເຊັ່ນ: ຄວາມປອດໄພ, ການສ້າງບົດຮຽນທີ່ຈະຊ່ວຍໃຫ້ນັກ ຮຽນຮູ້ເຖິງອັນຕະລາຍຂອງໄຟຟ້າ, ນໍ້າ ຫລື ອາຫານທີ່ປົນເປື້ອນ ແລະ ການປະຕິບັດທີ່ດີເພື່ອສຸຂະອະນາໄມ ເຊັ່ນ: ການລ້າງມືດ້ວຍສະບູ ຫລື ດື່ມນໍ້າຈາກຂວດທີ່ມີສະຫລາກຜະລິດຕະພັນ ຫລື ນໍ້າທີ່ຕົ້ມສຸກ ຫລື ຖືກກັ່ນຕອງແລ້ວ.
ຫລັກສູດວິທະຍາສາດ ແລະ ສິ່ງແວດລ້ອມ ຊັ້ນ ປ5 ສະບັບປັບປຸງໃໝ່ນີ້ ຈະຖືກຈັດພິມ ແລະ ແຈກຍາຍຢູ່ໃນໂຮງຮຽນ, ພ້ອມທັງການຝຶກອົບຮົມໃຫ້ຄູ ໃນຂອບເຂດທົ່ວປະເທດ ໂດຍໄດ້ຮັບການສະໜັບສະໜູນຈາກ ລັດຖະບານອົດສະຕຣາລີ ໂດຍຈະເລີ່ມຈັດຕັ້ງປະຕິບັດໃນເດືອນກັນຍາ 2023 ເປັນຕົ້ນໄປ.
#Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)
