ໃນວັນທີ 23 ສິງຫາ 2022 , ສະຫາຍ ແສງເພັດ ຮຸ່ງບຸນຍວງ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈໍາ ສສ ຫວຽດນາມ ພ້ອມດ້ວຍຄະນະ ໄດ້ເດີນທາງໄປຢ້ຽມຢາມ ແລະ ເຮັດວຽກຢູ່ແຂວງບັກຢາງ, ໃນໂອກາດນີ້, ສະຫາຍ ແສງເພັດ ຮຸ່ງບຸນຍວງ ກໍໄດ້ພົບປະ ແລະ ເຮັດວຽກກັບ ສະຫາຍ ເລ ແອັງ ເຢືອງ, ຮອງເລຂາພັກແຂວງ, ປະທານຄະນະກໍາມະການປະຊາຊົນແຂວງບັກຢາງ (ເຈົ້າແຂວງ) ຊຶ່ງໃນການພົບປະຄັ້ງນີ້, ການນໍາແຂວງ ກໍໄດ້ສະແດງຄວາມຍິນດີຕ້ອນຮັບ, ຕີລາຄາສູງທີ່ສະຫາຍເອກອັກຄະລັດຖະທູດ ພ້ອມຄະນະ ໄດ້ເດີນທາງໄປຢ້ຽມຢາມ ແລະ ເຮັດວຽກຢູ່ແຂວງບັກຢາງ ມີຂຶ້ນທ່າມກາງບັນຍາກາດທີ່ສອງປະເທດພວມຈັດຕັ້ງກິດຈະກໍາຕ່າງໆເພື່ອພ້ອມກັນສະເຫຼີມ ສະຫຼອງ “ປີສາມັກຄີມິດຕະພາບ ລາວ-ຫວຽດນາມ 2022” ເພື່ອຫວນຄືນສອງວັນປະຫວັດສາດທີ່ສຳຄັນ ຄື: ວັນສ້າງຕັ້ງສາຍພົວພັນການທູດ ຄົບຮອບ 60 ປີ (5/9/1962-5/9/2022) ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 45 ປີ (18/7/1977-18/7/2022). ສະຫາຍ ເລ ແອັງ ເຢືອງ ຍັງໄດ້ແຈ້ງໃຫ້ຮູ້ວ່າ: ແຂວງບັກຢາງມີເນື້ອທີ່ທັງໝົດ 3,900 km2 (ອັນດັບທີ 36/63 ແຂວງ, ນະຄອນ), ມີປະຊາກອນປະມານ 1,9 ລ້ານຄົນ (ອັນດັບທີ 12/63), ມີຂະ ໜາດເສດຖະກິດໃຫຍ່ເປັນອັນດັບທີ 15/63 ແຂວງ, ນະຄອນ, ມີ 9 ເມືອງ ແລະ 1 ນະຄອນທີ່ຂຶ້ນກັບແຂວງ ໃນນີ້ 80% ແມ່ນຊົນເຜົ່າກີງ ສ່ວນທີ່ເຫຼືອແມ່ນຊົນເຜົ່າສ່ວນໜ້ອຍ. ໂຄງລ່າງເສດຖະກິດຂອງແຂວງແມ່ນເນັ້ນໜັກທາງດ້ານອຸດສາຫະກໍາ ຊຶ່ງປັດຈຸບັນມີເຂດອຸດສາຫະກໍາ 8 ແຫ່ງ ໂດຍສຸມໃສ່ໃນການຜະລິດເຄື່ອງອາໄຫຼເອເລັກໂຕຼນິກ, ອຸປະກອນໄຟຟ້າພະລັງງານແສງຕາເວັນ…, ສ່ວນຂະແໜງກະສິກໍາກວມ 16,5% ແຕ່ແຂວງເປັນໜຶ່ງໃນບັນດາແຂວງທີ່ມີການຂະຫຍາຍຕົວທາງດ້ານກະສິກໍາ ໂດຍສະເພາະການຜະລິດໝາກໄມ້ກິນ ໝາກສົ່ງອອກຕ່າງປະເທດ ແລະ ໝາກໄມ້ທີ່ມີຊື່ສຽງທີ່ສຸດຢູ່ໃນຫວຽດນາມ ກໍຄື: ໝາກລິ້ນຈີ ຊຶ່ງຄອງເປັນອັນດັບໜຶ່ງ ໃນປີ 2021 ສາມາດເກັບຜົນຜະລິດໄດ້ 200.000 ໂຕນ ມູນຄ່າ 6800 ຕື້ດົ່ງ (ເກືອບ 300 ລ້ານໂດລາສະຫະລັດ) ສົ່ງອອກໄປ 30 ກວ່າປະເທດໃນທົ່ວໂລກ. ການເກັບລາຍຮັບແຫ່ງຊາດບັນລຸໄດ້ 22.000 ຕື້ດົ່ງໃນປີ 2021, ການເຕີບໂຕທາງດ້ານເສດຖະກິດ 13% ໃນປີ 2020 (ອັນດັບໜຶ່ງຂອງປະເທດ) ແຕ່ເນື່ອງຈາກວ່າໃນປີ 2021 ໄດ້ຮັບຜົນກະທົບຈາກການແຜ່ລະບາດຂອງເຊື້ອພະຍາດໂຄວິດ-19 ເຮັດໃຫ້ການຂະຫຍາຍຕົວເສດຖະກິດຫຼຸດລົງເຫຼືອ 7,82% ແຕ່ຍັງຕິດໜຶ່ງໃນສີບແຂວງ, ນະຄອນທີ່ມີການເຕີບໂຕສູງ, ມູນຄ່າການສົ່ງອອກ-ນຳເຂົ້າໃນປີ 2021 ບັນລຸໄດ້ຫຼາຍກວ່າ 30 ຕື້ໂດລາສະຫະລັດ ໂດຍສະເພາະໃນ 6 ເດືອນຕົ້ນປີ 2022 ພາຍຫຼັງທີ່ເຊື້ອພະຍາດໂຄວິດ-19 ໄດ້ຮັບການຄວບຄຸມຢູ່ໃນລະດັບທີ່ແນ່ນອນ ເຮັດໃຫ້ການເຕີບໂຕເສດຖະກິດບັນລຸໄດ້ 24% ແລະ ຄາດຄະເນວ່າໝົດປີຈະສາມາດບັນລຸ 17-18% (ອັນດັບໜຶ່ງຂອງປະເທດ). ນອກຈາກນີ້, ແຂວງຍັງມີທ່າແຮງໃນການດຶງດູດການລົງທຶນຂອງຕ່າງປະເທດ ຊຶ່ງແຕ່ລະປີສາມາດດຶງດູດໄດ້ຫຼາຍກວ່າ 1,8 ຕື້ໂດລາສະຫະລັດເຂົ້າມາລົງທຶນຢູ່ແຂວງ. ສ່ວນການພົວພັນຮ່ວມມືກັບ ສປປ ລາວ ພວກເຮົາ, ແຂວງບັກຢາງກໍເປັນໜຶ່ງໃນບັນດາແຂວງທີ່ມີອະດີດຊ່ຽວຊານ ແລະ ທະຫານອາສາສະໝັກຊ່ວຍການປະຕິວັດຢູ່ລາວ, ແຂວງໄດ້ມີກິດຈະກໍາຕ່າງໆເພື່ອເປັນການປະກອບສ່ວນເຂົ້າໃນການຮັດແໜ້ນສາຍພົວພັນສອງປະເທດ ໂດຍສະເພາະແຂວງບັກຢາງໄດ້ເຊັນບົດບັນທຶກການແຮກສ່ຽວກັບແຂວງໄຊສົມບູນຂອງລາວ ໄລຍະ 2021-2025.
ໃນໂອກາດຕິດຕາມຄະນະຜູ້ແທນຂັ້ນສູງ ນຳໂດຍ ສະຫາຍ ຫງວຽນ ຊວັນ ຟຸກ, ປະທານປະເທດ ແຫ່ງ ສສ ຫວຽດນາມ ເດີນທາງໄປຢ້ຽມຢາມ ສປປ ລາວ ໃນເດືອນ 8/2021 ທີ່ຜ່ານມາ. ໂອກາດນີ້, ສະຫາຍ ແສງເພັດ ຮຸ່ງບຸນຍວງ ກໍໄດ້ສະແດງຄວາມຂອບໃຈໃນການຕ້ອນຮັບອັນອົບອຸ່ນ ແລະ ເປັນກັນເອງໃນຖານສະຫາຍອ້າຍນ້ອງ ພ້ອມທັງສະແດງຄວາມຊົມເຊີຍໝາກຜົນການພັດທະນາເສດຖະກິດ-ສັງຄົມໃນໄລຍະຜ່ານມາຂອງແຂວງ ຊຶ່ງບັນດາຜົນສຳເລັດດັ່ງກ່າວກໍໄດ້ສະແດງໃຫ້ເຫັນເຖິງການວາງແນວທາງທີ່ຖືກຕ້ອງ, ຄວາມສາມາດໃນການຊີ້ນຳ-ນຳພາຂອງອົງຄະນະພັກ, ອຳນາດການປົກຄອງ ແລະ ການເປັນຈິດໜຶ່ງໃຈດຽວຂອງປະຊາຊົນແຂວງບັກຢາງ. ຕີລາຄາສູງການພົວພັນຮ່ວມມືລະຫວ່າງສອງປະເທດໃນດ້ານການເມືອງ, ປ້ອງກັນຊາດ-ປ້ອງກັນຄວາມສະຫງົບສືບຕໍ່ເປັນເສົາຫຼັກໃຫ້ແກ່ການພົວພັນລວມຂອງສອງປະເທດ ສ່ວນການຮ່ວມມືທາງດ້ານເສດຖະກິດ-ການຄ້າ, ໃນປີ 2021 ສອງຝ່າຍສາມາດສູ້ຊົນເຮັດໃຫ້ມູນຄ່າການຄ້າສອງສົ້ນບັນລຸໄດ້ 1,2 ຕື້ໂດລາສະຫະລັດ ແຕ່ເຖິງຢ່າງໃດກໍຕາມເຫັນວ່າ ການຮ່ວມມືທາງດ້ານເສດຖະກິດ-ການຄ້າຍັງບໍ່ທັນສົມຄູ່ກັບການຮ່ວມມືທີ່ດີເລີດທາງການເມືອງ ແຕ່ກໍເຊື່ອວ່າ ພາຍຫຼັງທີ່ສອງປະເທດ ລາວ-ຫວຽດນາມ ສາມາດຄວບຄຸມການແຜ່ລະບາດຂອງເຊື້ອພະຍາດໂຄວິດ-19 ສອງປະເທດຈະສາມາດສືບຕໍ່ຂຸດຄົ້ນທ່າແຮງບົ່ມຊ້ອນຂອງແຕ່ລະປະເທດ, ການຮ່ວມມືດ້ານການສຶກສາ-ວັດທະນະທໍາສືບຕໍ່ມີບາດກ້າວໃໝ່ ໂດຍສະເພາະການຍົກສູງຄຸນນະພາບການສຶກສາຂອງນັກສຶກສາລາວ ຢູ່ ສສ ຫວຽດນາມ ຖືເປັນບຸລິມະສິດຕົ້ນຕໍຂອງສອງປະເທດ. ພິເສດ, ປີ 2022 “ປີສາມັກຄີມິດຕະພາບ ລາວ-ຫວຽດນາມ” ສອງປະເທດໄດ້ຮ່ວມກັນຈັດກິດຈະກໍາຕ່າງໆເພື່ອເປັນການສະເຫຼີມສະຫຼອງສອງວັນປະຫວັດສາດທີ່ສຳຄັນດັ່ງກ່າວ ທັງເປັນການໂຄສະນາ, ເຜີຍແຜ່ ແລະ ສຶກສາອົບຮົມໃຫ້ແກ່ປະຊາຊົນທຸກຊັ້ນຄົນ ໂດຍສະເພາະຄົນຮຸ່ນໃໝ່ສອງປະເທດໄດ້ເຂົ້າໃຈ ແລະ ຮັບຮູ້ຢ່າງເລິກເຊິ່ງກ່ຽວກັບສາຍພົວພັນພິເສດທີ່ມີໜຶ່ງບໍ່ມີສອງໃນໂລກນີ້. ສ່ວນແຜນການຮ່ວມມືລະຫວ່າງ ແຂວງບັກຢາງ ກັບ ແຂວງໄຊສົມບູນຂອງລາວ ກໍສະເໜີໃຫ້ສອງຝ່າຍມີການຂຶ້ນແຜນ ແລະ ໂຄງການລະອຽດໃນການຮ່ວມມື, ຊ່ວຍເຫຼືອເຊິ່ງກັນ ແລະ ກັນ ເພື່ອແນ່ໃສ່ໃນການເສີມສ້າງຄວາມເຂັ້ມແຂງການພັດທະນາເສຖະກິດ-ສັງຄົມແຂວງໄຊສົມບູນ ໂດຍສະເພາະແມ່ນການຊຸກຍູ້ໃຫ້ນັກລົງທຶນຂອງແຂວງບັກຢາງເຂົ້າໄປລົງທຶນຢູ່ແຂວງໄຊສົມບຸນ.
ນອກຈາກນີ້, ຄະນະຍັງໄດ້ເດີນທາງໄປຢ້ຽມຊົມວັດວິ໋ງງຽມ ຊຶ່ງເປັນວັດດຽວທີ່ບໍ່ຖືກທຳລາຍຈາກການຮຸກຮານຈັກກະພັດຕ່າງດ້າວໃນເມື່ອກ່ອນ ແລະ ເປັນວັດດຽວໃນຫວຽດນາມ ກໍຄືທົ່ວໂລກທີ່ມີເຈົ້າຊີວິດເຂົ້າບວດ ແລະ ປະຕິບັດທຳຢູ່ວັດ ໂດຍແມ່ນເຈົ້າຊີວິດ ເຈີ່ນ ແທງ ຕົງ.
ຂ່າວ-ພາບ: ສະຖານທູດລາວທີ່ຮ່າໂນ້ຍ
