ໃນວັນທີ 25 ສິງຫາ 2022 ນີ້, ສອງກະຊວງປ້ອງກັນຄວາມລະຫງົບ ລາວ-ຫວຽດ ນາມ ໄດ້ຈັດງານວາງສະແດງຮູບພາບ ການພົວພັນຮ່ວມມືພິເສດ ຮອບດ້ານ ລະຫວ່າງສອງຝ່າຍ ຂຶ້ນທີ່ນະຄອນຫລວງວຽງຈັນ ໃຫ້ກຽດເຂົ້າຮ່ວມຂອງສະຫາຍ ພົນເອກ ວິໄລ ຫລ້າຄໍາຟອງ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບ ແຫ່ງ ສປປ ລາວ, ສະຫາຍ ພົອ ໂຕ ເລິມ ກໍາມະການກົມການເມືອງສູນກາງພັກຄອມມູນິດ ຫວຽດ ນາມ, ລັດຖະມົນຕີກະຊວງປ້ອງກັນຄວາມສະຫງົບ ແຫ່ງ ສສ ຫວຽດນາມ, ມີຄະນະນໍາຂັ້ນສູງ, ພະ ນັກງານກ່ຽວຂ້ອງ ຂອງສອງກະຊວງປ້ອງກັນຄວາມສະຫງົບ ລາວ-ຫວຽດນາມ ເຂົ້າຮ່ວມ.
ການຈັດງານວາງສະແດງຮູບພາບໃນຄັ້ງນີ້ ເພື່ອສະເຫລີມສະຫລອງສອງວັນປະຫວັດສາດ ລາວ-ຫວຽດນາມ ກໍຄືວັນເຊັນສົນທິສັນຍາມິດຕະພາບ ແລະ ການຮ່ວມມືລາວ-ຫວຽດນາມ ຄົບ ຮອບ 45 ປີ ແລະ ວັນສ້າງຕັ້ງສາຍພົວພັນທາງການທູດລາວ-ຫວຽດນາມ ຄົບຮອບ 60 ປີ ເຊິ່ງຮູບພາບທີ່ນຳມາວາງສະແດງໃນຄັ້ງນີ້ ສ່ອງແສງໃຫ້ເຫັນເຖິງການພົວພັນຮ່ວມມືຮອບດ້ານລະຫວ່າງ ສອງກະ ຊວງປ້ອງກັນຄວາມລະຫງົບ ລາວ-ຫວຽດນາມ ໃນໄລຍະຜ່ານມາ ຈົນເຖິງປັດຈຸບັນ ເປັນຕົ້ນ ແມ່ນການແລກປ່ຽນການຢ້ຽມຢາມເຊິ່ງກັນ ແລະ ກັນ ຂອງການນຳຂັ້ນສູງຂອງສອງກະຊວງ, ລວມເຖິງການແລກປ່ຽນຄວາມຮູ້, ປະສົບການເຊິ່ງກັນ ແລະ ກັນ ແລະ ອື່ນໆ.
ໂອກາດດັ່ງກ່າວ, ສະຫາຍ ພົຕ ວັນທອງ ກອງມະນີ ກຳມະການສູນກາງພັກ, ຮອງລັດຖະ ມົນຕີກະຊວງປ້ອງກັນຄວາມສະຫງົບ ກ່າວວ່າ: ການຈັດວາງສະແດງຮູບພາບການພົວພັນຮ່ວມມື ທີ່ເປັນມູນເຊື້ອ ຂອງສອງກຳລັງປ້ອງກັນຄວາມສະຫງົບ ລາວ-ຫວຽດນາມ ໃນຄັ້ງນີ້ ຈັດຂຶ້ນເປັນຄັ້ງທີ 2 ໂດຍຄັ້ງທີ 1 ໄດ້ຈັດຂຶ້ນໃນປີ 2017 ແລະ ການວາງສະແດງຮູບພາບຄັ້ງນີ້ ແນໃສ່ເຮັດໃຫ້ສັງຄົມ ໄດ້ຮັບຮູ້ ແລະ ເຂົ້າໃຈຢ່າງຖືກຕ້ອງ, ເລິກເຊິ່ງຕື່ມອີກ ກ່ຽວກັບຂະບວນວິວັດ ທີ່ເປັນປະຫວັດສາດອັນຍາວນານ ແຫ່ງສາຍສຳພັນມິດຕະພາບ, ຄວາມສາມັກຄີພິເສດ.
ສະຫາຍ ພົຕ ວັນທອງ ກອງມະນີ ກ່າວອີກວ່າ: ສອງວັນປະຫວັດສາດ ລາວ-ຫວຽດນາມ ແມ່ນມີຄວາມໝາຍສຳຄັນຍິ່ງ ທີ່ໄດ້ໝູນວຽນມາບັນຈົບຄົບຮອບອີກວາລະໜຶ່ງໃນປີນີ້ ເຊິ່ງສອງພັກ, ສອງລັດ ລາວ-ຫວຽດນາມ ໄດ້ຕົກລົງຈັດຕັ້ງການສະເຫລີມສະຫລອງສອງວັນດັ່ງກ່າວ ໃຫ້ເປັນຂະ ບວນການຟົດຟື້ນ ແລະ ມີຄວາມໝາຍເລິກເຊິ່ງ ເພື່ອເປັນການຫວນຄືນມູນເຊື້ອແຫ່ງການພົວພັນມິດ ຕະພາບ ແລະ ຄວາມສາມັກຄີພິເສດ ລາວ-ຫວຽດນາມ ທີ່ເປັນປັດໄຈອັນສຳຄັນຕັດສິນ ໃຫ້ແກ່ໄຊຊະ ນະຂອງການປະຕິວັດລາວ ແລະ ຫວຽດນາມ ໃນພາລະກິດຕໍ່ສູ້ປົດປ່ອຍຊາດໃນເມື່ອກ່ອນ ກໍຄືການສ້າງສາພັດທະນາຂອງທັງສອງປະເທດໃນປັດຈຸບັນ, ທັງເປັນການເສີມຂະຫຍາຍມູນເຊື້ອ, ຍົກສູງຄວາມຮັບຜິດຊອບ ໃນການປົກປັກຮັກສາ, ເພີ່ມພູນຄູນສ້າງ ແລະ ພັດທະນາສາຍພົວພັນອັນຈົບງາມຂອງສອງປະເທດ ໃຫ້ນັບມື້ເຕີບໃຫຍ່ຂະຫຍາຍຕົວ, ກ້າວສູ່ລວງເລິກ ແລະ ດຳລົງຄົງຢູ່ຄູ່ກັບສອງຊາດ ລາວ-ຫວຽດນາມ ຊົ່ວກາລະນານ.
ຂ່າວ:ທະນູທອງ
ພາບ: ຂັນໄຊ
