ຂ່າວຕ່າງປະເທດລາຍງານ ເມື່ອວັນທີ 27 ສິງຫາ ທີ່ຜ່ານມານີ້ວ່າ: ໂລກກຽມຮັບມືກັບລາຄາເຂົ້າຕະຫຼາດໂລກແພງ ເມື່ອອິນເດຍຊຶ່ງເປັນປະເທດຜູ້ສົ່ງອອກເຂົ້າລາຍໃຫຍ່ທີ່ສຸດຂອງໂລກກຳລັງພິຈາລະນາທີ່ຈະຈຳກັດການສົ່ງອອກເຂົ້າຫັກ 100% ຫຼັງຈາກເນື້ອທີ່ປູກເຂົ້າຫຼຸດລົງ ເນື່ອງຈາກປະລິມານນ້ຳຝົນບໍ່ພຽງພໍ.
ທ່າອ່ຽງທີ່ອິນເດຍຈະຈຳກັດການສົ່ງອອກເຂົ້ານັ້ນ ອາດຈະເຮັດໃຫ້ລາຄາເຂົ້າທົ່ວໂລກເພີ່ມຂຶ້ນ ເນື່ອງຈາກອິນເດຍສົ່ງອອກເຂົ້າສູ່ຕະຫຼາດໂລກຄິດເປັນອັດຕາສ່ວນຫຼາຍກວ່າ 40% ແລະ ອາດຈະສົ່ງຜົນກະທົບຕໍ່ບັນດາປະເທດທີ່ທຸກຍາກໃນອາຟຣິກາທີ່ນຳເຂົ້າໆຫັກ 100% ເພື່ອໃຊ້ໃນການບໍລິໂພກ ຂະນະທີ່ໂດຍສ່ວນໃຫຍ່ແລ້ວເຂົ້າຫັກຖືກນຳໃຊ້ໃນການເຮັດອາຫານສັດ. ເຈົ້າໜ້າທີ່ຂອງອິນເດຍເປີດເຜີຍວ່າ ພວກເຮົາໄດ້ປຶກສາຫາລືກັນ ຈຳເປັນທີ່ຈະຕ້ອງຈຳກັດການສົ່ງອອກເຂົ້າຫັກ 100% ຫຼືບໍ່ ໂດຍເປັນການພິຈາລະນາເພື່ອທີ່ຈະຈຳກັດການສົ່ງອອກເຂົ້າຫັກ 100% ເທົ່ານັ້ນ ແລະ ບໍ່ໄດ້ພິຈາລະນາທີ່ຈະຄວບຄຸມການສົ່ງອອກເຂົ້າໂດຍລວມແຕ່ຢ່າງໃດ. ການປຶກສາຫາລືເລື່ອງການຈຳກັດການສົ່ງອອກເຂົ້າຫຼ້າສຸດມີຂຶ້ນຫຼັງຈາກອິນເດຍພົບກັບບັນຫາປະລິມານນ້ຳຝົນຕ່ຳກວ່າລະດັບສະເລ່ຍໃນລັດທີ່ປູກເຂົ້າສຳຄັນເຊັ່ນ ລັດເບັງກອນຕາເວັນຕົກ, ພິຫານ ແລະ ອຸດຕະລະປະເທດ ກະຊວງກະສິກຳອິນເດຍ ເປີດເຜີຍວ່າ ຊາວກະສິກອນໃນອິນເດຍປູກເຂົ້າ 34,37 ລ້ານເຮັກຕາ ຫຼຸດລົງ 8,3% ຈາກປີ 2021 ທີ່ຜ່ານມາ.
ກຸ່ມຜູ້ສົ່ງອອກເປີດເຜີຍວ່າ ຕາມປົກກະຕິແລ້ວອິນເດຍສົ່ງອອກເຂົ້າຫັກ 25% ແຕ່ຄວາມຕ້ອງການເຂົ້າຫັກ 100% ເພີ່ມຂຶ້ນຫຼາຍໃນໄລຍະຫຼາຍເດືອນທີ່ຜ່ານມາ ໂດຍສະເພາະຈີນທີ່ພົບກັບບັນຫາໄພແຫ້ງແລ້ງເຊັ່ນດຽວກັນ. ຜູ້ສົ່ງອອກເຂົ້າລາຍໜຶ່ງໃນລັດອຸດຕະລະປະເທດ ກ່າວວ່າອຸດສາຫະກຳປູກຝັງລ້ຽງສັດຂອງອິນເດຍ ໄດ້ຮຽກຮ້ອງໃຫ້ຈຳກັດການສົ່ງອອກເຂົ້າຫັກ 100% ເພື່ອໃຫ້ພວກເຂົາມີຜູ້ສະໜອງທີ່ເພີ່ມຂຶ້ນ. ທັງນີ້, ອິນເດຍສົ່ງອອກເຂົ້າ 21,5 ລ້ານໆໂຕນໃນປີ 2021 ຊຶ່ງລວມເຖິງເຂົ້າຫັກປະລິມານ 3,6 ລ້ານໂຕນ.
