ວິທະຍຸກະຈາຍສຽງຫວຽດນາມລາຍງານວ່າ, ຕາມໂຕເລກຫຼ້າສຸດຂອງ ກະຊວງກະສິກຳ ແລະ ພັດທະນາຊົນນະບົດ ຫວຽດນາມ ໃຫ້ຮູ້ວ່າ: ໃນ 8 ເດືອນຂອງປີ 2022, ຍອດວົງເງິນສົ່ງອອກຜະລິດຕະພັນກະເສດ, ເຄື່ອງປ່າຂອງດົງ, ສິນໃນນ້ຳຂອງຫວຽດນາມ ຄາດວ່າບັນລຸປະມານ 66,2 ຕື້ໂດລາ, ເພີ່ມຂຶ້ນ 8,7% ເມື່ອທຽບໃສ່ໄລຍະດຽວກັນຂອງປີກາຍ. ໃນຈຳນວນນັ້ນ, ມູນຄ່າການສົ່ງອອກຄາດວ່າປະມານ 36,3 ຕື້ໂດລາ, ເພີ່ມຂຶ້ນ 13%.
ໃນ 8 ເດືອນຜ່ານມາ, ມີ 7 ຜະລິດຕະພັນ, ໝວດຜະລິດຕະພັນທີ່ມີມູນຄ່າການສົ່ງອອກຫຼາຍກວ່າ 2 ຕື້ໂດລາ ລວມມີ: ກາເຟ, ຢາງພາລາ, ເຂົ້າສານ, ໝາກໄມ້, ໝາກມ່ວງຫິມະພານ… ພ້ອມກັນນັ້ນ, ຫຼາຍປະເພດສິນຄ້າບັນລຸມູນຄ່າການສົ່ງອອກສູງກວ່າ ເມື່ອທຽບໃສ່ໄລຍະດຽວກັນຂອງປີກາຍຄື: ກາເຟ, ຢາງພາລາ, ເຂົ້າສານ, ໝາກພິກໄທ, ມັນຕົ້ນ.
ກ່ຽວກັບຕະຫຼາດສົ່ງອອກ, ໃນ 8 ເດືອນຜ່ານມາ, ບັນດາຕະຫຼາດຂຶ້ນກັບພາກພື້ນອາຊີ, ກວມອັດຕາສ່ວນສູງສຸດດ້ວຍລະດັບຫຼາຍກວ່າ 43%, ຈາກນັ້ນແມ່ນ ທະວີບອາເມຣິກາ, ເອີຣົບ, ທະວີບໂອເຊອານີ ແລະ ອາຟຣິກາ. ອາເມຣິກາ ສືບຕໍ່ແມ່ນຕະຫຼາດສົ່ງອອກໃຫຍ່ທີ່ສຸດ, ອັນດັບທີ 2 ແມ່ນຕະຫຼາດ ຈີນ, ອັນດັບທີ 3 ແມ່ນຕະຫຼາດຍີ່ປຸ່ນ ແລະ ອັນດັບທີ 4 ແມ່ນຕະຫຼາດ ສ ເກົາຫຼີ.
ໃນປີ 2022, ກະຊວງກະສິກຳ ແລະ ພັດທະນາຊົນນະບົດ ຫວຽດນາມ ຈະປະຕິບັດໃຫ້ສຳເລັດການເຈລະຈາເປີດປະຕູຕະຫຼາດສຳລັບບັນດາຜະລິດຕະພັນ ຊຶ່ງລວມມີ ໝາກລຳໄຍ ສົ່ງອອກໄປຍັງ ຍີ່ປຸ່ນ; ສືບຕໍ່ເຈລະຈາບັນດາຜະລິດຕະພັນໝາກນອດ, ໝາກພ້າວ ເພື່ອສົ່ງອອກໄປອາເມຣິກາ.
