ເອກະສານການເມືອງຂອງກອງປະຊຸມໃຫຍ່ ຄັ້ງທີ XIII ຂອງພັກກອມມູນິດ ຫວຽດນາມ ໄດ້ກຳ ນົດການຫັນເປັນດິຈີຕອນແຫ່ງຊາດ ແມ່ນໜ້າທີ່ສຳຄັນທີ່ສຸດ ຕິດພັນກັບ 3 ເສົາຄ້ຳຕົ້ນຕໍນັ້ນແມ່ນ: ລັດຖະ ບານດີຈີຕອນ, ພື້ນຖານເສດຖະກິດດີຈີຕອນ ແລະ ສັງຄົມດີຈີຕອນ. ໃນໄລຍະຜ່ານມາ, ຫວຽດນາມ ມີຄວາມເອົາໃຈໃສ່ເປັນພິເສດກ່ຽວກັບວຽກງານການຫັນເປັນດີຈີຕອນ ມີຫຼາຍໂຄງການ, ມາດຕະການທີ່ໄດ້ຍົກອອກມາ ເພື່ອແນໃສ່ເປົ້າໝາຍຊອກຫາ ແລະ ແບ່ງປັນບັນດາມາດຕະການຫັນເປັນດີຈີຕອນ ເພື່ອຊ່ວຍ ຫວຽດນາມ ພັດທະນາກ້າວກະໂດດຂັ້ນ, ປະກອບສ່ວນນຳ ຫວຽດນາມ ກາຍເປັນປະເທດພັດທະ ນາຢ່າງຈະເລີນຮຸ່ງເຮືອງ.
ເປັນໄລຍະເວລາຫຼາຍກວ່າ 2 ປີຜ່ານມາ, ທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ ໄດ້ເຊັນອະນຸມັດ “ໂຄງການຫັນເປັນດິຈີຕອນແຫ່ງຊາດ ຮອດປີ 2025, ການກຳນົດທິດຮອດປີ 2030”, ພາລະກິດແຫ່ງການຫັນເປັນດິຈີຕອນແຫ່ງຊາດ ບັນລຸໄດ້ບັນດາໝາກຜົນຕັ້ງໜ້າຢ່າງຈະແຈ້ງໃນເບື້ອງຕົ້ນ ພິເສດແມ່ນຄວາມຮັບຮູ້ກ່ຽວກັບການຫັນເປັນດິຈີຕອນແຫ່ງຊາດໃນອົງການລັດ, ວິສາຫະກິດ ແລະ ທົ່ວປວງຊົນໄດ້ຮັບການຍົກສູງຂຶ້ນຢ່າງບໍ່ຢຸດຢັ້ງ. ອາດເຫັນໄດ້ວ່າ ເຕັກໂນໂລຊີດິຈີຕອນ ພວມແຜ່ຂະຫຍາຍ ແລະ ແຊກຊຶມເຂົ້າເຖິງທຸກການເຄື່ອນໄຫວຂອງຊີວິດເສດຖະກິດ-ສັງຄົມຂອງທຸກທ້ອງຖິ່ນ, ກະຊວງ, ຂະ ແໜງການ ແລະ ລັດຖະບານ ຫວຽດນາມ, ນຳມາເຊິ່ງປະສິດທິຜົນ ແລະ ແຜ່ກະຈາຍກວ້າງອອກ. ທ່ານ ໂດ໋ກົງແອງ ຫົວຫນ້າກົມການຫັນເປັນລະບົບຄອມພິວເຕີ (computerize), ກະຊວງ ຖະແຫຼງຂ່າວ ແລະ ສື່ສານ ຫວຽດນາມ ຢັ້ງຢືນວ່າ: ກ່ຽວກັບຄວາມຮັບຮູ້ໃນການຫັນເປັນດີຈີຕອນ ຕ້ອງປະຕິບັດໃນທົ່ວປວງຊົນ ແລະ ຮອບດ້ານ. ການຫັນເປັນດິຈີຕອນ ບໍ່ພຽງແຕ່ແມ່ນເຕັກໂນໂລຊີ, ບໍ່ພຽງແຕ່ແມ່ນບັນຫາຊື້ອຸປະ ກອນເຕັກໂນໂລຊີເທົ່ານັ້ນ ຫາກຍັງແມ່ນບັນຫາຂອງລະບົບ ແລະ ນະໂຍບາຍ, ຄວາມຮັບຮູ້ ແລະ ກຳລັງຄວາມສາມາດຂອງອົງການ. ຜົນສຳເລັດຂອງວຽກງານຫັນເປັນດິຈີຕອນ, ເຕັກໂນໂລຊີ ປະກອບພຽງແຕ່ 20%, ສ່ວນ 80% ແມ່ນອີງໃສ່ຄວາມຮັບຮູ້ ແລະ ກຳລັງຄວາມສາມາດຈັດຕັ້ງຜັນຂະຫຍາຍ. ການຫັນເປັນດິຈີຕອນ ສຳຄັນທີ່ສຸດແມ່ນການເຂົ້າຮ່ວມຂອງທຸກຄົນ, ທຸກພາກສ່ວນໃນອົງການ, ທຸກພາກສ່ວນໃນສັງຄົມ.
ການປະກອບສ່ວນຂອງເສດຖະກິດດິຈີຕອນໃຫ້ແກ່ພື້ນຖານເສດຖະກິດນັບມື້ນັບເພີ່ມຂຶ້ນ. ຈຳນວນວິສາຫະກິດເຕັກໂນໂລຊີສ້າງຕັ້ງໃໝ່ເພີ່ມຂຶ້ນຢ່າງໄວວາ. ສັງຄົມດິຈີຕອນດ້ວຍຈຸດສຸມແມ່ນພົນລະເມືອງດິຈີຕອນ, ໄດ້ຮັບຄວາມເອົາໃຈໃສ່ພັດທະນາ. ບັນລຸໄດ້ໝາກຜົນດັ່ງກ່າວກໍ່ຍ້ອນມີການເຂົ້າຮ່ວມຢ່າງຂ້ຽວຂາດຂອງລັດຖະບານ, ເປັນຕົ້ນແມ່ນກະຊວງຖະແຫຼງຂ່າວ ແລະ ສື່ສານ.
ເກືອບ 3 ປີຜ່ານມາ, ດ້ວຍບົດບາດນຳໜ້າໃນວຽກງານຫັນເປັນດິຈີຕອນ ຢູ່ ຫວຽດນາມ, ກະຊວງ ຖະແຫຼງຂ່າວ ແລະ ສື່ສານ ໄດ້ຊອກຫາມາດຕະການ, ປຸກລຸກຄວາມສາມາດບົ່ມຊ້ອນແຫ່ງການພັດທະນາຜະລິດຕະພັນເຕັກໂນໂລຊີຂອງບັນດາວິສາຫະກິດຢ່າງບໍ່ຢຸດຢັ້ງ. ທ່ານ ຫງວຽນຮູຍຢູງ ຮອງລັດຖະມົນຕີ ກະຊວງຖະແຫຼງຂ່າວ ແລະ ສື່ສານ ຢັ້ງຢືນ: ບັນດາວິສາຫະກິດເຕັກໂນໂລຊີ ຂອງຫວຽດນາມ ຕ້ອງມີຄວາມເຊື່ອໝັ້ນວ່າ ຕົນເອງຕ້ອງແມ່ນຜູ້ມີຄວາມສາມາດໃນການແກ້ໄຂສະພາບການຢ່າງດີທີ່ສຸດ ແລະ ຜ່ານນັ້ນ ສາມາດກວມເອົາຕະຫຼາດຫັນເປັນດິຈີຕອນພາຍໃນປະເທດໄດ້. ການຫັນເປັນ ດິຈີຕອນ ແມ່ນພາ ລະກິດຂອງທົ່ວປວງຊົນ ແລະ ຈະບັນລຸຜົນສຳເລັດ ຖ້າຫາກທົ່ວປວງຊົນເຂົ້າຮ່ວມ. ຫວຽດນາມ ແມ່ນປະ ເທດທີ່ມີປະຊາຄົມວິສາຫະກິດເຕັກໂນໂລຊີເປັນຈຳນວນຫຼາຍ, ຂະຫຍັນຂັບເຄື່ອນ, ປະດິດຄິດສ້າງ ແລະ ມີກຳລັງຄວາມສາມາດເປັນເຈົ້າຂອງເຕັກໂນໂລຊີ. ຄວາມຫວັງຂອງຜູ້ເຮັດວຽກງານເຕັກໂນໂລຊີ ຫວຽດ ນາມ ແມ່ນນຳເຕັກໂນໂລຊີເຂົ້າທຸກຂົງເຂດໃນການດຳລົງຊີວິດ.
ໂດຍຊອກຫາບັນດາວິທີການຫັນເປັນດີຈີຕອນ ຢູ່ບັນດາຂົງເຂດ, ຂະແໜງການ, ທ້ອງຖິ່ນ ແລະ ວິສາຫະກິດ, ຊອກຫາວິທີການໃໝ່ທີ່ດີເດັ່ນໃຫ້ແກ່ບັນດາຂະແໜງການ, ຂົງເຂດ, ທ້ອງຖິ່ນ, ວິສາຫະກິດ, ປະຊາຄົມ… ຫວຽດນາມ ມີຫຼາຍວິທີໃນວິວັດການພັດທະນາ, ດ້ວຍທ່າໄດ້ປຽບທີ່ມີຄວາມເຂົ້າໃຈກ່ຽວກັບຕະຫຼາດພາຍໃນ, ຄວາມເຂົ້າໃຈກ່ຽວກັບຄວາມຕ້ອງການຂອງລູກຄ້າ, ວັດທະນະທຳປະຈຳຖິ່ນ, ກຽມພ້ອມທີ່ຈະຮັບໃຊ້ເມື່ອມີຄວາມຕ້ອງການ ແລະ ມີຄວາມເປັນເຈົ້າການ, ປະດິດຄິດສ້າງ, ອອກແບບ, ປ່ຽນແປງບັນດາຜະລິດຕະພັນການບໍລິການ ແລະ ວິທີການແກ້ໄຂຕາມຄວາມຕ້ອງການທີ່ແຕກຕ່າງກັນຂອງລູກຄ້າ, ບັນດາວິສາຫະກິດ ເຕັກໂນໂລຊີ ຫວຽດນາມ ພວມມີຫຼາຍກາລະໂອກາດເພື່ອເປັນເຈົ້າການໃນການຮ່ວມມືກັບບັນດາບໍລິສັດໃຫຍ່ໃນໂລກ.
ໂດຍຢັ້ງຢືນການເຫັນເປັນດີຈີຕອນຕິດພັນກັບການພັດທະນາໄວ ແລະ ຍືນຍົງຂອງປະເທດ, ຕິດພັນກັບການຟື້ນຟູເສດຖະກິດໂດຍໄວ ແລະ ການພັດທະນາແບບຍືນຍົງໃນໄລຍະປັດຈຸບັນ, ຢູ່ກອງປະຊຸມຄັ້ງທີ 2 ຂອງຄະນະກຳມະການແຫ່ງຊາດກ່ຽວກັບການຫັນເປັນດີຈີຕອນໃນທ້າຍເດືອນເມສາ ປີ 2022, ທ່ານ ຟ້າມມິງຈິງ ນາຍົກລັດຖະມົນຕີ ເນັ້ນໜັກເຖິງບັນດາໜ້າທີ່ນັ້ນແມ່ນ: ຕ້ອງມີຈິນຕະນາການບຸກທະລຸ ແລະ ວິໄສທັດຍຸດທະສາດ. ມີວິທີການເຮັດທີ່ເໝາະສົມ ແລະ ຕິດແທດຕົວຈິງ. ຕ້ອງລົງທຶນຢ່າງສົມເຫດສົມຜົນໃຫ້ແກ່ການສ້າງລະບົບລະບຽບການ, ເຕັກໂນໂລຊີ, ການບຳລຸງສ້າງແຫຼ່ງຊັບພະຍາ ກອນ, ການຄຸ້ມຄອງໃຫ້ສົມເຫດສົມຜົນ. ຕ້ອງຊຸກຍູ້ການຮ່ວມມືພາກລັດ – ເອກະຊົນໃນການຫັນເປັນດີຈີຕອນ, ຍົກສູງສະຕິຄວາມຮັບຮູ້, ມີການກະທຳຢ່າງຂ້ຽວຂາດ. ເພີ່ມທະວີວຽກງານໂຄສະນາໃຫ້ແກ່ທຸກຄົນ, ເປັນຕົ້ນແມ່ນປະຊາຊົນ ແລະ ວິສາຫະກິດເພື່ອສ້າງຄວາມເຫັນດີເຫັນພ້ອມ, ການຕອບສະໜອງ. ພ້ອມກັນນັ້ນ, ກໍຕັ້ງໜ້າສ້າງບັນດາຮາກຖານຂໍ້ມູນໃຫ້ສົມບູນແບບ, ຜັນຂະຫຍາຍໂຄງການພັດທະນາພົນລະ ເມືອງດີຈີຕອນ, ສົມທົບການຮ່ວມມືລະຫວ່າງບັນດາທ້ອງຖິ່ນ ແລະ ການຮ່ວມມືສາກົນໃນວົງກ້ວາງ. ທ່ານຮຽກຮ້ອງໃຫ້ຕ້ອງສ້າງ, ບູລະນະບາງເອກະສານນິຕິກຳໂດຍໄວ. ບັນດາກະຊວງ, ຂະແໜງການ, ທ້ອງ ຖິ່ນ ຕ້ອງຜັນຂະຫຍາຍໂຄງການ, ແຜນການ, ແຜນຮ່າງຫັນເປັນດີຈີຕອນແຫ່ງຊາດໃຫ້ແກ່ໄລຍະໄໝ່ໂດຍໄວ ເພື່ອຊຸກຍູ້ການພັດທະນາເສດຖະກິດດີຈີຕອນ ແລະ ສັງຄົມດີຈີຕອນໂດຍໄວ, ຍືນຍົງ, ຮອບດ້ານ ແລະ ມີຈຸດສຸມ.
ປັດຈຸບັນ, ຫວຽດນາມ ຖືເອົາວັນທີ 10 ຕຸລາ ປະຈຳປີ ແມ່ນວັນຫັນເປັນດີຈີຕອນແຫ່ງຊາດ ດ້ວຍ 3 ເປົ້າໝາຍຫຼັກນັ້ນແມ່ນ: ຊຸກຍູ້ວິວັດການຜັນຂະຫຍາຍບັນດາໜ້າທີ່ກ່ຽວກັບການຫັນເປັນດີຈີຕອນ, ຍົກສູງຄວາມຮັບຮູ້ຂອງປະຊາຊົນໃນທົ່ວສັງຄົມກ່ຽວກັບບົດບາດ, ຄວາມໝາຍ ແລະ ຜົນປະໂຫຍດຂອງການຫັນເປັນດີຈີຕອນ, ຊຸກຍູ້ການເຂົ້າຮ່ວມຂອງທົ່ວລະບົບການເມືອງ, ມີການກະທຳຢ່າງຄົບຊຸດຢູ່ທຸກຂັ້ນ ແລະ ມີການເຂົ້າຮ່ວມຂອງປະຊາຊົນເພື່ອຮັບປະກັນຜົນສຳເລັດຂອງການຫັນເປັນດີຈີຕອນ. ອາດຢັ້ງຢືນວ່າ, ຂະບວນການຫັນເປັນດີຈີຕອນພວມແຜ່ຂະຫຍາຍຢ່າງແຂງແຮງ ດ້ວຍສັນຍານທີ່ຕັ້ງໜ້າ. ຫວຽດນາມ ພວມຕັດສິນໃຈປະຕິບັດບັນດາໜ້າທີ່ເພື່ອສ້າງບາດກ້າວບຸກທະລຸ, ຊຸກຍູ້ການຫັນເປັນດີຈີຕອນແຫ່ງຊາດໃນລະຍະໃໝ່.
ຮຽບຮຽງໂດຍ: ວິໄລສັກ
