ກອງປະຊຸມຜູ້ບໍລິຫານການສຶກສາ ແລະ ກິລາ ປະຈໍາສົກຮຽນ 2022-2023 ໄດ້ຈັດຂຶ້ນໃນວັນທີ 23 ສິງຫາ ນີ້ ທີ່ຫ້ອງປະຊຸມສູນໄອຊີທີ ນະຄອນຫຼວງວຽງຈັນ ໂດຍການເປັນປະທານຂອງ ທ່ານ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະ ກິລາ, ມີບັນດາຫົວໜ້າຫ້ອງການ, ຫົວໜ້າກົມ, ຫົວໜ້າພະແນກ ສຶກສາທິການ ແລະ ກິລາ, ຜູ້ອໍານວຍການສະຖານການສຶກສາ-ກິລາ ທົ່ວປະເທດ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ພຸດ ສິມມາລາວົງ ໄດ້ວ່າ: ສົກຮຽນປີ 2021-2022 ແມ່ນເປັນສົກຮຽນໜຶ່ງ ທີ່ໄດ້ດໍາເນີນໄປໃນສະພາບທີ່ບໍ່ປົກກະຕິ, ພ້ອມມີການລະບາດຂອງພະຍາດໂຄວິດ-19, ສໍາລັບຂະແໜງການສຶກສາ, ເຖິງຈະມີຄວາມຫຍຸ້ງຍາກກໍສາມາດຈັດການຮຽນ-ການສອນ, ການສອບເສັງ ແຕ່ການສຶກສາກ່ອນໄວຮຽນ ເຖິງການສຶກສາຊັ້ນສູງ, ຄູ-ອາຈານ ໄດ້ເອົາໃຈໃສ່ຝຶກອົບຮົມ ແລະ ສິດສອນດ້ວຍຫຼາກຫຼາຍວິທີ, ອັດຕາການສັກວັກຊິນໂຄວິດ-19 ຂອງຄູ-ອາຈານ ແລະ ນັກຮຽນ-ນັກສຶກສາ, ກວມເອົາເປີເຊັນສ່ວນຫຼາຍ, ສາມາດຈັດສົ່ງນັກຮຽນໄປຕ່າງປະເທດຈໍານວນໜຶ່ງໄດ້ສໍາເລັດ. ສໍາລັບວຽກງານກິລາແມ່ນໄດ້ສົ່ງຄະນະກິລາ ເຂົ້າຮ່ວມງານມະຫະກໍາກິລາຊີເກມ, ອາຊຽນພາລາເກມ, ກິລານັກຮຽນມະຫາວິທະຍາໄລ, ການແຂ່ງຂັນລີກພາຍໃນ ແລະ ຕ່າງປະເທດ, ການອອກກໍາລັງກາຍຂອງມວນຊົນໄດ້ເປັນຂະບວນຟົດຟື້ນ, ພິເສດ ນັກກິລາບານເຕະຮຸ່ນອາຍຸບໍ່ເກີນ-19 ປີ ໄດ້ສ້າງໜ້າປະຫວັດສາດໃໝ່ໃຫ້ແກ່ວົງການກິລາບານເຕະ ຊຶ່ງສາມາດຍາດໄດ້ຮອງແຊັມ ທີ່ປະເທດອິນໂດເນເຊຍ.
ກອງປະຊຸມຄັ້ງນີ້ຈະໄດ້ພ້ອມກັນຕີລາຄາບັນຫາ ແລະ ຂໍ້ຄົງຄ້າງໃນສົກຮຽນຜ່ານມາ, ພ້ອມກັນວິເຄາະວິໄຈ ໃຫ້ເຫັນສາເຫດຂອງແຕ່ລະບັນຫາຢ່າງແທ້ຈິງ ແລະ ຫາວິທີເພື່ອແກ້ໄຂຮ່ວມກັນ; ໃນກອງປະຊຸມຈະໄດ້ພ້ອມກັນແລກປ່ຽນບາງຫົວຂໍ້ດັ່ງນີ້: ພິຈາລະນາຜົນການຈັດຕັ້ງປະຕິບັດແຜນພັດທະນາການສຶກສາ ແລະ ກິລາ ປະຈໍາສົກຮຽນ 2021-2022 ແລະ ແຜນປະຈໍາສົກຮຽນ 2022-2023; ປະກອບຄໍາເຫັນໃສ່ຜົນການຕິດຕາມມະຕິກອງປະຊຸມຜູ້ບໍລິຫານການສຶກສາ ແລະ ກິລາປະຈໍາສົກຮຽນ 2020-2021; ເຊື່ອມຊຶມມະຕິຂອງກອງປະຊຸມສະພາແຫ່ງຊາດ ສະບັບເລກທີ 60/ສພຊ, ລົງວັນທີ 8/7/2002 ແລະ ມາດຕະການໃນການຈັດຕັ້ງປະຕິບັດ; ຈາກນັ້ນ ຈະໄດ້ຮັບຟັງບາງບົດຮຽນການຈັດການຮຽນ-ການສອນ ຂອງແຂວງຈໍານວນໜຶ່ງ; ກອງປະຊຸມຍັງຈະໄດ້ຮັບຟັງຄໍາຄິດຄໍາເຫັນ ຂອງຜູ້ບໍລິຫານການສຶກສາຢູ່ທ້ອງ ຖິ່ນ ແລະ ຢູ່ສູນກາງ ແລະ ຈະໄດ້ຮັບຮອງມະຕິກອງປະຊຸມ ເພື່ອເປັນທິດທາງການຈັດຕັ້ງປະຕິບັດກິດຈະກໍາຂອງຂະແໜງການສຶກສາໃນສົກຮຽນ 2022-2023. ຈະພ້ອມກັນປະກອບຄໍາເຫັນ, ຕີລາຄາ ແລະ ເບິ່ງບັນຫາຢ່າງກົງໄປກົງມາ ແລະ ຊອກຫາທິດທາງແກ້ໄຂ ເພື່ອກ້າວໄປສູ່ການຈັດຕັ້ງປະຕິບັດທີ່ເຮັດໄດ້ແທ້ຈິງ.
ຂ່າວ: ບຸນອູ້ມ, ພາບ: ຄໍາໂຖ
