ໃນວັນທີ 26 ສິງຫາ 2022 ຜ່ານມາ ສະຫາຍພົນຈັດຕະວາ ສົມພອນ ມິດຕະພອນ ຮອງຫົວໜ້າກົມໃຫຍ່ເສນາທິການກອງທັບ ຮອງຫົວໜ້າຄະນະຊີ້ນຳການຝືກຊ້ອມກອບກູ້ໄພພິບັດຮ່ວມ 3 ກອງທັບ (ກຳປູເຈຍ-ລາວ-ຫວຽດນາມ) ພ້ອມດ້ວຍຄະນະ ລົງກວດກາຄວາມພ້ອມຮອບດ້ານ ຄັ້ງສຸດທ້າຍ ຢູ່ພາກສະໜາມຕົວຈິງ ຢູ່ທີ່ອ່າງນ້ຳຫຸມ ເມືອງນາຊາຍທອງນະຄອນຫຼວງວຽງຈັນ, ທີ່ຈະໄດ້ຈັດຂຶ້ນໃນມໍ່ໆນີ້ ເພື່ອຮັບປະກັນໃຫ້ແກ່ການຝືກຊ້ອມໄດ້ຮັບຜົນສຳເລັດສູງ.
ສະຫາຍ ພັນເອກ ປາດຖະນາ ບຸດຕິຈັກ ຮອງຫົວໜ້າຫ້ອງການ ກົມໃຫຍ່ເສນາທິການກອງທັບ, ຫົວໜ້າກອງເສນາທິການກະກຽມການຝືກຊ້ອມ ໄດ້ ລາຍງານຄວາມຄືບໜ້າ, ການກະກຽມຄວາມພ້ອມດ້ານຕ່າງໆ ຂອງແຕ່ລະພາກສ່ວນ ເຊີ່ງມາຮອດ ປັດຈຸບັນດາໜ້າວຽກດ້ານຕ່າງໆແມ່ນມີຄວາມພ້ອມແລ້ວຫລາຍກວ່າ 90% ຍັງພຽງບັນຫາເລັກນ້ອຍ ທີ່ຍັງຈະໄດ້ສືບຕໍ່ປັບປຸງ ເປັນຕົ້ນແມ່ນ ປັບປຸງສະໜາມຝືກຊ້ອມທາງນ້ຳ ເນື່ອງຈາກ ວ່ານ້ຳໃນອ່າງຢູ່ໃນລະດັບທີ່ບໍ່ແນ່ນອນ ແລະ ຈະໄດ້ປັບປຸງສະໜາມຄືນ ຕາມລະດັບຂຶ້ນລົງຂອງນ້ຳ.
ພ້ອມນີ້ຍັງຈະໄດ້ສືບຕໍ່ປັບປຸງເສັ້ນທາງເຂົ້າອອກພາກສະໜາມບາງຈຸດ,ໃນການຝືກຊ້ອມໃນຄັ້ງນີ້ໄດ້ແບ່ງອອກເປັນ 2ໄລຍະຄື : ໄລຍະທີ 1 ແມ່ນກຳລັງຂອງກອງທັບປະຊາຊົນລາວຈະໄດ້ຝືກຊ້ອມຝ່າຍດຽວ ນັບແຕ່ວັນທີ 29 ສິງຫາ – 8ກັນຍາ 2022, ໄລຍະທີ 2 ແມ່ນຈະໄດ້ຝືກຊ້ອມຮ່ວມລະຫວ່າງ 3 ກອງທັບ.
ໂອກາດນີ້ ຮອງຫົວໜ້າກົມໃຫຍ່ເສນາທິການກອງທັບ ໄດ້ກ່າວວ່າ: ການຝຶກຊ້ອມໃນຄັ້ງນີ້ ເປັນຄັ້ງ ປະຫວັດສາດໃນການພົວພັນ ຮ່ວມມືຂອງກອງທັບ ທັງ 3 ປະເທດ, ສະນັ້ນກອງທັບປະຊາຊົນລາວ ໃນນາມເຈົ້າພາບຈົ່ງເປັນ ເຈົ້າການ ແລະ ກຽມຄວາມພ້ອມ ຢ່າງຮອບດ້ານແນໃສ່ເຮັດໃຫ້ ການຝຶກຊ້ອມປະສົບຜົນສໍາເລັດ ແລະ ມີຄວາມປອດໄພ.
ຂ່າວ-ພາບ: ຄຳຮູ້
