ກົມຕຳຫຼວດສະກັດກັ້ນ ແລະ ຕ້ານການຄ້າມະນຸດ ຮ່ວມກັບ ກົມຕຳຫຼວດຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ກະຊວງປ້ອງກັນຄວາມສະຫງົບ (ປກສ) ໄດ້ຈັດຕັ້ງຝຶກອົບຮົມຄູຝຶກວຽກງານໂຄສະນາສະກັດກັ້ນ ແລະ ຕ້ານການຄ້າມະນຸດໃຫ້ແກ່ເຈົ້າໜ້າທີ່ຕຳຫຼວດຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ 5 ແຂວງ ຂຶ້ນໃນທ້າຍອາທິດຜ່ານມານີ້ ທີ່ສະໂມສອນກອງບັນຊາການ ປກສ ແຂວງສາລະວັນ, ໃຫ້ກຽດເຂົ້າຮ່ວມມີ ທ່ານ ພັທ ກິແກ້ວ ຈັນທະລັງສີ ຮອງຫົວໜ້າກົມຕຳຫຼວດສະກັດກັ້ນ ແລະ ຕ້ານການຄ້າມະນຸດ ກະຊວງ ປກສ, ມີແຂກຖືກເຊີນ ແລະ ພາກສ່ວນກ່ຽວຂ້ອງຈາກສູນກາງ ແລະ ສໍາມະນາກອນຈາກ 5 ແຂວງພາກໃຕ້ຄື: ປກສ ແຂວງສາລະວັນ,ສະຫວັນນະເຂດ, ຈຳປາສັກ, ເຊກອງ, ອັດຕະປຶ ເຂົ້າຮ່ວມ.
ການຝຶກອົບຮົມຄັ້ງນີ້, ໄດ້ນຳເອົາເນື້ອໃນ ເອກະສານວຽກງານຕ້ານການຄ້າມະນຸດຂອງ ສປປ ລາວ, ບົດສົນທິສັນຍາ ແລະ ກົດໝາຍ, ສາເຫດທີ່ພາໃຫ້ຕົກເປັນຜູ້ເຄາະຮ້າຍຈາກການຄ້າມະນຸດ, ການເຄື່ອນໄຫວຂອງຜູ້ຄ້າມະນຸດ, ຜົນກະທົບຈາກການຄ້າມະນຸດ, ການປ້ອງກັນການຄ້າມະນຸດ, ການຊ່ວຍເຫຼືອຜູ້ຖືກເຄາະຮ້າຍຈາກການຄ້າມະນຸດມາສຶກສາຮຽນຮູ້ ແລະ ເຜີຍແຜ່, ຄວາມຮູ້ພື້ນຖານ ແລະ ເຕັກນິກການນຳສະເໜີຂອງວິທະຍາກອນ, ການກະກຽມ ແລະ ຮູບແບບການໂຄສະນາຕ້ານການຄ້າມະນຸດ, ແນະນຳການໂຄສະນາໃຫ້ແກ່ກຸ່ມສ່ຽງ ແລະ ພະນັກງານໂດຍມີຈຸດປະສົງສ້າງຄວາມຮັບຮູ້, ເຂົ້າໃຈ ຕາມການຄາດຄະເນຂອງບັນດາອົງການສາກົນທີ່ເຮັດວຽກຕ້ານອາຊະຍາກຳດັ່ງກ່າວ. ການຄ້າມະນຸດ ເປັນອາຊະຍາກໍາຮ້າຍແຮງທີ່ເກີດຂຶ້ນຢູ່ພາຍໃນ ແລະ ຂ້າມຊາດ, ເປັນອາຊະຍາກຳທີ່ລະເມີດສິດທິພື້ນຖານຂອງຄວາມເປັນມະນຸດຢ່າງຮ້າຍແຮງ ສົ່ງຜົນກະທົບໂດຍກົງທາງດ້ານຮ່າງກາຍ ແລະ ຈິດໃຈ ຂອງຜູ້ຖືກເຄາະຮ້າຍ ແລະ ຄອບຄົວ. ເປັນປະກົດການຫຍໍ້ທໍ້ໜຶ່ງທີ່ເກີດຂຶ້ນໃນສັງຄົມ ແລະ ສົ່ງຜົນກະທົບຕໍ່ສັງຄົມ ກໍຄືການພັດທະນາສ້າງສາປະເທດຊາດ; ພ້ອມກັນນັ້ນ, ການຄ້າມະນຸດ ຍັງເປັນທຸລະກິດທີ່ຜິດກົດໝາຍ, ສໍາລັບ ສປປ ລາວ ການຄ້າມະນຸດທີ່ພົ້ນເດັ່ນ ແມ່ນດ້ວຍຮູບແບບໄປອອກແຮງງານທີ່ຜິດກົດໝາຍ, ການຂົນຂວາຍເອົາແມ່ຍິງລາວໄປກັບຄົນຕ່າງປະເທດດ້ວຍຮູບການໝັ້ນໝາຍ, ແຕ່ງດອງແອບແຝງ, ການຮັບຈ້າງໃຫ້ຖືພາແທນ, ທໍາມິດສະຈານເດັກຍິງ, ເຜີຍແຜ່ພາບສິ່ງລາມົກອະນາຈານຜ່ານສື່ສັງຄົມອອນລາຍ ແລະ ອື່ນໆ.
(ຂ່າວ-ພາບ: ນາງ ພອນທິດາ ເກດທອງພັນ)
