ຂ່າວຕ່າງປະເທດລາຍງານ ເມື່ອວັນທີ 29 ສິງຫາທີ່ຜ່ານມານີ້, ທ່ານ ນາງ ເອລີຊາເບດ ບຣອນ ນາຍົກລັດຖະມົນຕີຝຣັ່ງໄດ້ເປີດເຜີຍວ່າ: ຝຣັ່ງໄດ້ເພີ່ມງົບປະມານເຂົ້າໃນກອງທຶນດ້ານສິ່ງແວດລ້ອມດ້ວຍວົງເງິນ 1,5 ພັນລ້ານເອີໂຣ ຊຶ່ງຈະຈັດສັນໃຫ້ກັບອົງການໃນພາກສ່ວນທ້ອງຖິ່ນ ເພື່ອຮີບເລັ່ງດຳເນີນການປ່ຽນແປງດ້ານລະບົບນິເວດພາຍໃນປະເທດ.
ທ່ານນາຍົກລັດຖະມົນຕີຝຣັ່ງກ່າວວ່າ: ກອງທຶນດ້ານສິ່ງແວດລ້ອມນີ້ຈະຊ່ວຍໃຫ້ໜ່ວຍງານໃນລະດັບທ້ອງຖິ່ນໄດ້ນຳແນວທາງເພື່ອທີ່ຈະຫຼຸດປະລິມານການປ່ອຍແກັສເຮືອນແກ້ວມາໃຊ້ ແລະ ປະຍຸກໃຊ້ກັບບັນຫາການປ່ຽນແປງຂອງສະພາບພູມອາກາດ. ທ່ານກ່າວຕື່ມວ່າ ຈະນຳສະເໜີແຜນການດ້ານພະລັງງານ ແລະ ແຜນແມ່ບົດໃນໄລຍະຍາວດ້ານການວາງແຜນລະບົບນິເວດໃນໄລຍະລະດູໃບໄມ້ຫຼົ່ນນີ້ດ້ວຍແຜນທີ່ຈະຮີບເລັ່ງການປ່ຽນແປງດ້ານລະບົບນິເວດ ຈະເຮັດໃຫ້ພວກເຮົາສາມາດລົງມືເຮັດໃນເລື່ອງຂອງຕຶກອາຄານ, ລະບົບຂົນສົ່ງ, ອຸດສາຫະກຳການກະເສດ ແລະ ການບໍລິຫານຈັດການນ້ຳ.
ທ່ານນາງ ບຣອນ ກ່າວຕື່ມວ່າ: ການປ່ຽນແປງຂອງສະພາບພູມອາກາດບໍ່ແມ່ນຄວາມສ່ຽງ ແຕ່ເປັນຄວາມຈິງ ທຸກຄົນໄດ້ປະເຊີນກັບສະຖານະການນີ້ໄປແລ້ວໃນໄລຍະລະດູຮ້ອນທີ່ຜ່ານມາ ດັ່ງນັ້ນ, ພວກເຮົາຈະຕ້ອງຮີບດຳເນີນການເພື່ອທີ່ຈະປ່ຽນແປງ ແລະ ຖືເປັນເລື່ອງສຳຄັນທີ່ພວກເຮົາຈະຕ້ອງຊີ້ແຈງຂໍ້ເທັດຈິງກັບປະຊາຊົນຊາວຝຣັ່ງ.
