ກົມນະໂຍບາຍ ແລະ ແຜນພະລັງງານ ກະຊວງພະລັງງານ ແລະ ບໍ່ແຮ່ ໃຫ້ຮູ້ວ່າ: ໃນວັນທີ 19-31 ສິງຫາ 2022 ເຂື່ອນໄຟຟ້ານໍ້າຄານ 2 ແລະ ນໍ້າຄານ 3 ຢູ່ແຂວງຫລວງພະບາງ ຈະເປີດປະຕູນໍ້ານອງ ເພື່ອລະບາຍນໍ້າອອກຈາກອ່າງເກັບນໍ້າຂອງເຂື່ອນ, ເນື່ອງຈາກປັດຈຸບັນ ລະດັບນໍ້າຂອງເຂື່ອນ ແມ່ນຢູ່ໃນລະດັບໃກ້ກັບລະດັບສູງສຸດ, ທັງສອງໂຄງການ ຈະປ່ອຍນໍ້າອອກຕາມປະລິມານນໍ້າໄຫລເຂົ້າອ່າງ ເຊິ່ງນໍ້າຄານ 2 ຈະປ່ອຍ 103 m3/s ລວມທັງຜ່ານກົງຫັນຜະລິດໄຟຟ້າ, ນໍ້າຄານ 3 ຈະປ່ອຍ 155 m3/s ລວມທັງຜ່ານກົງຫັນຜະລິດໄຟຟ້າ ເຊິ່ງຈະເຮັດໃຫ້ລະດັບນໍ້າຢູ່ຕອນລຸ່ມຂອງເຂື່ອນສູງຂຶ້ນຢ່າງກະທັນຫັນ ເຊິ່ງອາດຈະສົ່ງຜົນກະທົບຕໍ່ປະຊາຊົນ ທີ່ອາໄສຢູ່ກ້ອງເຂື່ອນ.
ເພື່ອເປັນການຮັບມືຈາກ ຜົນກະທົບທີ່ອາດຈະເກີດຂຶ້ນ ໃນເຂດພື້ນທີ່ຕອນລຸ່ມເຂື່ອນ ແລະ ຕາມສາຍນໍ້າຄານ, ກົມນະໂຍບາຍ ແລະ ແຜນພະລັງງານ, ກະຊວງພະລັງງານ ແລະ ບໍ່ແຮ່ ແຈ້ງໃຫ້ຫ້ອງວ່າການປົກຄອງ ແຂວງຫລວງພະບາງ ແຈ້ງຫາອຳນາດການປົກຄອງທ້ອງຖິ່ນແຕ່ລະຂັ້ນ ລວມທັງບ້ານທີ່ຢູ່ໃກ້ຂອບເຂດພື້ນທີ່ລຸ່ມເຂື່ອນ ກະກຽມຍົກຍ້າຍສິ່ງຂອງທີ່ຈຳເປັນ ໂດຍສະເພາະ ກິດຈະການຕ່າງໆ ທີ່ຢູ່ແຄມນໍ້າເພື່ອຮັບປະກັນບໍ່ໃຫ້ໄດ້ຮັບຜົນກະທົບ ຕໍ່ການປ່ຽນແປງຂອງລະດັບນໍ້າ ຈາກການເປີດປະຕູລະບາຍນໍ້າ, ພ້ອມທັງ ໃຫ້ກິດຈະການ ທ່ອງທ່ຽວ, ບັນເທີງອື່ນໆ ທີ່ຢູ່ຕາມສາຍນໍ້າຄານ ຢຸດຮັບນັກທ່ອງທ່ຽວຊົ່ວຄາວ ເລະ ເກັບມ້ຽນສິ່ງຂອງທີ່ສໍາຄັນຂຶ້ນໄວ້ບ່ອນທີ່ສູງ ໃນໄລ ຍະດັ່ງກ່າວ.
ພ້ອມນັ້ນ, ໃຫ້ປະຊາຊົນທີ່ຢູ່ເຂດພື້ນທີ່ຕອນລຸ່ມ ໂຄງການນໍ້າຄານ 2 ນໍ້າຄານ 3 ກະກຽມຄວາມພ້ອມ ເພື່ອຮັບມືຕໍ່ເຫດການສຸກເສີນ ທີ່ອາດຈະເກີດຂຶ້ນທຸກກໍລະນີ ຖ້າໄດ້ຮັບການແຈ້ງເຕືອນ ແມ່ນໃຫ້ກະກຽມຍົກຍ້າຍຊັບສິນລວມທັງກິດຈະການຕ່າງໆ ເອົາໄປໄວ້ບ່ອນທີ່ສູງ, ພ້ອມທັງ ໃຫ້ພະແນກການທີ່ກ່ຽວຂ້ອງ ກະກຽມຮັບມືຕາມພາລະບົດບາດໜ້າທີ່ ແລະ ຄວາມຮັບຜິດຊອບຂອງຂະແໜງການຕົນ.
ຂ່າວ: ທະນູທອງ
